ଗୋଟିଏ ଲିଟର ପେଟ୍ରୋଲ ପାଇଁ ଟିକସ ଦିଅନ୍ତି ୬୬ପ୍ରତିଶତ । ପାକିସ୍ତାନ, ଶ୍ରୀଲଙ୍କା ଓ ଆଫାଗନିସ୍ତାନରେ ଶସ୍ତାରେ ମିଳୁଛି ପେଟ୍ରୋଲ । ଭାରତରେ କାହିଁକି ବଢୁଛି ଦର?
କନକ ବ୍ୟୁରୋ: ଦେଶରେ ବଢୁଥିବା ତୈଳ ଦର ଏବେ ମୁଖ୍ୟ ପ୍ରସଙ୍ଗ ହୋଇଛି କାରଣ କେତେକ ସ୍ଥାନରେ ପେଟ୍ରୋଲ ଲିଟର ପିଛା ଶହେ ଟଙ୍କା ଟପିଛି । ବର୍ତମାନ ଏହି ଦର ବୃ୍ଦ୍ଧିର କାରଣ କେନ୍ଦ୍ର ଓ ରାଜ୍ୟ ସରକାର ଗୁଡିକ ଦ୍ୱାରା ଲଗାଯାଉଥିବା ମାତ୍ରାଧିକ ଏକ୍ସସାଇଜ ଓ ଅନ୍ୟାନ୍ୟ ଟିକସ । ଯେଉଥିଁପାଇଁ ଭାରତୀୟ ଗ୍ରାହକଙ୍କୁ ପେଟ୍ରୋଲ ଲାଗି ଯାହା ପ୍ରଦାନ କରୁଛନ୍ତି ତାର ପ୍ରାୟ ୬୬ପ୍ରତିଶତ କେବଳ ଏହି ଟିକସ ବାଦରେ ଦିଆଯାଏ । ଏବେ ପୁଣି ଏନଡିଏ ସରକାର ଅମଳରେ ଏହି ଟିକସ ବଢିବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ୟୁପିଏ ସରକାର ସମୟରେ ଏହି ସୂତ୍ରରୁ ହାରାହାରି ବାର୍ଷିକ ରାଜକୋଷୀୟ ଆୟ ୯୯ ହଜାର କୋଟି ହୋଇଥିବା ବେଳେ ଏନଡିଏ ସରକାରର ପ୍ରଥମ ଦୁଇ ବର୍ଷର କାର୍ଯ୍ୟକାଳ ସମୟରେ ଏହା ପହଂଚିଥିଲା ୨ଦଶମିକ ୪ଲକ୍ଷ କୋଟି ଟଙ୍କାରେ । ୨୦୧୪ରେ ମୋଦୀଙ୍କ ନେତୃତ୍ୱାଧିନ ଏନଡିଏ ସରକାର ଶାସନରେ ଆସିବା ପରଠାରୁ ଆଜି ପର୍ଯ୍ୟନ୍ତ ୬ବର୍ଷ ମଧ୍ୟରେ ପେଟ୍ରୋଲ ଦରରେ ୨୮ପ୍ରତିଶତରୁ ଅଧିକ ବୃଦ୍ଧି ହୋଇଛି ।
ପାକିସ୍ତାନ, ଶ୍ରୀଲଙ୍କା, ଆଫଗାନିସ୍ଥାନ ଭଳି ପଡୋଶୀ ଦେଶରେ ପେଟ୍ରୋଲ ଦର ତୁଳନାତ୍ମକ ଭାବରେ କମ୍ ରହିଛି । ପାକିସ୍ତାନରେ ପେଟ୍ରୋଲ ଲିଟର ପିଛା ୫୦ଟଙ୍କା, ଶ୍ରୀଲଙ୍କାରେ ପେଟ୍ରୋଲ ଲିଟର ପିଛା ୬୧ ଟଙ୍କା ଓ ଆଫଗାନିସ୍ତାନରେ ପେଟ୍ରୋଲ ଲିଟର ପିଛା ୩୭ଟଙ୍କା ୫୦ପଇସା ରହିଛି । ସେପଟେ ଜାପାନ, ଦକ୍ଷିଣ କୋରିଆ, ଇଂଲଣ୍ଡ, ଫ୍ରାନ୍ସ ଓ ଜର୍ମାନି ଭଳି ବିକଶିତ ରାଷ୍ଟ୍ରରେ ଏହି ଦର ଭାରତ ସହ ସମକକ୍ଷ କିମ୍ବା ତାଠାରୁ ଅଧିକ ରହିଛି । ଜାପାନରେ ପେଟ୍ରୋଲ ଲିଟର ପିଛା ୯୪ ଟଙ୍କା, ଦକ୍ଷିଣ କୋରିଆରେ ୯୬ଟଙ୍କା, ଇଂଲଣ୍ଡରେ ୧୧୮ଟଙ୍କା, ଫ୍ରାନ୍ସରେ ୧୨୬ ଓ ଜର୍ମାନୀରେ ପେଟ୍ରୋଲ ଲିଟର ପିଛା ୧୧୯ଟଙ୍କା ରହିଛି । ଚୀନ୍ରେ ଏଡି ଦର ଭାରତ ସହ ପ୍ରାୟ ସମାନ ।
ପେଟ୍ରୋଲ ବ୍ୟବହାର ପରିବେଶ ପ୍ରଦୂଷଣର ଏକ ବଡ କାରଣ ହୋଇଥିବାରୁ ଅନେକ ୟୁରୋପୀୟ ରାଷ୍ଟ୍ରରେ ଏହା ଉପରେ ଅତିରିକ୍ତ କାର୍ବନ ଟିକସ ମଧ୍ୟ ଲଗାଯାଇଥାଏ । ଯାହା ସେଠାକାର ଉଚ୍ଚ ଦରର ଏକ କାରଣ । ବିଶେଷଜ୍ଞଙ୍କ ମତରେ ପେଟ୍ରୋଲ ଦରକୁ ଉଚ୍ଚ ରଖିବା ଅନେକ ସରକାରଙ୍କ ଏକ ଅଘୋଷିତ ନୀତି । କାରଣ ତାହା ପେଟ୍ରୋଲର ମାତ୍ରାଧିକ ବ୍ୟବହାରକୁ ନିରୁତ୍ସାହିତ କରି ଏହାର ଆମଦାନି ପରିମାଣରେ ତଥା ଏହା ଦ୍ୱାରା ହେଉଥିବା ପରିବେଶ ପ୍ରଦୂଷଣକୁ ହ୍ରାସ ଘଟାଇବ ।