ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲି ଆଶ୍ଚର୍ଯ୍ୟଜନକ ନିଷ୍ପତ୍ତି । ହଠାତ କ୍ୟାବିନେଟ୍ ଡାକି ସଂସଦ ଭଙ୍ଗ କରିବାକୁ ଘୋଷଣା
କନକ ବ୍ୟୁରୋ : ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲି ରବିବାର ହଠାତ୍ କ୍ୟାବିନେଟ୍ ବୈଠକ ଡାକି ସଂସଦ ଭଙ୍ଗ କରିବାକୁ ଘୋଷଣା କରିଛନ୍ତି । ଏନେଇ କ୍ୟାବିନେଟ୍ ର ସୁପାରିଶକୁ ସେ ରାଷ୍ଟ୍ରପତିଙ୍କ ନିକଟକୁ ପଠାଇ ଦେଇଥିବା ଜଣାପଡିଛି ।ନେପାଳର ଶକ୍ତି ମନ୍ତ୍ରୀ ବର୍ଷମାନ ପୁନ୍ ଙ୍କ କହିବା ମୁତାବକ ପ୍ରଧାନମନ୍ତ୍ରୀ କେ,ପି ଶର୍ମା ଓଲି ହଠାତ ଜରୁରୀକାଳୀନ କ୍ୟାବିନେଟ୍ ବୈଠକ ଡାକିଥିଲେ । ଏହି ବୈଠକରେ ପ୍ରଥମେ ସେ ସଂସଦ ଭଙ୍ଗ କରିବାକୁ ପ୍ରସ୍ତାବ ରଖିଥିଲେ । ଏହାପରେ ଏହି ପ୍ରସ୍ତାବକୁ ସେ ରାଷ୍ଟ୍ରପତିଙ୍କ ନିକଟକୁ ପଠାଇଛନ୍ତି । ଏନେଇ ନେପାଳ କମ୍ୟୁନିଷ୍ଟ ପାର୍ଟିର ପ୍ରବକ୍ତା ନାରାୟଣଜୀ ଶ୍ରେଷ୍ଠ କହିଛନ୍ତି କି ଏଭଳି ନିଷ୍ପତ୍ତି ହଠାତ୍ ନିଆଯାଇଛି, କାରଣ ଆଜିର କ୍ୟାବିନେଟ୍ ବୈଠକରେ ସମସ୍ତ ମନ୍ତ୍ରୀ ମାନେ ଉପସ୍ଥିତ ନଥିଲେ । ଏହା ଲୋକତାନ୍ତ୍ରିକ ମାନଦଣ୍ଡର ବିରୋଧାଚରଣ ଓ ଏଭଳି ନିଷ୍ପତ୍ତି ଦେଶକୂୁ ଅନେକ ପଛକୁ ଫେରାଇ ନେବ ଓ ଏହାକୁ ରାଷ୍ଟ୍ରପତି ଗ୍ରହଣ ନକରିବା ଉଚିତ୍ ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନେପାଳରେ ଏଭଳି ରାଜନୈତିକ ଘଟଣାକ୍ରମ ସେତେବେଳେ ଦେଖା ଦେଇଛି ଯେତେବେଳେ ନେପାଳ କଂଗ୍ରେସ ଅଭିଯୋଗ ଆଣିଥିଲା କି ଓଲି ସରକାର ଖୋଲା ଖୋଲି ଭାବେ ରାଜତନ୍ତ୍ରରେ ବିଶ୍ୱାସ କରୁଥିବା ଲୋକଙ୍କୁ ଖୋଲା ଖୋଲି ସମର୍ଥନ କରୁଛନ୍ତି ।
ନେପାଳର ମୁଖ୍ୟ ବିରୋଧିଦଳ ନେପାଳୀ କଂଗ୍ରେସ ଅଭିଯୋଗ ଆଣିଥିଲା କି ଓଲି ସରକାର ଦେଶର ବିଭିନ୍ନ କ୍ଷେତ୍ରରେ ଥିବା ରାଜତନ୍ତ୍ର ସମର୍ଥକ ମାନଙ୍କ ରାଲିକୁ ଯୋଜନାବଦ୍ଧ ଭାବେ ସମର୍ଥନ କରୁଛନ୍ତି । ଯେଉଁ ରାଲିରେ କି ଦେଶର ଗଣତନ୍ତ୍ର ବ୍ୟବସ୍ଥାକୁ ଭଙ୍ଗକରି ପୁଣି ରାଜତନ୍ତ୍ର ବ୍ୟବସ୍ଥା ଲାଗୁ କରିବା ଓ ନେପାଳକୁ ହିନ୍ଦୁ ରାଷ୍ଟ୍ର ଭାବେ ଘୋଷଣା କରିବାକୁ ଦାବି ହେଉଛି ।
କହିରଖୁ କି ଭାରତ-ଚୀନ ବିବାଦକୁ ନେଇ ଭାରତ ବିରୋଧରେ ନେପାଳ ସରକାର ନେଉଥିବା କଡା ଅଭିମୂୁଖ୍ୟକୁ ନେଇ ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲି ଓ ପୂର୍ବତନ ପ୍ରଧାନମନ୍ତ୍ରୀ ତଥା ନେପାଳ ମାଓବାଦୀ ପାର୍ଟିର ମୁଖ୍ୟ ରୂଦ୍ରବାହାଲ ପ୍ରଚଣ୍ଡଙ୍କ ମଧ୍ୟରେ ବିବାଦ ଦେଖା ଦେଇଥିଲା । ଏହାକୁ ନେଇ ଗୋଟିଏ ଗୋଷ୍ଠୀ ବାରମ୍ବାର ଓଲିଙ୍କ ବିରୋଧରେ ରାଲି କରୁଥିଲେ ।