ଦିନ ଦିପହର ଖରାରେ ସ୍ତ୍ରୀକୁ ଧରି ଥାନାରେ ବୃଦ୍ଧ ! ବାଡିରେ ଥିବା ବାଉଁଶ କାଟିବାରୁ ବାପା ମା’ଙ୍କୁ ପିଟିଲା ପୁଅ ।
କନକ ବ୍ୟୁରୋ : ଦିନ ଦିପହରରେ ଉଦୁଉଦୁଆ ଖରାରେ ବୟସର ଅପରାହ୍ନରେ ନଇଁ ପଡିଥିବା କାନ୍ଧରେ ଜଣେ ବୃଦ୍ଧ ନିଜ ପତ୍ନୀଙ୍କୁ ବୋହିଥିଲେ । ଆଖିରେ ଆଖିଏ ଲୁହ, ଛାତିରେ ବାର୍ଧକ୍ୟର କୋହ । ଘରେ ଆରାମରେ ବସି ନାତି ନାତୁଣୀଙ୍କ ସହ ଖେଳିବା ବୟସରେ ଥାନାକୁ ଗୁହାରି ନେଇ ଆସିଥିଲେ । ଯେଉଁ ପୁଅକୁ ଦିନେ ବାପା ମା’ ଅତି ଆଦରର ସହ ଭଲପାଇବା ଦେଇ ଛୋଟରୁ ବଡ କରିଥିଲେ, ବଡ ହେବା ପରେ ସେହି ପୁଅ ବାପା ମା’ଙ୍କ ଉପରକୁ ହାତ ଉଠାଇବାକୁ ମଧ୍ୟ ପଛାଇନଥିଲା । ସମ୍ପର୍କ ଏବଂ ସଂସ୍କାର ଭୁଲି ସେହି ପୁଅ ହାତ ଉଠାଇ ମାରିଥିଲା । ଜନ୍ମ କଲା ପୁଅ ତାଙ୍କୁ ମାଡ ମାରିଥିବା ଅଭିଯୋଗ ନେଇ ଜୟପୁରର ସୋନୁ ହଳ ପତ୍ନୀ ଲଛମା ହଳକୁ ଧରି ଥାନାରେ ଅଭିଯୋଗ କରିବାକୁ ଆସିଥିଲେ । ବୃଦ୍ଧଙ୍କ କେବଳ ଏତିକି ଭୁଲ ଥିଲା ନିଜ ଘର ବାରିପଟେ ଥିବା ଗୋଟିଏ ବାଉଁଶ କାଟିଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଦୀର୍ଘ ବର୍ଷ ହେଲା ପୁଅ ବାପା ମା’ଙ୍କ ଠାରୁ ଅଲଗା ରହୁଥିବା ବେଳେ ବାଡିରେ ଥିବା ବାଉଁଶ କାଟିବାରୁ ଏହାକୁ ନେଇ ବାପା ମାଆଙ୍କୁ ହାତ ଉଠାଇଥିଲା ପୁଅ ସୁକ୍ରୁ । ପୁଅର ଏହି କାଣ୍ଡ ବୃଦ୍ଧ ଦମ୍ପତିକୁ ବେଶ୍ ବାଧିଥିଲା, ତେଣୁ ପୁଅ ବିରୋଧରେ ଫେରାଦ ହେବାକୁ ଥାନାରେ ପହଞ୍ଚିଥିଲେ । ପୁଅ ଦେଉଥିବା ନିର୍ଯାତନା ନେଇ ଗୋଟି ଗୋଟି କରି ସବୁ କଥା ବଖାଣିଥିଲେ । ପୋଲିସ ପୁଅ ସୁକ୍ରୁ ହଳଙ୍କୁ ଡାକିବା ସହ ଆପୋଷ ସମାଧାନ ପାଇଁ ଉଦ୍ୟମ କରିଥିବା ସୂଚନା ମିଳିଛି ।