ଝାରସୁଗୁଡା ସେନହାମାଲ ପଥର ଖାଦାନରେ ବିସ୍ଫୋରଣ : ବିସ୍ଫୋରଣରେ ଜଣେ ଗୁରୁତର ହେବା ପରେ ମୃତ ଘୋଷଣା କଲେ ଡାକ୍ତର
କନକ ବ୍ୟୁରୋ : ଝାରସୁଗୁଡ଼ା ଜିଲ୍ଲା ବନହଳପାଳି ଥାନା ଅନ୍ତର୍ଗତ ସେନହାମାଲ ପଥର ଖାଦାନ ଠାରେ ବିସ୍ଫୋରଣ ଯୋଗୁଁ ଜଣଙ୍କ ଜୀବନ ଯାଇଛି । ରବିବାର ଦ୍ୱିପହର ସମୟରେ ବିସ୍ଫୋରଣ ହୋଇଥିବା ବେଳେ ଏଥିରେ ଜଣେ ବ୍ୟକ୍ତି ଗୁରୁତର ଆହତ ହୋଇଥିଲେ । ଗୁରୁତରଙ୍କୁ ହସ୍ପିଟାଲକୁ ନିଆଯାଇଥିବା ବେଳେ ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ । ତେବେ ଏହି ଦୁର୍ଘଟଣା ପରେ ପଥର ଖାଦାନରେ ଉତେଜନା ଦେଖାଦେଇଥିଲା । ଘଟଣାସ୍ଥଳରେ ପୁଲିସ୍ ପହଂଚି ତଦନ୍ତ ଆରମ୍ଭ କରିଥିଲା ।
Kanak News is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନା ଅନୁଯାୟୀ ଖାଦାନରେ ବ୍ଲାଷ୍ଟିଂ କରାଯାଇଥିଲା। ସେଥିରୁ ପଥର ଖଣ୍ଡ ଛିଟିକି ଅମିତଙ୍କ ମୁଣ୍ଡରେ ତଥା ଶରୀରର ବିଭିନ୍ନ ଅଙ୍ଗରେ ବାଜିବାରୁ ସେ ଗୁରୁତର ଆହତ ହୋଇଥିଲେ । ରକ୍ତାକ୍ତ ଅବସ୍ଥାରେ ତାଙ୍କୁ ବେଲପାହାଡ଼ ଟିଆର୍ଏଲ କ୍ରୋସେକି ଡାକ୍ତରଖାନା ନିଆ ଯାଇଥିଲା । ସେଠାରେ ପହଞ୍ଚିବାପରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଅମିତ ପରିବାରରେ ଏକମାତ୍ର ରୋଜଗାରକ୍ଷମ ଥିଲେ । ସେ ବିବାହିତ ଓ ତାଙ୍କର ୨ଟି ଛୋଟଛୋଟ କନ୍ୟା ସନ୍ତାନ ଥିବା ଜଣାପଡ଼ିଛି ।
ପ୍ରକାଶ ଯେ ଏ ଅଞ୍ଚଳରେ ଖଣି ଆଇନକୁ ଖୋଲା ଉଲ୍ଲଂଘନ କରାଯାଇ ବ୍ଲାଷ୍ଟିଂ କରାଯାଉଥିବା ଅଭିଯୋଗ ନୂଆ ନୁହେଁ । ଅଞ୍ଚଳବାସୀ ବର୍ଷ ବର୍ଷ ଧରି ପ୍ରାଶାସନିକ ଅଧିକାରୀଙ୍କ ନିକଟରେ ଅଭିଯୋଗ କରୁଛନ୍ତି । ଜାନୁଆରୀ ୧୫ ତାରିଖରେ ସେମିତି ସରଣ୍ଡାମାଲ ପଞ୍ଚାୟତ ଅଞ୍ଚଳରେ ବେଆଇନ ଭାବେ ବ୍ଲାଷ୍ଟିଂ ହେବା ଫଳରେ ସରଣ୍ଡାମାଳ ହାଇସ୍କୁଲ ପରିସର ପର୍ଯ୍ୟନ୍ତ ପଥରଖଣ୍ଡ ଛିଟିକିଥିଲା । ଛାତ୍ରଛାତ୍ରୀ ଅଳ୍ପକେ ବର୍ତ୍ତି ଯାଇଥିଲେ । ଏ ସଂପର୍କରେ ଲୋକେ ପୁଲିସ ଓ ରାଜସ୍ବ ବିଭାଗରେ ଅଭିଯୋଗ କରିଥିଲେ । ତଥାପି ବ୍ଲାଷ୍ଟିଂ ହେଉଥିବାରୁ ଏବେ ଅଞ୍ଚଳରେ ଭୟର ବାତାବରଣ ଖେଳି ଯାଇଛି । ଯେଉଁମାନେ ଏସବୁ କରୁଛନ୍ତି ତାଙ୍କ ଉପରେ ପ୍ରଶାସନର ଅଙ୍କୁଶ ନଥିବାର ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।