ଦୁର୍ଗାପୂଜାର ଶେଷ ଦିନରେ ବଙ୍ଗୀୟ ପରମ୍ପରାରେ ହେଲା ସିନ୍ଦୂର ଖେଳ । ସଧବା ମହିଳାମାନେ ପରସ୍ପରକୁ ସିନ୍ଦୂର ଲଗାଇ ମାଆଙ୍କୁ ଦେଲେ ବିଦାୟ ।
କନକ ବ୍ୟୁରୋ: ନବରାତ୍ରୀର ଶେଷ ଦିନ ବିଜୟାଦଶମୀରେ ମାଆ ଦୁର୍ଗାଙ୍କ ନିକଟରେ ହୋଇଛି ସିନ୍ଦୂର ଖେଳ । ତେବେ ଇଏ ଏମିତି ଏକ ଖେଳ ଯାହା ଦଶହରା ଉତ୍ସବକୁ ଆହୁରି ସୁନ୍ଦର କରିଥାଏ, ଆକର୍ଷଣୀୟ କରିଥାଏ । ବିବାହିତ ଝିଅ ବାପ ଘରୁ ଯେମିତି ବିଦା ହୋଇଥାନ୍ତି, ସେମିତି ମାଆଙ୍କୁ ବିଦାୟ ଦେଇଥାନ୍ତି ଶ୍ରଦ୍ଧାଳୁ । ମାଆଙ୍କ ପାଦରେ ସିନ୍ଦୂର ଲଗାଇବା ପରେ ସଧବା ମହିଳାମାନେ ପରସ୍ପର ପରସ୍ପରକୁ ସିନ୍ଦୂର ଲଗାଇ ଉତ୍ସବ ମନାଇଥାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଝିଅକୁ ବିଦା କରିବା ସମୟରେ ଯେମିତି ବାପା, ମା ସମେତ ସମ୍ପର୍କୀୟମାନେ ଦୁଃଖୀ ହୋଇଥାନ୍ତି, ତା ଭିତରେ ଉତ୍ସବ ମନାଇଥାନ୍ତି, ପୁଣି ଫେରି ଆସିବାର ଶୁଭ ମନାସିଥାନ୍ତି । ଠିକ୍ ସେମିତି ଏ ବର୍ଷ ବିଦାୟ ନେଉଥିଲେ ବି ଆସନ୍ତାବର୍ଷ ଠିକ୍ ଏହି ସମୟକୁ ମାଆ ଫେରି ଆସନ୍ତୁ ବୋଲି କାମନା କରିଥାନ୍ତି ଶ୍ରଦ୍ଧାଳୁ ।
ବଙ୍ଗୀୟ ପରମ୍ପରା ଅନୁସାରେ ମା ଦୁର୍ଗାଙ୍କ ନବମୀ ପୂଜା ପର ଦିନ, ଅର୍ଥାତ ବିଜୟାଦଶମୀରେ ମାଙ୍କ ବିସର୍ଜନ ପରେ, ବିଦାୟ ଦେବା ପୂର୍ବରୁ ସିନ୍ଦୂର ଖେଳ ପାଳନ ହୋଇଥାଏ । ହେଲେ, ଏହି ବଙ୍ଗୀୟ ପରମ୍ପରାର ସିନ୍ଦୁର ଖେଳ, ଏବେ ଓଡିଶାର ବିଭିନ୍ନ ପୂଜା ମଣ୍ଡପରେ ଦେଖିବାକୁ ମିଳୁଛି । ବିଶେଷ କରି ବଙ୍ଗୀୟ ସମ୍ପଦ୍ରାୟର ଲୋକ ରହୁଥିବା ମାଲକାନଗିରି, କଟକ, ଯାଜପୁର, ବାଲେଶ୍ୱର, ଭୁବନେଶ୍ୱରର, ଓ ରାଉରକେଲାର ବିଭିନ୍ନ ମଣ୍ଡପରେ ଦେଖିବାକୁ ମିଳିଛି । ଆଉ ସିନ୍ଦୂର ଖେଳି ମାଙ୍କୁ ବିଦାୟ ଦେଇଛନ୍ତି ଶ୍ରଦ୍ଧାଳୁ ।
ମାଆଙ୍କୁ ବିଦାୟ ଦେବା ସମୟରେ ସିନ୍ଦୂର ଖେଳ ଖେଳିବା, ସଧବା ମହିଳାମାନେ ପରସ୍ପରକୁ ସିନ୍ଦୂର ଲଗାଇବା, ପ୍ରାୟ ୪ଶହ ବର୍ଷର ପୁରୁଣା ବଙ୍ଗୀୟ ପରମ୍ପରା ବୋଲି କୁହାଯାଏ । ବିଶ୍ୱାସ ରହିଛି, ଯେଉଁ ମହିଳା ପରମ୍ପରା ଅନୁସାରେ ସିନ୍ଦୂର ଖେଳିଥାନ୍ତି, ସେମାନେ କେବେ ବିଧବା ହୋଇନଥାନ୍ତି । ପରିବାରକୁ ସବୁ ଦୁଃଖ କଷ୍ଟରୁ ରକ୍ଷା କରିବା ପାଇଁ ଶକ୍ତି ମିଳିଥାଏ । ପଡୋଶୀ ପଡୋଶୀ ଭିତରେ ଥିବା ବିବାଦ ଓ କଳି ଝଗଡାକୁ ସମାଧାନ କରିବାରେ ସହାୟକ ହୋଇଥାଏ ।
ପୂରାଣ ଅନୁସାରେ, ଦେବୀ ଦୁର୍ଗା ବିଜୟାଦଶମୀରେ ପୁଣି ଥରେ ଧରାପୃଷ୍ଟ ଛାଡି, କୈଳାସ ପର୍ବତକୁ ଭଗବାନ ଶିବ ଅର୍ଥାତ ତାଙ୍କ ସ୍ୱାମୀଙ୍କ ପାଖକୁ ଚାଲି ଯାଇଥାନ୍ତି । ଠିକ୍ ଯେମିତି ଜଣେ ବିବାହିତ ଝିଅ ତାର ବାପ ଘର ଛାଡି ଶାଶୁ ଘରକୁ ଚାଲିଯାଇଥାଏ, ଠିକ୍ ସେମିତି ମା ଦୁର୍ଗା ଚାଲି ଯାଇଥାନ୍ତି । ଆଉ ଝିଅ ଭଳି ମାଆଙ୍କ ଫେରି ଆସିବା କାମନା କରି ତାଙ୍କୁ ସିନ୍ଦୁର ଲଗାଇବା ପରେ ନିଜେ ଖେଳି ବିଦାୟ ଦେଇଥାନ୍ତି ।