୨୦ ତାରିଖ ଯାଏଁ ପ୍ରତ୍ୟେକ ଦିନ ଜଣେ ମନ୍ତ୍ରୀ ଓ ୩ରୁ ୪ ଜଣ ବିଧାୟକ ଦେବେ ଇସ୍ତଫା । ଯୋଗୀଙ୍କ ହାତ ଛାଡିବା ପରେ କିଛି ଏମିତି କହିଲେ ଧରମ ସିଂ ।

କନକ ବ୍ୟୁରୋ : ବିଧାନସଭା ନିର୍ବାଚନ ପାଇଁ ଏବେ ଚଳଚଞ୍ଚଳ ଉତ୍ତରପ୍ରଦେଶ ରାଜନୀତି । ନିର୍ବାଚନ ପାଇଁ ତାରିଖ ଘୋଷଣା ପରେ ଆରମ୍ଭ ହୋଇଛି ଆୟାରାମ ଗୟାରାମ ରାଜନୀତି । ଆଉ ଏଥିରେ ଅଧିକ କ୍ଷତି ସହିଛି ଶାସକ ବିଜେପି । ଯୋଗୀ ସରକାରରେ ମନ୍ତ୍ରୀ ଥିବା ସ୍ୱାମୀ ପ୍ରସାଦ ମୌର୍ଯ୍ୟ ମନ୍ତ୍ରୀପଦ ସହ ବିଜେପିରୁ ଇସ୍ତଫା ଦେବା ପରେ ଦଳକୁ ଗୋଟିଏ ପରେ ଗୋଟିଏ ଝଟକା ଲାଗୁଛି । ସ୍ୱାମୀ ପ୍ରସାଦ ମୌର୍ଯ୍ୟଙ୍କ ପରେ ଏବେ ସୁଦ୍ଧା ୩ ଜଣ ମନ୍ତ୍ରୀ ଓ ୭ ଜଣ ବିଧାୟକ ପଦ୍ମ ଦଳକୁ ପର କରିସାରିଲେଣି । ତେବେ ଏହା କେବଳ ଆରମ୍ଭ ମାତ୍ର । କାରଣ ଯୋଗୀ ସରକାରର ହାତ ଛାଡିଥିବା ଧରମ ସିଂ ସୈନୀ କହିଛନ୍ତି ଯେ, ଆସନ୍ତା ୨୦ ଜାନୁଆରୀ ପର୍ଯ୍ୟନ୍ତ ପ୍ରତ୍ୟେକ ଦିନ ଦଳରୁ ଜଣେ ମନ୍ତ୍ରୀ ଓ ୩ରୁ ୪ ଜଣ ବିଧାୟକ ଇସ୍ତଫା ଦେବେ । ଆଉ ସମସ୍ତେ ସ୍ୱାମୀ ପ୍ରସାଦ ମୌର୍ଯ୍ୟଙ୍କ ରାସ୍ତାରେ ଚାଲିବେ ବୋଲି ନିଷ୍ପତ୍ତି ନେଇଛନ୍ତି ।

ସୈନୀ ମନ୍ତ୍ରୀପଦରୁ ଇସ୍ତଫା ଦେବା ସହ କହିଛନ୍ତି, ଯୋଗୀ ସରକାରରେ ୫ ବର୍ଷ ହେବ ଦଳିତ ତଥା ପଛୁଆବର୍ଗଙ୍କ ସ୍ୱରକୁ ଚାପି ରଖାଯାଇଛି । ଆମେ ସେୟା କରିବୁ, ଯାହା ସ୍ୱାମୀ ପ୍ରସାଦ ମୌର୍ଯ୍ୟ କହିବେ । ଆଗକୁ ଅଥାର୍ତ ଜାନୁଆରୀ ୨୦ ମଧ୍ୟରେ ପ୍ରତ୍ୟେକ ଦିନ ଜଣେ ମନ୍ତ୍ରୀ ଓ ୩ରୁ ୪ ଜଣ ବିଧାୟକ ବିଜେପି ଛାଡିବେ । ମିଳିଥିବା ସୂଚନା ମୁତାବକ ବିଜେପି ଛାଡୁଥିବା ଅଧିକାଂଶ ନେତା ସମାଜବାଦୀ ପାର୍ଟିରେ ସାମିଲ ହେବେ ।

ସ୍ୱାମୀ ପ୍ରସାଦ ମୌର୍ଯ୍ୟ ବିଜେପି ଛାଡିବା ଦଳ ପାଇଁ ଏକ ବଡ ଝଟକା । କାରଣ ପଛୁଆବର୍ଗର ପ୍ରଭାବଶାଳୀ ନେତା ଭାବେ ଜଣାଶୁଣା ସ୍ୱାମୀ ପ୍ରସାଦ ମୌର୍ଯ୍ୟ । ତେଣୁ ସେ ଦଳ ଛାଡିବା ଆଗାମୀ ବିଧାନସଭା ନିର୍ବାଚନରେ ଦଳକୁ ବଡ କ୍ଷତି ପହଞ୍ଚାଇବ । ଏହାପୂର୍ବରୁ ୨୦୧୭ ବିଧାନସଭା ନିର୍ବାଚନରେ ବିଏସପି ଛାଡି ବିଜେପିରେ ଯୋଗ ଦେଇଥିଲେ ସ୍ୱାମୀ ପ୍ରସାଦ ମୌର୍ଯ୍ୟ ।