ସାରା ରାଜ୍ୟରେ ତାଲାବନ୍ଦର ଚିତ୍ର: ୨୧ ଦିନିଆ ତାଲାବନ୍ଦ ଭିତରେ ଶୂନଶାନ ହୋଇଗଲା ପ୍ରମୁଖ ରାସ୍ତା, ନାକାବନ୍ଦି କରି ଚେକିଂକୁ ଜୋରଦାର କଲା ପୁଲିସ ହେଲେ ହାଟ, ବଜାରରେ ଜମିଲା ଲୋକଙ୍କ ଭିଡ ।
କନକ ବ୍ୟୁରୋ: ସାରା ଦେଶରେ ତାଲା ବନ୍ଦ ଘୋଷଣାର ଆଜି ଥିଲା ପ୍ରଥମ ଦିନ । ରାସ୍ତା ଶୂନଶାନ ଥିବା ବେଳେ ବଜାରରେ ଦେଖିବାକୁ ମିଳିଥିଲା ଭିଡ । ସାମାଜିକ ଦୂରତା ବଢାଇବା ଓ କୌଣସି ସ୍ଥାନରେ ୭ରୁ ଅଧିକ ଲୋକ ଏକାଠି ହେବା ଉପରେ କଟକଣା ରହିଛି । ହେଲେ ଏହି କଟକଣାକୁ ଫୁ କରି ଉଡାଇ ଦେଇଛନ୍ତି ଲୋକେ । ଯାହା କରୋନା ମୁକାବିଲାର ମହତ ଉଦ୍ଦେଶ୍ୟକୁ ବିପଦରେ ପକାଇଛି । ଅନ୍ୟପଟେ ଖାଦ୍ୟ ସାମଗ୍ରୀ ଯୋଗାଇବାକୁ ଟ୍ରଲି ଓ ମାଲବାହୀ ଗାଡି ନିରବଚ୍ଛିନ୍ନ ଭାବେ ଯାତାୟତ କରିବ ବୋଲି ସୂଚନା ଦେଇଛନ୍ତି ରାଜ୍ୟ ସରକାର ।
Kanak News is now on WhatsApp
Join and get latest news updates delivered to you via WhatsApp
କରୋନା ମୁକାବିଲା ପାଇଁ ୨୧ ଦିନିଆ ତାଲାବନ୍ଦର ପ୍ରଥମ ଦିନର ଚିତ୍ର ଆପଣଙ୍କୁ ଚିନ୍ତାରେ ପକାଇ ଦେବ ରାଜଧାନୀ ରାଜରାସ୍ତାର ଦୃଶ୍ୟ । ଖାଲି ରାସ୍ତା ଓ ପୁଲିସର ପହରା । ଭୁବନେଶ୍ୱରର ବିଭିନ୍ନ ରାସ୍ତାରେ ସମାନ ଦୃଶ୍ୟ ଦେଖିବାକୁ ମିଳିଛି । ତେବେ ରାସନ ସାମଗ୍ରୀ ଦୋକାନ ଆଗରେ ଭିଡି ଦେଖିବାକୁ ମିଳିଛି । ସେପଟେ କଟକରେ ତାଲାବନ୍ଦ କଟକଣାକୁ ଫୁ କରି ଉଡାଇ ଦେଇଛନ୍ତି ଜନତା । ସକାଳୁ ବଜାରରେ ଲୋକ ଗହଳି ଜମିଥିଲା । ସଂଖ୍ୟାଧିକ ଲୋକ ରୁଣ୍ଡ ହୋଇ ସଉଜା କିଣି ଘରକୁ ଫେରିଛନ୍ତି । ସେପଟେ ରାଜରାସ୍ତାରେ ଦେଖିବାକୁ ମିଳିଥିଲା ଠିକ୍ ଓଲଟା ଚିତ୍ର । ରାସ୍ତା ପ୍ରାୟ ନିର୍ଜନ ଥିଲା ।
ମୟୂରଭଂଜର ଉଦଳା ସହରର ପରିବା ବଜାର, ମାଲକାନଗିରି ସହରର ସାପ୍ତାହିକ ହାଟ ଓ ଯାଜପୁରର ବଜାରରେ ମଧ୍ୟ ଦେଖିବାକୁ ମିଳିଛି ସମାନ ଦୃଶ୍ୟ । ରାସ୍ତାଘାଟ ଶୂନଶାନ ପଡିଥିବା ବେଳେ ବଜାରକୁ ଶହ ଶହ ଲୋକ ଆସି ସଉଦା କିଣା କିଣି କରିଥିଲେ । କରୋନା ପାଇଁ କୌଣସି ସ୍ଥାନରେ ୭ରୁ ଅଧିକ ଲୋକଙ୍କ ଭିଡ ନହେବା ପାଇଁ କଟକଣା ଜାରି ହୋଇଛି । ହେଲେ ବଜାରର ଦୃଶ୍ୟ ଦେଖିଲେ ଏହାକୁ କେହି ଖାତିର କରିନଥିବା ମନେହେଉଛି ।
ସେପଟେ ବଜାରରେ ଗହଳି ଓ ରାସ୍ତାଘାଟରେ ବୁଲାବୁଲିକୁ ନେଇ ପ୍ରତିକ୍ରିୟା ରଖିଛନ୍ତି ଡିଏମଇଟି ସିବିକେ ମହାନ୍ତି । ସେ କହିଛନ୍ତି, ଲୋକେ ଜାଣି ମଧ୍ୟ ସଚେତନ ହେଉ ନାହାନ୍ତି । ଆମେ ପାରୁ ପର୍ଯ୍ୟନ୍ତ ଚେଷ୍ଟା କରୁଛୁ ଓ ଏଥିରେ ସମର୍ଥ ହେବୁ ବୋଲି ସେ ଆଶା ପ୍ରକାଶ କରିଛନ୍ତି । କରୋନା ମୁକାବିଲା ନେଇ ସାମାଜିକ ଦୂରତା ବଜାୟ ରଖିବାକୁ ସଚେତନତା କରାଯାଉଛି । ତେବେ ବଜାରରେ ସଂଖ୍ୟାଧିକ ଲୋକଙ୍କ ଗହଳି କରୋନା ମୁକାବିଲାରେ ବାଧା ସୃଷ୍ଟି କରିବ ଏଥିରେ ସନ୍ଦେହ ନାହିଁ ।