ଦିଲ୍ଲୀରେ ଚିହ୍ନଟ ଓମିକ୍ରନ୍ ସଂକ୍ରମିତଙ୍କ ପାଖରେ ଦେଖାଯାଉଛି କେଉଁ କେଉଁ ଲକ୍ଷଣ? ପଢନ୍ତୁ, କଣ କହିଲେ ଡାକ୍ତର ସୁରେଶ କୁମାର…
କନକ ବ୍ୟୁରୋ: କରୋନାର ନୂଆ ଭାରିଆଣ୍ଟ ଓମିକ୍ରନକୁ ନେଇ ଏବେ ଚାରିଆଡେ ଚର୍ଚ୍ଚା । ଏହାରି ଭିତରେ ଏହି ନୂଆ ଭାରିଆଣ୍ଟ ରାଜଧାନୀ ଦିଲ୍ଲୀରେ ମଧ୍ୟ ପହଞ୍ଚିଯାଇଛି । ରବିବାର ରାଜଧାନୀ ଦିଲ୍ଲୀରୁ ପ୍ରଥମ କରି ଓମିକ୍ରନ୍ ସଂକ୍ରମିତ ଚିହ୍ନଟ ହୋଇଛନ୍ତି । ଯାହାଙ୍କର ଚିକିତ୍ସା ଏଲଏନଜେପି ହସ୍ପିଟାଲରେ ଜାରି ରହିଛି । ଏଲଏନଜେପି ମେଡିକାଲର ନିର୍ଦ୍ଦେଶକ ସୁରେଶ କୁମାରଙ୍କ କହିବା ମୁତାବକ, ଯେଉଁ ବ୍ୟକ୍ତି ଜଣକ ଓମିକ୍ରନରେ ସଂକ୍ରମିତ ହୋଇଛନ୍ତି, ସେ ପ୍ରଥମେ ତାଙ୍କ ଗଳାରେ କଷ୍ଟ ଅନୁଭବ କରିଥିଲେ । ତେବେ ବର୍ତ୍ତମାନ ହସ୍ପିଟାଲରେ ତାଙ୍କର ଚିକିତ୍ସା ଚାଲିଥିବାବେଳେ, ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି ।
Kanak News is now on WhatsApp
Join and get latest news updates delivered to you via WhatsApp
ଖାଲି ସେତିକି ନୁହେଁ, ଡାକ୍ତର ସୁରେଶ କୁମାରଙ୍କ ସୂଚନା ମୁତାବକ, ଓମିକ୍ରନ୍ ସଂକ୍ରମିତ ଜଣକ କରୋନାର ଦୁଇଟି ଯାକ ଟିକା ନେଇସାରିଥିଲେ । ହେଲେ ଏହାସତ୍ତେ୍ୱ ମଧ୍ୟ ସେ ଓମିକ୍ରନରେ ସଂକ୍ରମିତ ହୋଇଛନ୍ତି । ତେବେ ରୋଗୀ ଜଣକ ନିଜ ଶରୀରରେ ଦରଜ ଅନୁଭବ କରୁଛନ୍ତି ଏବଂ ତାଙ୍କ ଶରୀରରେ ମଧ୍ୟ ଦୁର୍ବଳତା ଅନୁଭବ କରୁଛନ୍ତି । ହେଲେ ତାଙ୍କର ଅକ୍ସିଜେନ୍ ଲେଭଲରେ କୌଣସି ପରିବର୍ତ୍ତନ ଦେଖିବାକୁ ମିଳିନାହିଁ । ଡାକ୍ତରଙ୍କ ସ୍ପେଶାଲ ଟିମ୍ ଓମିକ୍ରନ ସଂକ୍ରମିତଙ୍କ ଉପରେ ୨୪ ଘଣ୍ଟା ନଜର ରଖିଛନ୍ତି । ବିଶେଷକରି ରୋଗୀଜଣଙ୍କର ଅକ୍ସିଜେନ୍ ଲେଭଲକୁ ଧ୍ୟାନରେ ରଖାଯାଇଛି । ଏଥିପାଇଁ ହସ୍ପିଟାଲ ଭିତରେ ସମସ୍ତ ପ୍ରସ୍ତୁତି ଶେଷ ହୋଇଛି ।
ହସ୍ପିଟାଲ କର୍ତ୍ତୁପକ୍ଷଙ୍କ କହିବା କଥା, ଯଦି ଆଗକୁ ହସ୍ପିଟାଲରେ ରୋଗୀଙ୍କ ସଂଖ୍ୟା ବଢେ, ତେବେ ଜରୁରୀକାଳୀନ ସ୍ୱାସ୍ଥ୍ୟସେବା ପାଇଁ ସେମାନେ ପ୍ରସ୍ତୁତ ଅଛନ୍ତି । ତା ସହିତ ଜିନୋମୋ ସ୍ୱିକେନ୍ସିଂ ରିପୋର୍ଟ ଆସିବାକୁ ସମୟ ଲାଗୁଛି । ତେଣୁ ୪ରୁ ୫ଦିନ ରିପୋର୍ଟ ଆସିବା ପର୍ଯ୍ୟନ୍ତ ସମସ୍ତଙ୍କଠାରୁ ସାମାଜିକ ଦୂରତା ଏବଂ କୋଭିଡ୍ ଗାଇଡଲାଇନ୍ ପାଳନ କରିବାକୁ ପରାମର୍ଶ ଦେଇଛନ୍ତି ।