କୃଷକ ମାନଙ୍କ ପାଇଁ ଖୁସି ଖବର ଆଣିଲେ କେନ୍ଦ୍ର ସରକାର । ଏବେ ଚାଷୀମାନଙ୍କୁ ମାଗଣାରେ ମିଳିବ ତୈଳ ଜାତୀୟ ଫସଲ ପାଇଁ ବିହନ । ଜାଣନ୍ତୁ କେମିତି ପାଇବେ ଆପଣ
କନକ ବ୍ୟୁରୋ : କରୋନା ମହାମାରୀ ମଧ୍ୟରେ ପେଟ୍ରୋଲ ଓ ଡିଜେଲ ସହିତ ଖାଇବା ତେଲର ଦାମ ଏବେ ଆକାଶ ଛୁଆଁ ହୋଇଛି । ଏହାକୁ ନଜରରେ ରଖି କେନ୍ଦ୍ର ସରକାର ସାଧାରଣ ଲୋକଙ୍କୁ ସହାୟତା ଦେବା ଲକ୍ଷରେ ଏକ ବଡ ଘୋଷଣା କରିଛନ୍ତି । କେନ୍ଦ୍ର ସରକାର ଚାଷୀଭାଇ ମାନଙ୍କୁ ତୈଳ ଜାତୀୟ ଫସଲର ବିହନ ମାଗଣାରେ ଯୋଗାଇବାକୁ ନିଷ୍ପତ୍ତି ନେଇଛନ୍ତି । କେନ୍ଦ୍ର ସରକାର ଆଶା କରିଛନ୍ତି କି ମାଗଣରେ ବିହନ ଯୋଗାଇ ଦିଆଗଲେ ଅଧିକ ଚାଷୀ ତୈଳବୀଜ ଫସଲ ଚାଷ କରିବେ । ଫଳରେ ଉତ୍ପାଦନ ବଢିଲେ ତେଲର ଦାମ କରିବ ବୋଲି ଆଶା କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏନେଇ କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ରସିଂ ତୋମାର ସୂଚନା ଦେଇ କହିଛନ୍ତି କି, ଦେଶରେ ପାଖାପାଖି ଏକ ତୃତୀୟାଂସ ଜିଲ୍ଲାରେ ଜୁଲାଇ ମାସରୁ ଖରିଫ୍ ଚାଷ ଆରମ୍ଭ ହେବ । ଏହି ସମୟରେ ତୈଳଜାତୀୟ ଫସଲ ପାଇଁ ମାଗଣାରେ ଉଚ୍ଚ ଗୁଣବତ୍ତା ବିହନ ଯୋଗାଇ ଦିଆଯିବ । ଜାତୀୟ ଗଣମାଧ୍ୟମର ସୂଚନା ମୁତାବକ ସରକାର ୮ ଲକ୍ଷ ସୋୟାବିନ ବିହନୀର ମିନି ପ୍ୟାକେଟ୍, ୭୪ ହଜାର ମୁଗଡାଲି ବିହନର ମିନି ପ୍ୟାକେଟ୍ ଯୋଗାଇଦେବେ ।
ସୂଚନା ଥାଉ କି, ଉପଭୋକ୍ତା ମାମଲା ମନ୍ତ୍ରଣାଳୟର ସୂଚନା ମୁତାବକ ଗୋଟିଏ ବର୍ଷରେ ଦେଶରେ ଖାଇବା ତେଲର ଦାମ ୬୦ ପ୍ରତିଶତ ବୃଦ୍ଧି ପାଇଛି । ଗତବର୍ଷ ଗୋଟିଏ ଲିଟର ସୋରିଶ ତେଲର ଦାମ ୧୨୦ ଟଙ୍କା ଥିବା ବେଳେ ଚଳିତ ବର୍ଷ ମେ ମାସ ସୁଦ୍ଧା ଏହାର ଦାମ ୧୭୦ ଟଙ୍କାରେ ପହଂଚିଛି । ଏହାସହ ସମସ୍ତ ପ୍ରକାର ଖାଇବା ତେଲର ଦାମ ବି ଅହେତୁକ ଭାବେ ବୃଦ୍ଧି ପାଇଛି ।
କହିରଖୁ କି ସରକାର ଚଳିତ ଜୁଲାଇ ମାସରୁ ଆରମ୍ଭ ହେବାକୁ ଯାଉଥିବା ଖରିଫ୍ ଚାଷରେ ୬.୩୭ ଲକ୍ଷ ହେକ୍ଟର ଜମିରେ ତୈଳବୀଜ ଫସଲ କରାଇବାକୁ ଯୋଜନା କରିଛନ୍ତି । ଏଥିରୁ ୧.୨ ଲକ୍ଷ କୁଇଣ୍ଟାଲ ତୈଳବୀଜ ଓ ୨୪.୩ ଲକ୍ଷ କୁଇଣ୍ଟାଲ ଖାଦ ତେଲ ଉତ୍ପାଦନ ହେବ ବୋଲି ଆଶା କରାଯାଇଛି ।
ଚାଷୀଭାଇମାନେ ସରକାରଙ୍କ ତରଫରୁ ମିଳିବାକୁ ଥିବା ମାଗଣା ତୈଳଜାତୀୟ ଫସଲର ବିହନ ଆପଣଙ୍କୁ ସ୍ଥାନୀୟ କୃଷି ସହାୟତା କେନ୍ଦ୍ର ମାଧ୍ୟମରେ ଯୋଗାଇ ଦିଆଯିବ । ଆପଣ ଆପଣଙ୍କ ଆଧାରକାର୍ଡ ଓ ଚାଷ ହେବାକୁ ଥିବା ଜମିର କାଗଜପତ୍ର ଦେଖାଇ ସେଠାରୁ ପାଇପାରିିବେ ।