ରାଜ୍ୟରେ ଲେଉଟିଲା ଲକଡାଉନ: ୪ ଜିଲ୍ଲା ଓ ରାଉରକେଲାରେ ଆଜି ରାତି ୯ଟାରୁ ଜୁଲାଇ ୩୧ ଯାଏଁ କଟକଣା; ତାଲାବନ୍ଦ କରି କରୋନା ସଂକ୍ରମଣକୁ ରୋକିଦେବାକୁ ଚାହୁଁଛନ୍ତି ସରକାର
ହେଲେ ଅଂଟା ସଳଖୁଥିବା ଲୋକଙ୍କ ଉପରେ ମାଡିଆସିଲାଣି ୧୪ ଦିନିଆ ସଂକଟ
କନକ ବ୍ୟୁରୋ: ପ୍ରଥମେ ପ୍ରାୟ ୭୦ ଦିନ ଧରି ଲକଡାଉନ୍ ରହିବା ପରେ ଅନଲକ୍ ପର୍ଯ୍ୟାୟ ଭିତରେ ପଶିଥିଲା ଓଡିଶା । ହେଲେ ବିଶେଷ କିଛି ଫଳ ମିଳିଲା ନାହିଁ । ଜୁନ୍ ମାସରେ ସଂକ୍ରମଣ ବଢିଲା ଏବଂ ଏବେ ଜୁଲାଇ ମାସରେ ହୁ ହୁ ହୋଇ ବଢିଲା କରୋନା । କିନ୍ତୁ ସରକାର ଆଉ କିଛି ବାଟ ନପାଇ ପୁଣି ଥରେ ସେହି କଠୋର ଲକଡାଉନ୍ ପର୍ଯ୍ୟାୟ ଭିତରେ ପଶିଯିବା ପାଇଁ ନିଷ୍ପତି ନେଇଛନ୍ତି । ଏବଂ ୪ଟି ଜିଲ୍ଲା ଓ ରାଉରକେଲା ମହାନଗର ନିଗମରେ ଆଜି ରାତି ୯ଟାରୁ ତାଲାବନ୍ଦ ଆରମ୍ଭ ହେବାକୁ ଯାଉଛି । ଭୁବନେଶ୍ୱର–କଟକ ପୁଲିସ କମିଶନର କହିଛନ୍ତି, ଏଥର ଲକ୍ଡାଉନ୍ ପୂର୍ବ ଭଳି ନୁହେଁ ବରଂ ଆହୁରି କଡାକଡି ହେବ ।
Kanak News is now on WhatsApp
Join and get latest news updates delivered to you via WhatsApp
ମହାମାରୀ କରୋନାର ସଂକ୍ରମଣ ରୋକିବାକୁ ମାର୍ଚ୍ଚ ୨୨ରୁ ମେ’ ୩୧ ଯାଏଁ ପ୍ରାୟ ୭୦ ଦିନ ଧରି ସାରା ରାଜ୍ୟରେ ଯେଉଁ କଠୋର ପଦକ୍ଷେପ ନେଇଥିଲେ ସରକାର, ପୁଣି ସେହି କଟକଣା ଫେରିଛି । ଯେଉଁ ଲକଡାଉନ ସମସ୍ତଙ୍କ ଅଂଟ ଭାଙ୍ଗି ଦେଇଥିଲା ସିଏ ପୁଣି ଫେରିଛି । ବିଶେଷ କରି ଜୁଲାଇ ଆରମ୍ଭରୁ କରୋନାର ସଂକ୍ରମଣ ଯେଭଳି ବ୍ୟାପକ ହୋଇଛି, ସେହି ଚେନକୁ ସରକାର ଭାଙ୍ଗିଦେବେ ବୋଲି ଭାବୁଛନ୍ତି । ସେଥିପାଇଁ ଆଜି ରାତି ୯ଟାରୁ ଗଞ୍ଜାମ, ଖୋର୍ଦ୍ଧା, କଟକ ଓ ଯାଜପୁର ସମେତ ସୁନ୍ଦରଗଡ ଜିଲ୍ଲାର ରାଉରକେଲା ପୌରପାଳିକାକୁ ଲକଡାଉନ ଘୋଷଣା କରାଯାଇଛି । ଏହି କ୍ଷେତ୍ରରୁ କେବଳ ୬୬ ପ୍ରତିଶତ ନୂଆ ସଂକ୍ରମଣ ମାମଲା ସାମ୍ନାକୁ ଆସୁଛି ।
କରୋନା ଆକ୍ରାନ୍ତଙ୍କ ସଂଖ୍ୟା ରାଜ୍ୟରେ ୧୬ ହଜାର ପାର କରିଥିବାବେଳେ କେବଳ ଗଂଜାମରେ ୫ ହଜାର ଟପି ସାରିଲାଣି । ସେହିପରି କରୋନା ମୃତ୍ୟୁ ସଂଖ୍ୟା ୮୩କୁ ଛୁଇଁଲାଣି । ହେଲେ ମହାମାରୀକୁ ନିୟନ୍ତ୍ରଣକୁ ଆଣିବାକୁ ହେଲେ ଲକଡାଉନ ସମୟରେ ସନ୍ଦିଗ୍ଧଙ୍କ ନମୂନା ପରୀକ୍ଷାକୁ ବ୍ୟାପକ କରି ସଂଗରୋଧରେ ରଖିବା ସହ ଚିକିତ୍ସା କରିବା ମଧ୍ୟ ଜରୁରୀ ବୋଲି ଚିକିତ୍ସିକଙ୍କ ମତ । ଲକଡାଉନରେ ଅତ୍ୟାବଶ୍ୟକ ସେବାକୁ କଟକଣାମୁକ୍ତ କରାଯାଇଛି ।
ଲକଡାଉନରେ କ’ଣ ଖେଲା ଓ କ’ଣ ବନ୍ଦ?
