କନକ ବ୍ୟୁରୋ : ଦକ୍ଷୀଣ ଆଫ୍ରିକାରେ ପ୍ରଥମ ଚିହ୍ନଟ ହୋଇଥିବା କରୋନା ଭୂତାଣୁର ନୂଆ ଭାରିଆଣ୍ଟଓମିକ୍ରନ ଏବେ ୧୭ ଟି ଦେଶକୁ ବ୍ୟାପିଛି । କଡା କଟକଣା ପାଳନ କରୁଥିବା ଜାପାନରେ ବି ଓମିକ୍ରନ ଭାରିଆଣ୍ଟ ଚିହ୍ନଟ ହୋଇଛି । ମଙ୍ଗଳବାର ଦିନ ଜାପାନ ଅଧିକାରୀଙ୍କ ସୂଚନା ମୁତାବକ ସେଠାରେ ଓମିକ୍ରନ ଭାରିଆଣ୍ଟ ସଂକ୍ରମିତ ରୋଗୀ ଚିହ୍ନଟ ହୋଇଛନ୍ତି । ସେପଟେ ନଭେମ୍ବର ୨୪ ତାରିଖରେ ଦକ୍ଷୀଣ ଅଫ୍ରିକା ତରଫରୁ ବିଶ୍ୱ ସ୍ୱାସ୍ଥ୍ୟ ସଂଗଠନକୁ ଏହି ଭାରିଆଣ୍ଟ ନେଇ ସୂଚନା ଦେଇଥିଲା । ଏହାପରେ ବିଶ୍ୱ ସ୍ୱାସ୍ଥ୍ୟସଂଗଠନ ପକ୍ଷରୁ ଏନେଇ ଦିଶା ନିର୍ଦ୍ଦେଶ ଜାରି କରିଥିଲା । ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ କୁହାଯାଇଛି କି ଏହି ଭାରିଆଣ୍ଟ କରୋନାର ଅନ୍ୟ ଭାରିଆଣ୍ଟ ଠାରୁ ଅଧିକ ସଂକ୍ରମିତ ।
Kanak News is now on WhatsApp
Join and get latest news updates delivered to you via WhatsApp
ଜାପାନ ସରକାରଙ୍କ ପ୍ରବକ୍ତା ହେରିକାଜୁ ମାସ୍ତୁନେ ଗଣମାଧ୍ୟମକୁ କହିଛନ୍ତି କି ନାମ୍ବିଆରୁ ଆସିଥିବା କିଛି ଯାତ୍ରୀଙ୍କ ଠାରେ ଓମିକ୍ରନ ଭାରିଆଣ୍ଟ ଚିହ୍ନଟ ହୋଇଛି । ଏବେ ସେମାନଙ୍କୁ ଏକ ସ୍ୱତନ୍ତ୍ର ଆଇସୋଲେସନରେ ରଖାଯାଇଥିବା କଥା କୁହାଯାଇଛି ।
ଅନ୍ୟପଟେ ଗୋଟିଏ ଦିନ ପୂର୍ବରୁ ଜାପାନ ତରଫରୁ ଦେଶର ସୀମାରେ କଟକଣା ଲଗାଯାଇଥିଲା । ଏହି କ୍ରମରେ ବିଦେଶରୁ ଆସୁଥିବା ସମସ୍ତ ଯାତ୍ରୀଙ୍କୁ କ୍ୱାରେଣ୍ଟିନରେ ରଖାଯିବା ସହ ସେମାନଙ୍କର କୋଭିଡ ଟେଷ୍ଟ ବାଧ୍ୟତାମୂଳକ କରାଯାଇଛି । ହେଲେ କିଛି ସପ୍ତାହ ପୂର୍ବରୁ ଜାପାନ ସରକାର କରୋନା କଟକଣାରେ ଢିଲା କରିଥିବା ସେଠିକାର ଗଣମାଧ୍ୟମ ପ୍ରଚାର କରିଛି ।
କରୋନା ଭୂତାଣୁର ଏହି ସମ୍ଭାବିତ ରୂପ ଅନ୍ୟ ଭାରିଆଣ୍ଟ ଠାରୁ ଅଧିକ ସଂକ୍ରାମକ । ଏବେ ଏହି ଭୂତାଣୁ ଦକ୍ଷୀଣ ଆଫ୍ରିକାରୁ ଚିହ୍ନଟ ହୋଇ ବିଶ୍ୱର ୧୭ ଟି ଦେଶକୁ ବ୍ୟାପିଛି । ଏନେଇ ଭାରତ ସରକାରଙ୍କ ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ମଙ୍ଗଳବାର ଦିନ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ଅଧିକାରୀଙ୍କ ସହ ଏକ ସମୀକ୍ଷା ବୈଠକ କରିଛନ୍ତି । ଏହି ବୈଠକରେ ଯାଂଚ ବଢାଇବାକୁ ରାଜେଶ ଭୂଷଣ ରାଜ୍ୟ ଅଧିକାରୀମାନଙ୍କୁ ତାଗିଦ କରିଛନ୍ତି ।