ଦକ୍ଷତା ବିକାଶ ପ୍ରତିଯୋଗିତାରେ କୀର୍ତ୍ତିମାନ ସ୍ଥାପନ କଲା ଓଡ଼ିଶା । ଇଣ୍ଡିଆ ସ୍କିଲ୍ ୨୦୨୨ ପ୍ରତିଯୋଗିତାରେ ମିଳିଲା ୫୧ଟି ପଦକ ।
କନକ ବ୍ୟୁରୋ : ଦକ୍ଷତା ବିକାଶ ପ୍ରତିଯୋଗିତାରେ ପୁଣି ଥରେ କୀର୍ତ୍ତିମାନ ସ୍ଥାପନ କରି ଓଡ଼ିଶା ଫେରିଛନ୍ତି ଦକ୍ଷ ପ୍ରତିଯୋଗୀ । ନିକଟରେ ଶେଷ ହୋଇଥିବା ଇଣ୍ଡିଆ ସ୍କିଲ ପ୍ରତିଯୋଗିତାରେ ଓଡ଼ିଶା ସର୍ବାଧିକ ପଦକ ହାସଲ କରିବାରେ ସଫଳ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ନୂଆଦିଲ୍ଲୀରେ ଆୟୋଜିତ ଇଣ୍ଡିଆ ସ୍କିଲ୍ ୨୦୨୨ ପ୍ରତିଯୋଗିତାର ବିଭିନ୍ନ ବିଭାଗରେ ଓଡ଼ିଶାକୁ ୧୦ଟି ସ୍ୱର୍ଣ୍ଣପଦକ ମିଳିଥିବା ବେଳେ ୧୮ଟି ରୌପ୍ୟ, ୯ଟି କାଂସ୍ୟ ଏବଂ ୧୪ଟି ମେଡାଲିୟନ୍ ଅଫ୍ ଏକ୍ସଲେନ୍ସ ସହ ସର୍ବମୋଟ୍ ୫୧ଟି ପଦକ ମିଳିଛି ।
ରୋବୋଟିକ୍ସକୁ ନେଇ ପ୍ରଥମ ଥର ଏହି ପ୍ରତିଯୋଗିତାକୁ ଯାଇଥିବା ବେଳେ ସଫଳତାର ସହ ରୌପ୍ୟ ପଦକ ହାସଲ କରିଛି ଓଡ଼ିଶା । ସେହିପରି ବିୟୁଟି ଥେରାପି ଭଳି ଇଭେଣ୍ଟରେ ମଧ୍ୟ ଓଡ଼ିଶାକୁ ମିଳିଛି ସଫଳତା । ମେଟ୍ରୋ ସିଟି ଭଳି ସ୍ଥାନରୁ ଆସିଥିବା ପ୍ରତିଯୋଗୀଙ୍କୁ ପଛରେ ପକାଇ ଓଡ଼ିଶା ପାଇଁ ରୌପ୍ୟ ଜିତିଛନ୍ତି ରୋଜାଲିନ୍ ।
ଏହି ପ୍ରତିଯୋଗିତା ପାଇଁ ଓଡ଼ିଶାରୁ ୭୬ଜଣ ପ୍ରତିଯୋଗୀ ଭାଗ ନେଇଥିଲେ । ତେବେ ସ୍ୱର୍ଣ୍ଣପଦକ ବିଜେତାଙ୍କୁ ୧ ଲକ୍ଷ, ରୌପ୍ୟପଦକ ବିଜେତାଙ୍କୁ ୭୫ ହଜାର ଏବଂ କାଂସ୍ୟ ପଦକ ବିଜେତାଙ୍କୁ ୫୦ ହଜାର ଟଙ୍କା ପୁରସ୍କାର ମିଳିଛି । ଓଡ଼ିଶା ୧୦ଟି ସ୍ୱର୍ଣ୍ଣପଦକ ସହ ଏହି ବିଜେତାମାନେ ଆସନ୍ତା ଅକ୍ଟୋବରରେ ଚୀନର ସାଂଘାଇରେ ଅନୁଷ୍ଠିତ ହେବାକୁ ଥିବା ବିଶ୍ୱଦକ୍ଷତା ପ୍ରତିଯୋଗିତାରେ ଅଂଶଗ୍ରହଣ କରିବେ ।