କନକ ବ୍ୟୁରୋ : କଟକ ବଡ ମେଡିକାଲରେ ରାତିଅଧରେ ହେଲା ଦୁଷ୍ମନ୍ତଙ୍କ ପୋଷ୍ଟମର୍ଟମ ଓ ଏହାପରେ ପୁରୀ ସ୍ୱର୍ଗଦ୍ୱାରରେ ହୋଇଛି ଅନ୍ତିମ ସଂସ୍କାର । ତେବେ ରାତିରେ ମୃତଦେହ ବ୍ୟବଚ୍ଛେଦ କରିବା ନିୟମ ନାହିଁ । ତେଣୁ ଦୁଷ୍ମନ୍ତଙ୍କ ମୃତଦେହ କେମିତି ରାତି ଅଧିଆ ପୋଷ୍ଟମର୍ଟମ କରାଗଲା, ଏହା ପଛର କାରଣ କଣ । କାହିଁକି ସକାଳ ଯାଏଁ ଅପେକ୍ଷା କରାଗଲା ନାହିଁ,ତରବରିଆ ଭାବେ ପୋଷ୍ଟମର୍ଟମ କରିବା ପଛର କାରଣ କଣ । ରାତି ଅଧରେ ମୃତଦେହ ବ୍ୟବଚ୍ଛେଦ କରିବା ପରେ ଦୁଷ୍ମନ୍ତଙ୍କ ମୃତ୍ୟୁକୁ ନେଇ ଜନସାଧାରଣରେ ସନ୍ଦେହ ଦେଖା ଦେଇଛି ।
Kanak News is now on WhatsApp
Join and get latest news updates delivered to you via WhatsApp
କଟକ ବଡ଼ ମେଡିକାଲରେ ତ୍ରୁଟିପୂର୍ଣ୍ଣ ଚିକିତ୍ସା ଅଭିଯୋଗ ଆଣି ଦୁଷ୍ମନ୍ତ ଗତକାଲି ବିଧାନସଭା ଆଗରେ ହାତ କାଟିବା ସହ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ । ପରେ ତାଙ୍କୁ ଏସସିବିକୁ ସ୍ଥାନାନ୍ତରିତ କରାଯାଇଥିଲା । ସେଠାରେ ତାଙ୍କର ମୃତ୍ୟୁ ହୋଇଥିଲା । ଦୁଷ୍ମନ୍ତଙ୍କ ତ୍ରୁଟିପୂର୍ଣ୍ଣ ଅସ୍ତ୍ରୋପଚାର ଅଭିଯୋଗ ପରେ ଘଟଣାର ତଦନ୍ତ ହେବ ବୋଲି ଏସସିବି ପକ୍ଷରୁ କୁହାଯାଇଛି ।
ସୂଚନା ଅନୁସାରେ ଜଗତସିଂହପୁର ଜିଲ୍ଲା କୁଜଙ୍କ ପଙ୍କପାଳ ଅଞ୍ଚଳର ଦୁଷ୍ମନ୍ତ ଦାସ ଗତବର୍ଷ ମାର୍ଚ୍ଚ ଏକ ସଡ଼କ ଦୁର୍ଘଟଣାର ସମ୍ମୁଖୀନ ହୋଇଥିଲେ । ଘରକୁ ଫେରୁଥିବା ବେଳେ ପିକଅପ୍ ଭ୍ୟାନ୍ ଧକ୍କାରେ ତାଙ୍କ ବାମ ଗୋଡ଼ରେ ଗଭୀର ଆଘାତ ଲାଗିଥିଲା । ପ୍ରଥମେ ତାଙ୍କୁ ଜଗତସିଂହପୁର ମେଡିକାଲ ଓ ପରେ ଏସସିବିରେ ଭର୍ତ୍ତି କରାଯାଇଥିଲା । ଗତବର୍ଷ ମାର୍ଚ୍ଚ ୨୨ରେ ଏସସିବିରେ ପ୍ଲାଷ୍ଟିକ ସର୍ଜରୀ ବିଭାଗରେ ତାଙ୍କର ଅସ୍ତ୍ରୋପଚାର ହୋଇଥିଲା ।
ସେହିପରି ଗତବର୍ଷ ଜୁନରେ ପୁଣି ଥରେ ତାଙ୍କର ଅସ୍ତ୍ରୋପଚାର କରାଯାଇଥିଲା । ପରେ ଡାକ୍ତର ଭଲ ହୋଇଯିବ କହି ଏସସିବିରୁ ଡିସଚାର୍ଜ କରାଇଥିଲେ । ହେଲେ ସେ ଘରକୁ ଆସିବା ପରେ ଦୀର୍ଘଦିନ ପରେ ବି ଗୋଡ଼ରୁ ଯନ୍ତ୍ରଣା କମି ନଥିଲା । ବାମ ଗୋଡ଼ ସଠିକ ଭାବେ କାମ ନକରିବାରୁୁ ଚାଲିବା ବି ତାଂକ ପକ୍ଷେ କଷ୍ଟକର ହୋଇପଡ଼ିଥିଲା । ତେବେ ଏନେଇ ସେ ପରେ ଅନ୍ୟ ଡାକ୍ତରଙ୍କୁ ଯୋଗାଯୋଗ କରିଥିଲେ । ଆଉ ଏହାପରେ ଏସସିବିରେ ତାଙ୍କର ତ୍ରୁଟିପୂର୍ଣ୍ଣ ଅସ୍ତ୍ରୋପଚାର ହୋଇଥିବା ଦୁଷ୍ମନ୍ତ ଅଭିଯୋଗ କରିଆସୁଥିଲେ ।