କନକ ବ୍ୟୁରୋ : ୧୮ ବର୍ଷରୁ ଅଧିକ ବୟସ୍କଙ୍କ ମଧ୍ୟରୁ ପ୍ରାୟ ଅଧିକାଂଶ ଲୋକ ଟିକାର ଅତିକମରେ ଗୋଟିଏ ଡୋଜ୍ ନେଇସାରିଥିବାରୁ, ପିଲାମାନଙ୍କ ପାଇଁ ଚିନ୍ତା ବଢ଼ୁଥିଲା । ଏତିକିବେଳେ ୧୫ ବର୍ଷରୁ ୧୮ ବର୍ଷ ବୟସ୍କଙ୍କ ପାଇଁ ଟିକା ଦେବାକୁ ପ୍ରଧାନମନ୍ତ୍ରୀ ଘୋଷଣା କରିବା ପରେ କିଛିଟା ଆଶ୍ୱସ୍ତି ମିଳିଛି । ଏବଂ ପ୍ରସ୍ତୁତି ଆରମ୍ଭ କରିଦେଇଛନ୍ତି ରାଜ୍ୟ ସରକାର । ସେହିପରି ବୁଷ୍ଟର ଡୋଜ୍ ଦେବାକୁ ମଧ୍ୟ ପ୍ରସ୍ତୁତ ଥିବା କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ।
Kanak News is now on WhatsApp
Join and get latest news updates delivered to you via WhatsApp
୧୫ ବର୍ଷରୁ ୧୮ ବର୍ଷ ବୟସ୍କଙ୍କୁ ଟିକା ଦିଆଯିବା ନେଇ ପ୍ରଧାନମନ୍ତ୍ରୀଙ୍କ ଘୋଷଣା ପରେ ରାଜ୍ୟରେ ଟିକା ପାଇଁ ଅପେକ୍ଷା କରିଥିବା ପିଲାଙ୍କ ମଧ୍ୟରୁ ପ୍ରାୟ ୨୫ଲକ୍ଷ ପିଲା ଉପକୃତ ହେବେ । ଏଥିପାଇଁ ରାଜ୍ୟ ସରକାର ପ୍ରସ୍ତୁତି ଆରମ୍ଭ କରି ଦେଇଛନ୍ତି । ଅପେକ୍ଷା କରିଥିବା ପିଲାମାନଙ୍କୁ କିଭଳି ତୁରନ୍ତ ଟିକା ଦିଆଯିବ ସେଥିପାଇଁ ଅଧିକରୁ ଅଧିକ ସେସନ ସାଇଟର ବ୍ୟବସ୍ଥା କରିବାକୁ ଯୋଜନା କରିଛନ୍ତି । ଟିକାକରଣ ପାଇଁ ସ୍ୱାସ୍ଥ୍ୟକର୍ମୀଙ୍କ ଟିମକୁ ପ୍ରସ୍ତୁତ କରି ରଖାଯାଇଛି । ଏଥିସହ ପିଲାମାନେ ସ୍କୁଲ ଓ କଲେଜ ଯାଉଥିବାରୁ ସେଠାରେ ମଧ୍ୟ ଟିକା ଦେବାର ବ୍ୟବସ୍ଥା କରୁଛନ୍ତି ସରକାର ।
ତୃତୀୟ ଡୋଜ୍ ଦେବାକୁ ପ୍ରସ୍ତୁତି ଆରମ୍ଭ । ସ୍ୱାସ୍ଥ୍ୟକର୍ମୀ ଓ ସମ୍ମୁଖ ଯୋଦ୍ଧାଙ୍କୁ ଦିଆଯିବ ବୁଷ୍ଟର ଡୋଜ୍ । କରୋନାର ମୁକାବିଲାରେ ପ୍ରମୁଖ ଭୂମିକା ତୁଲାଇ ଆସିଛନ୍ତି ଡାକ୍ତର ଓ ସ୍ୱାସ୍ଥ୍ୟ କର୍ମୀ । ତେଣୁ ପ୍ରଧାନମନ୍ତ୍ରୀଙ୍କ ଘୋଷଣା ପରେ ରାଜ୍ୟରେ ଥିବା ପ୍ରାୟ ୩ ଲକ୍ଷରୁ ଅଧିକ ସ୍ୱାସ୍ଥ୍ୟକର୍ମୀ, ସାଢ଼େ ୩ଲକ୍ଷ ସମ୍ମୁଖ ଯୋଦ୍ଧା ଉପକୃତ ହେବେ । ସେମାନଙ୍କୁ କିଭଳି ବୁଷ୍ଟର ଡୋଜ୍ ଦିଆଯିବ ସେଥିପାଇଁ ପ୍ରକ୍ରିୟା ଆରମ୍ଭ କରିଛନ୍ତି ରାଜ୍ୟ ସରକାର । ସେହିପରି ରାଜ୍ୟରେ ୫୪ ଲକ୍ଷରୁ ଅଧିକ ୬୦ ବର୍ଷରୁ ଅଧିକ ବୟସ୍କ ରହିଛନ୍ତି । ସେମାନଙ୍କ ମଧ୍ୟରୁ ଯେଉଁମାନେ ଜଟିଳ ରୋଗରେ ପୀଡିତ ସେମାନଙ୍କୁ ଚିହ୍ନଟ କରି କିଭଳି ବୁଷ୍ଟର ଡୋଜ୍ ଦିଆଯିବ ସେଥିପାଇଁ କାର୍ଯ୍ୟକ୍ରମ ଆରମ୍ଭ କରିଛନ୍ତି ରାଜ୍ୟ ସରକାର ।
ବିଶେଷଜ୍ଞଙ୍କର କହିବା କଥା ୫ ବର୍ଷରୁ ଅଧିକ ବୟସର ପିଲାଙ୍କୁ ମଧ୍ୟ ଟିକା ଦିଆଯିବା ଉଚିତ । ଯେତେବେଳେ କରୋନାର ବିଭିନ୍ନ ଭାରିଆଣ୍ଟ ଚିହ୍ନଟ ହେଉଛି, ଅନେକ ଆକ୍ରାନ୍ତ ହେଉଛନ୍ତି, ସେତେବେଳେ ବିଳମ୍ବ ନକରି ଛୋଟ ପିଲାଙ୍କୁ ଟିକା ଦିଆଯିବା ଆବଶ୍ୟକ ବୋଲି ଏକ ଯୁକ୍ତି ଉଠିଛି । କାରଣ ବିଳମ୍ବ କଲେ ସ୍ଥିତି ଜଟିଳ ହୋଇପାରେ । ତେଣୁ ଛୋଟପିଲାଙ୍କୁ ମଧ୍ୟ ଟିକା ଦିଆଯିବା ଦରକାର ବୋଲି ମତ ପ୍ରକାଶ ପାଇଛି ।