– ଗ୍ରୋସରୀ, ପରିବା ଓ କ୍ଷୀର ଦୋକାନ ନିର୍ଦ୍ଦିଷ୍ଟ ସମୟ ପାଇଁ ଖେଲା
– ସକାଳ ୬ରୁ ଦିନ ଗୋଟାଏ ଯାଏଁ ଖୋଲା ରହିବ ଏସବୁ ଦୋକାନ
– ଔଷଧ ଦୋକାନ ଓ ପେଟ୍ରୋଲ ଟାଙ୍କି ଖୋଲା ରହିବ
– ଲୋକଙ୍କ ଯାତାୟାତ ଉପରେ କଟକଣା ଲାଗିବ
– ପାଖ ଦୋକାନରୁ ଅତ୍ୟାବଶ୍ୟକ ସାମଗ୍ରୀ କିଣିବାକୁ କୁହାଯାଇଛି
– ଅଣ୍ଡା, ମାଛ ଓ ମାଂସର ହୋମ୍ ଡେଲିଭରି କରାଯିବ
– କୃଷି ଓ ମତ୍ସ୍ୟଚାଷ ପୂର୍ବଭଳି ଚାଲୁ ରହିବ
ସଂକ୍ରମଣ ରୋକିବାକୁ ସରକାରଙ୍କ ଏହି ସତର୍କତା, ଛୋଟ ଛୋଟ ବ୍ୟବସାୟୀଙ୍କୁ ଚିନ୍ତାରେ ପକାଇ ଦେଇଛି । କାରଣ ଜୀବିକା ଚାଲିଯିବାରୁ ଯନ୍ତ୍ରଣାରେ ଛଟପଟ ହେଉଥିବା ଏହି ବ୍ୟବସାୟୀମାନେ ଅଂଟା ସଳଖିଲା ବେଳକୁ ପୁଣି ମାଡି ଆସିଛି ୧୪ ଦିନିଆ ସଂକଟ । ଜୁଲାଇ ୩୧ ଯାଏଁ ୧୪ ଦିନିଆ ଲକଡାଉନକୁ ଭୁବନେଶ୍ୱର-କଟକ ଦୈତନଗରୀରେ କଡାକଡି କରାଯିବ ବୋଲି କହିସାରିଛନ୍ତି ପୋଲିସ କମିଶନର । ଜରୁରୀ କାମ ନଥିଲେ କେହି ବାହାରକୁ ନବାହାରିବାକୁ ତାଗିଦ କରାଯାଇଛି । ସପ୍ତାହର ଶେଷ ଦୁଇ ଦିନ ଶନିବାର ଓ ରବିବାର ସଟଡାଉନକୁ ଏହି ୪ ଜିଲ୍ଲା ଓ ରାଉରକେଲା ମୁନିସିପାଲିଟିରୁ ହଟାଇ ଦିଆଯାଇଛି । ସେହିଦିନରେ ଲକଡାଉନର ନୂଆ ନିୟମ ରହିବ । କିନ୍ତୁ ସବୁଠାର ବଡ ପ୍ରଶ୍ନ ହେଉଛି ପୂର୍ବର ପ୍ରାୟ ୭୦ ଦିନର ଲକଡାଉନ ଯଦି ସଫଳ ହେଲାନାହିଁ, ତେବେ ଏହି ଲକଡାଉନ କେତେ କାମ କରିବ?