କଳାକାରଙ୍କ କଳିରେ ରାଜନେତାଙ୍କ ଏଣ୍ଟ୍ରି । ନରସିଂହ ମିଶ୍ରଙ୍କ ବୟାନକୁ ନାପସନ୍ଦ କଲେ ଶ୍ରୀତମ ଓ କୁନା ତ୍ରିପାଠୀ

କନକ ବ୍ୟୁରୋ : କଳାକାରଙ୍କ କଳି ଭିତରେ ବରିଷ୍ଠ ବିଧାୟକ ନରସିଂହ ମିଶ୍ରଙ୍କ ମନ୍ତବ୍ୟ ବିବାଦକୁ ଆହୁରି ଜଟିଳ କରିଦେଇଛି । ସମାଧାନ ବଦଳରେ ପ୍ରସଙ୍ଗ ଆହୁରି ବିବାଦୀୟ ହୋଇପଡିଛି । ଓଲିଉଡ୍ ବିବାଦ ଭିନ୍ନ ରୂପ ନେଇଛି । ବିଭିନ୍ନ ସ୍ଥାନରେ ମନୋଜଙ୍କ ସପକ୍ଷରେ ସ୍ୱର ଉଠିଛି ।

ଅଭିନେତା ମନୋଜ ମିଶ୍ରଙ୍କୁ ସମର୍ଥନ କରି ପଶ୍ଚିମ ଓଡିଶାର ବିଭିନ୍ନ ସ୍ଥାନରେ ଅଭିନେତା ଅନୁଭବ ମହାନ୍ତିଙ୍କ କୁଶପୁତଳିକା ଦାହ କରାଯାଇଛି । ସକାଳେ ବଲାଙ୍ଗୀରରରେ ପ୍ରତିବାଦ କରାଯାଇଥିବାବେଳେ ଅପରାହ୍ନରେ, ବରଗଡରେ ଅନୁଭବଙ୍କ କୁଶପୁତଳିକା ଦାହ କରାଯାଇଛି । ଆଉ ମନୋଜଙ୍କୁ ତୁରନ୍ତ କ୍ଷମା ମାଗିବା ସହ ତାଙ୍କ ଉପରୁ ବାସନ୍ଦକୁ ତୁରନ୍ତ ପ୍ରତ୍ୟାହାର କରନ୍ତୁ ବୋଲି ଦାବି କରିଛନ୍ତି ।

ଓଲିଉଡ୍ ବିବାଦରେ ରାଜନୀତି ପଶିବା ପରେ, ସାମନାକୁ ଆସିଛନ୍ତି କଳାକାର ସଂଘର ଜଣଙ୍କ ପରେ ଜଣେ ସଦସ୍ୟ । ଏହି ପ୍ରସଙ୍ଗରେ କେହି ମୁଣ୍ଡ ନପୁରାଇବାକୁ ପରାମର୍ଶ ଦେଇଛନ୍ତି । କହିଛନ୍ତି, ଏହା ସେମାନଙ୍କ ପରିବାର କଥା ଓ ଆପୋଷ ଆଲୋଚନା ମାଧ୍ୟମରେ ଏହାର ସମାଧାନ ହୋଇଯିବ ।

କଳାକାର ସଂଘ ସାମନାକୁ ଆସିବା ପରେ ବି ବିବାଦ ଥମି ନାହିଁ । ପୁଣି ସାମ୍ବାଦିକ ସମ୍ମଳନୀ କରିଛନ୍ତି ମନୋଜ ମିଶ୍ର । ଆଉ ସବୁ ଦୋଷ ଟୁଟୁ ନାୟକଙ୍କୁ ଦେଇଛନ୍ତିି । କହିଛନ୍ତି, ସେ ଟୁଟୁ ନାୟକଙ୍କୁ ବ୍ୟାନ କରୁଛନ୍ତି, ତାଙ୍କ ଫିଲ୍ମରେ ସେ କେବେ କାମ କରିବେ ନାହିଁ । ଏଥିସହ ତାଙ୍କୁ ବ୍ୟାନ୍ କରିବାକୁ ଟୁଟୁ ନାୟକ କିଏ ବୋଲି ପାଲଟା ପ୍ରଶ୍ନ କରିଛନ୍ତି ମନୋଜ । ବ୍ୟାନ୍ ନେଇ ତାଙ୍କୁ କୌଣସି ଚିଠି ଆସିନଥିବା ପୁଣିଥରେ ଦୋହରାଇଛନ୍ତିି । ଏପରିକି ତାଙ୍କ ଜୀବନ ପ୍ରତି ବିପଦ ଥିବା କହିଛନ୍ତି ।

ଗତକାଲି ଅଭିନେତା ମନୋଜ ମିଶ୍ରଙ୍କ ସପକ୍ଷରେ ବାହାରିଥିଲେ ବଲାଙ୍ଗୀର ବିଧାୟକ ନରସିଂହ ମିଶ୍ର । ଆଗଲପୁରଠାରେ ଆୟୋଜିତ ଛେଲିଆପାଟ ମହୋତ୍ସବରେ ଯୋଗଦେଇ ମନୋଜ ମିଶ୍ରଙ୍କୁ କରାଯାଇଥିବା ୨ ବର୍ଷର ବାସନ୍ଦକୁ ସେ ନିନ୍ଦା କରିଥିଲେ । ଯଦି ବାସନ୍ଦ ନଉଠିବ, ଓଡ଼ିଶା ଭାଗ ଭାଗ ହୋଇଯିବ ବୋଲି କହିଥିଲେ । ଆଜି କଥାକୁ ପୁଣି ସେହି କଥାକୁ ଦୋହରାଇଛନ୍ତି ।