କରୋନାର ଦ୍ୱିତୀୟ ଲହରକୁ ନେଇ ଏବେ ଚାରିଆଡେ ଭୟ । ଏହାରି ଭିିତରେ ଜାଣନ୍ତୁ, ଟିକାକରଣରେ ଓଡିଶାର ସ୍ଥାନ କେତେ?
କନକ ବ୍ୟୁରୋ: କୋଭିଡ ସହିତ ଚାଲିଥିବା ଲଢେଇ ଭିତରେ ଏବେ ସବୁଠାରୁ ବଡ ଚ୍ୟାଲେଂଜ ପାଲଟିଛି ଟିକାକରଣ । ଆଉ ଏହି ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ରାଜ୍ୟ ସରକାର ପାରୁ ପର୍ଯ୍ୟନ୍ତ ଚେଷ୍ଟା କରୁଛନ୍ତି । ଟିକା ଦେବାରେ ଓଡିଶା ଦେଶରେ ଦ୍ୱିତୀୟ ସ୍ଥାନରେ ରହିଥିବା ବେଳେ ଏ ପର୍ଯ୍ୟନ୍ତ ୯୦ ପ୍ରତିଶତରୁ ଅଧିକ ସ୍ୱାସ୍ଥ୍ୟକର୍ମୀ ଏବଂ ଫ୍ରଣ୍ଟଲାଇନ ୱାର୍କରଙ୍କୁ ଟିକାର ଦ୍ୱିତୀୟ ଡୋଜ ଦିଆଚାଲିଛି । ମେ ୧୫ ସୁଦ୍ଧା ୪୬ ଲକ୍ଷ ବୟସ୍କ ଲୋକଙ୍କୁ ଟିକା ଦିଆଯିବାକୁ ଲକ୍ଷ୍ୟ ରଖାଯାଇଛି । ଦୈନିକ ଏକଲକ୍ଷ ଲୋକଙ୍କୁ ଟିକା ଦେବା ପାଇଁ ରାଜ୍ୟ ସରକାର ସ୍ଥିର କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୦୨୧ ଜାନୁଆରୀ ମାସରେ କେନ୍ଦ୍ର ସରକାର ଘୋଷଣା କରିଥିଲେ ଯେ, ଜୁଲାଇ ମାସ ସୁଦ୍ଧା ୩୦ କୋଟି ଲୋକ ଟିକା ନେବେ । କିନ୍ତୁ ମାର୍ଚ୍ଚ ୧୨ ତାରିଖ ସୁଦ୍ଧା ଯଦି ଏହି ତଥ୍ୟକୁ ଦେଖାଯାଏ ତେବେ ଧାର୍ଯ୍ୟ ସଂଖ୍ୟା ଠାରୁ ଆମେ ବହୁତ ପଛରେ ପଡିଯାଇଛେ । ବର୍ତମାନର ତଥ୍ୟକୁ ଯଦି ଦେଖାଯାଏ ତେବେ ହାତଗଣତି କିଛି ରାଜ୍ୟ ଟିକାକରଣ ଧାର୍ଯ୍ୟ ଲକ୍ଷ୍ୟର ମାତ୍ର ୧୦ ପ୍ରତିଶତ କରିପାରିଛନ୍ତି । ସବୁଠୁ ଉପରେ ରହିଛି ରାଜସ୍ଥାନ । ସେଠାରେ ୨୩ ଲକ୍ଷ ୩୦ ହଜାର ଲୋକ ଟିକା ନେଇଥିବା ବେଳେ ଗୁଜୁରାଟରେ ୧୯.୫ ଲକ୍ଷ, ମହାରାଷ୍ଟ୍ରରେ ୧୯.୪ଲକ୍ଷ ଥିବା ବେଳେ ଓଡିଶାରେ ଟିକା ନେଇଛନ୍ତି ୯ଲକ୍ଷ ୧୦ହଜାର ଲୋକ । ହିମାଚଳ ପ୍ରଦେଶରେ ସବୁଠାରୁ କମ ୧ଲକ୍ଷ ୮୦ହଜାର ଲୋକ ଟିକା ନେଇଛନ୍ତି । ଯଦି ଜାରି ରହିଥିବା ପ୍ରକ୍ରିୟାରେ ଟିକାକରଣ ଚାଲେ ତେବେ ନିର୍ଦ୍ଧାରିତ ସମୟରେ ଧାର୍ଯ୍ୟ ସଂଖ୍ୟକ ଟିକାକରଣ କରିବା ହୁଏତ ସମ୍ଭବ ନ ହୋଇପାରେ । ତେଣୁ ଏହି ପ୍ରକ୍ରିୟାକୁ ଅଧିକ ତ୍ୱରାନ୍ୱିତ କରିବା ଜରୁରୀ ହୋଇପଡିଛି ।