ସାହାସୀ ସାମ୍ବାଦିକଙ୍କୁ ଶ୍ରଦ୍ଧାଞ୍ଜଳି ଦେଲା ଓଡିଶା । ବନ୍ୟା, ବାତ୍ୟା ସମୟର ଦୁଃସାହସିକ ରିପୋର୍ଟିଂ କରି ମନ ଜିତିଥିଲେ ଅରିନ୍ଦମ…
କନକ ବ୍ୟୁରୋ: ଅଲବିଦା ଅରିନ୍ଦମ । ଜଣେ ସାମ୍ବାଦିକ ଭାବେ ଆଉ ଜଣେ ଯୁବ ସାମ୍ବାଦିକଙ୍କ ଉଦ୍ଦେଶ୍ୟରେ ଏଭଳି କହିବା ଯେତିକି ଦୁଃଖଦାୟକ, ତାଙ୍କ ପ୍ରତି ଶ୍ରଦ୍ଧାଞ୍ଜଳି ଜଣାଇବା ପାଇଁ ଶବ୍ଦ ଖୋଜି ପାଇବା ମଧ୍ୟ ସେତିକି କଷ୍ଟକର । ସାମ୍ବାଦିକତା ଜଗତର ଜଣେ ଚର୍ଚ୍ଚିତ ଯୁବ ଚେହେରା ଆଜି ଦୁନିଆ ଛାଡି ଚାଲିଯାଇଛନ୍ତି । ବଡକଥା ହେଉଛି ନିଜ ଦାୟିତ୍ୱ ତୁଲାଇବାବେଳେ ତାଙ୍କର ଅକାଳ ବିୟୋଗ ହୋଇଛି । ଓଡିଶା ଗଣମାଧ୍ୟମ ପ୍ରତି ଏହା ଏକ ଅପୂରଣୀୟ କ୍ଷତି । କାରଣ ଖୁବ କମ ବୟସରେ ନିଜର ଚମତ୍କାର ରିପୋର୍ଟିଂ ଜରିଆରେ ସେ କେବଳ ଓଡିଶା ଟେଲିଭିଜନ ସାମ୍ବାଦିକତାର ଶିଖର ଛୁଇଁନଥିଲେ ବରଂ ଟିଭି ଦର୍ଶକଙ୍କ ମନରେ ନିଜ ପାଇଁ ଏକ ସ୍ୱତନ୍ତ୍ର ସ୍ଥାନ ତିଆରି କରିପାରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଯେଉଁଠି ତାଙ୍କର କର୍ମସ୍ଥଳ ଥିଲା, ଆଜି ସେହି ଓଟିଭି କାର୍ଯ୍ୟାଳୟରେ ପହଁଚିଥିଲା ଚିଫ୍ ରିପୋର୍ଟର ଅରିନ୍ଦମ ଦାସଙ୍କ ମର ଶରୀର । ଆଉ ମର ଶରୀର ପହିଞ୍ଚିବା ପରେ ଶୋକାକୂଳ ହୋଇପଡିଥିଲା ପୂରା ପରିବେଶ । ସାଥୀ କର୍ମଚାରୀଙ୍କଠାରୁ ଆରମ୍ଭ କରି ଓଡିଶା ଗଣମାଧ୍ୟମ ଜଗତର ଅନେକ ବ୍ୟକ୍ତି ଏଠାରେ ପହଞ୍ଚି ଅରିନ୍ଦମଙ୍କ ଅନ୍ତିମ ଯାତ୍ରାରେ ସାମିଲ ହୋଇଥିଲେ । ଆଉ ସମସ୍ତେ ଅରିନ୍ଦମଙ୍କ ସହ ଥିବା ସେମାନଙ୍କ ସ୍ମୃତିକୁ ମନେ ପକାଇଥିଲେ ।
ଦୈନିକ ସମ୍ବାଦପତ୍ର ଧରିତ୍ରୀରେ କ୍ରାଇମ ରିପୋର୍ଟର ଭାବେ କ୍ୟାରିଅର ଆରମ୍ଭ କରିଥିଲେ ଅରିନ୍ଦମ ଦାସ । ସମସ୍ତ ପ୍ରତିକୂଳ ପରିସ୍ଥିତିରେ ଅତି ସ୍ୱଭାବ ସୁଲଭ ଢଙ୍ଗରେ ନିଜ ସଂସ୍ଥା ପାଇଁ କାମ କରୁଥିବା ଏହି ଯୁବ ସାମ୍ବାଦିକ ରାଜ୍ୟରେ ଅନେକ ଗୁରୁତ୍ୱପୂର୍ଣ୍ଣ ଖବରର ସାକ୍ଷୀ ପାଲଟିଥିଲେ । ଖବର ସଂଗ୍ରହ ମଧ୍ୟରେ ସଂସ୍ଥାର ଭରସା ସାଉଁଟି ଥିଲେ ଏବଂ ତାଙ୍କୁ ମିଳିଥିଲା ଲୋକଙ୍କ ଅଜସ୍ର ଭଲପାଇବା । ଏକାଧିକ ଥର ତାଙ୍କୁ ଦୁଃସାହସିକ ରିପୋର୍ଟିଂ କରୁଥିବା ଦେଖିଛନ୍ତି ଟେଲିଭିଜନ ଦର୍ଶକ । ବନ୍ୟା, ବାତ୍ୟା ଓ ରେସ୍କ୍ୟୁ ଅପରେସନ୍ ଭଳି ଦୁର୍ଗମ ସ୍ଥାନରେ ତାଙ୍କୁ ଟିଭି ପରଦାରେ ଦେଖିଛନ୍ତି ଅଗଣିତ ଦର୍ଶକ । ଆଉ ସେହିଭଳି ଏକ ଦୁଃସାହସିକପୂର୍ଣ୍ଣ ରିପୋର୍ଟିଂ ବେଳେ ଘଟିଛି ବଡ ଅଘଟଣ । ମାତ୍ର ୩୯ ବର୍ଷ ବୟସର ଏହି ଯୁବ ସାମ୍ବାଦିକଙ୍କୁ ଅନ୍ତିମ ବିଦାୟ ଜଣାଇଛି ସାରା ଓଡିଶା ।