କିଡନୀ ରୋଗରେ ଶଯ୍ୟାଶାୟୀ ଭେଣ୍ଡିଆ ପୁଅ, ସାହାଯ୍ୟ ପାଇଁ ଗୁହାରୀ କରୁଛନ୍ତି ବୃଦ୍ଧ ବାପା-ମାଆ
କନକ ବ୍ୟୁରୋ: ଯେଉଁ ବୟସରେ ଅର୍ଥ ରୋଜଗାର କରି ବୃଦ୍ଧ ପିତାମାତାଙ୍କର ସେବା କରିବା କଥା ସେହି ବୟସର ଯୁବକ ଏବେ ଶଯ୍ୟାଶାୟୀ ହୋଇ ବୃଦ୍ଧ ପିତାମାତାଙ୍କ ଠାରୁ ସେବା ପାଉଛନ୍ତି । କିଡ଼ନୀ ରୋଗ ଆଗରେ ମୁଣ୍ଡ ନୁଆଁଇଛନ୍ତି ୩୧ ବର୍ଷର ଯୁବକ । ଏପରି ହୃଦୟ ବିଦାରକ ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା କୋରେଇ ବ୍ଲକ ପଥରପଦା ଗ୍ରାମରେ ।
Kanak News is now on WhatsApp
Join and get latest news updates delivered to you via WhatsApp
ଭେଣ୍ଡିଆ ପୁଅକୁ ଯଦି ବୃଦ୍ଧ ବାପାଙ୍କ ସାହାରା ନେବାକୁ ପଡେ, ତେବେ ଏହାଠୁ ବଡ ଦୁଃଖ ଉଭୟ ବୃଦ୍ଧ ବାପା ଓ ପୁଅ ପାଇଁ କିଛି ନାହିଁ । ଯାଜପୁର ଜିଲ୍ଲା ପଥରଗଦା ଗାଁର ସୁରେନ୍ଦ୍ର ପୃଷ୍ଟିଙ୍କ ପୁଅ ରାଜୀବ ପୃଷ୍ଟିଙ୍କ କୀଡନି ଖରାପ ହେବା ପରଠୁ ଅଭାବୀ ପରିବାର ଉପରେ ଖସି ପଡିଛି ଦୁଃଖର ପାହାଡ । ବାହାଘର, ବ୍ରତଘରରେ ଭିଡ଼ିଓ ସୁଟିଂ କରି ପରିବାର ପ୍ରତିପୋଷଣ କରୁଥିଲେ ରାଜୀବ । ଏବେ ତାଙ୍କର ଦୁଇଟି କିଡନୀ ଖରାପ ହୋଇଯାଇଛି, ଆଉ ଚିକିତ୍ସାରେ ଅର୍ଥ ବାଧକ ସାଜିଛି । ଡାକ୍ତର କହୁଛନ୍ତି ଚିକିତ୍ସା ପାଇଁ ୧୮ରୁ ୨୦ ଲକ୍ଷ ଟଙ୍କା ଖର୍ଚ୍ଚ ହେବ । ଜମିବାଡ଼ି କିଛି ନାହିଁ, ଘରର ରୋଜଗାରିଆ ପୁଅ ଶଯ୍ୟାଶାୟୀ ହେବାରୁ ବାପାମାଆଙ୍କୁ ବୁଦ୍ଧିବାଟ ଦିଶୁ ନାହିଁ ।
ରାଜୀବଙ୍କ ଘରେ ଦୁଇଟି ଛୋଟ ଛୁଆ । କୀଡନି ଫେଲ ହୋଇଥିବା ଜାଣିବା ପରେ ହତାଶ ହୋଇପଡିଛନ୍ତି ପୁରା ପରିବାର । କୌଣସି ସହୃଦୟ ବ୍ୟକ୍ତି କିମ୍ବା ସରକାରୀ ସହାୟତା ମିଳିଲେ ରାଜୀବଙ୍କ ଚିକିତ୍ସା ହେବ ଓ ତାଙ୍କ ସଂସାର ପୁଣି ହସିବ ବୋଲି ଆଶା ରଖିଛନ୍ତି । ଏନେଇ କୋରେଇ ଅତିରିକ୍ତ ବ୍ଳକ ଉନ୍ନୟନ ଅଧିକାରୀଙ୍କୁ ଯୋଗାଯୋଗ କରିବାରୁ ସରକାରୀ ନିୟମ ଅନୁଯାୟୀ ସହାୟତା ଦେବାକୁ ପ୍ରତିଶ୍ରୁତି ଦେଇଛନ୍ତି ।