କନକ ବ୍ୟୁରୋ: ଅନୁଭବ, ସିଦ୍ଧାନ୍ତ, ଅରିନ୍ଦମ । ଓଡିଆ ଫିଲ୍ମ ଜଗତର ଏହି ତିନି ସୁପରଷ୍ଟାର ଦୀର୍ଘଦିନରୁ ରାଜ୍ୟ ରାଜନୀତି ସହ ଜଡିତ । ୨୦୧୯ରେ କେନ୍ଦ୍ରାପଡାରୁ ବିଜେଡି ଟିକେଟରେ ଲୋକସଭାକୁ ନିର୍ବାଚିତ ହୋଇଥିଲେ ଅନୁଭବ ମହାନ୍ତି । ସେହି ବିଜେଡି ଟିକେଟରେ ୨୦୦୯ରୁ ୨୦୧୯ ଯାଏଁ ବ୍ରହ୍ମପୁରରୁ ଲୋକସଭା ସାଂସଦ ଥିଲେ ସିଦ୍ଧାନ୍ତ ମହାପାତ୍ର । ତେବେ ବିଜେଡିରେ ଦୀର୍ଘଦିନ ସକ୍ରିୟ ରହିବା ପରେ ଅବହେଳା ଅଭିଯୋଗ କରି ଏବେ ବିଜେପି ଶିବିରରେ ଯୋଗ ଦେଇଛନ୍ତି ଅରିନ୍ଦମ ରାୟ ।
Kanak News is now on WhatsApp
Join and get latest news updates delivered to you via WhatsApp
୨୦୦୯ରେ ଗଞ୍ଜାମ ରାଜନୀତିରେ ହଠାତ୍ ଆବିର୍ଭାବ ହୋଇଥିବା ମୁନା ଭାଇ ହେଭିୱେଟ ନେତା ଚନ୍ଦ୍ରଶେଖର ସାହୁଙ୍କୁ ପରାଜିତ କରିଥିଲେ । ହେଲେ ଚନ୍ଦ୍ରଶେଖର ସାହୁ ବିଜେଡିକୁ ଆସୁଆସୁ ଅଲୋଡା ହୋଇଗଲେ ସିଦ୍ଧାନ୍ତ ମହାପାତ୍ର । ସେବେଠାରୁ କୌଣସି ଦଳୀୟ କାର୍ଯ୍ୟକ୍ରମରେ ଆଉ ପ୍ରାୟତଃ ଦେଖାଯାଉନଥିଲେ ସିଦ୍ଧାନ୍ତ ମହାପାତ୍ର । କିଛିଦିନ ତଳେ ଅଚାନକ ସିଦ୍ଧାନ୍ତ ଗୋପାଳପୁରରେ ସକ୍ରିୟ ହୋଇଥିବାରୁ ତାଙ୍କ କମବ୍ୟାକ ନେଇ ଚର୍ଚ୍ଚା ଆରମ୍ଭ ହୋଇଥିଲା । ହେଲେ ଏବେ ଆଉ ସେଭଳି ଦେଖିବାକୁ ମିଳୁନାହିଁ ।
ନିର୍ବାଚନ ତାରଖ ଘୋଷଣା ହେବା ପରେ ସୋମବାର ନବୀନ ନିବାସରେ ପୁରୀ ଓ କେନ୍ଦ୍ରାପଡା ଲୋକସଭା କ୍ଷେତ୍ରର ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ । ହେଲେ ଚର୍ଚ୍ଚା ହେଉଛି କେନ୍ଦ୍ରାପଡା ସଂସଦୀୟ କ୍ଷେତ୍ରକୁ ନେଇ ରଣନୀତି ପ୍ରସ୍ତୁତିବେଳେ ନାହାନ୍ତି ସାଂସଦ ଅନୁଭବ ମହାନ୍ତି । ପାରିବାରିକ ବିବାଦରେ ଫସିବା ପରେ ଉଭୟ ଦଳ ଓ ଦଳର ଶୀର୍ଷ ନେତୃତ୍ୱଙ୍କଠାରୁ ଅନୁଭବଙ୍କ ଦୂରତା ବଢିଯାଇଛି ।
ଅନ୍ୟପଟେ ଅରିନ୍ଦମ ୨୦୦୯ରେ ବିଜେଡିରେ ସାମିଲ ହୋଇଥିଲେ । କିନ୍ତୁ ତାଙ୍କ କାର୍ଯ୍ୟକୁ ସ୍ୱୀକୃତି ଦିଆଯାଇନଥିବା ଅଭିଯୋଗ କରି ସେ ପଦ୍ମ ଦଳରେ ସାମିଲ ହୋଇଛନ୍ତି । କୁହାଯାଉଛି ବାରବାଟୀ-କଟକ ଆସନକୁ ଅରିନ୍ଦମ ଆଖେଇ ଥିବାବେଳେ, ବିଜେପି ଟିକେଟରେ କଟକ ମେୟର ଆସନ ପାଇଁ ଲଢେଇ କରିଥିବା ଶ୍ରୀତମ ଦାସ ତାଙ୍କ ବାଟରେ କଣ୍ଟା ହୋଇପାରନ୍ତି ।
ଖାଲି ସେତିକି ନୁହେଁ, ସିନେମା କଳିକୁ ନେଇ ଚର୍ଚ୍ଚାରେ ଥିବା ମନୋଜ ମିଶ୍ର କଂଗ୍ରେସ ହାତ ଧରିବା ପରେ ବଲାଙ୍ଗୀରରୁ ନିର୍ବାଚନ ଲଢିବା ନେଇ ଆଶାବାଦୀ ଅଛନ୍ତି, ହେଲେ ଦଳ ସେମିତି କିଛି ସଙ୍କେତ ଦେଇନାହିଁ । ସେପଟେ ଦିଗପହଣ୍ଡିରୁ ହେଭିୱେଟ ନେତା ସୂର୍ଯ୍ୟ ପାତ୍ରଙ୍କ ବିରୋଧରେ ଲଢିଥିବା ପିଙ୍କି ପ୍ରଧାନଙ୍କୁ ଦଳ ଆଉଥରେ ସୁଯୋଗ ଦେବ କି ନାହିଁ ସନ୍ଦେହ । ସେହିପରି ଓଏଫଡିସି ଦାୟିତ୍ୱରେ ଥିବା କୁନା ତ୍ରିପାଠୀଙ୍କ ରାଜନୀତିରେ ଏତେଟା ସକ୍ରିୟ ନାହାନ୍ତି । ପୂର୍ବତନ ରାଜ୍ୟସଭା ସାଂସଦ ପ୍ରଶାନ୍ତ ନନ୍ଦ ଓ ବର୍ତମାନର ରାଜ୍ୟସଭା ସାଂସଦ ମୁନ୍ନା ଖାନ ପ୍ରତ୍ୟକ୍ଷ ନିର୍ବାଚନୀ ରାଜନୀତିକୁ ଓହ୍ଲାଇବା ସମ୍ଭାବନା କମ୍ ।