ଦେଶର ‘ପଦ୍ମଶ୍ରୀ’, ହେଲେ ଦୁର୍ଦ୍ଦଶାରେ ବିତୁଛି ଦିନ । ଜୀବନ ଜିଇଁବାକୁ ସଂଘର୍ଷ କରୁଛନ୍ତି ଓଡ଼ିଶାର ଗୌରବ ।
ସରକାର ସହାୟତା କହିଲେ, ଇନ୍ଦିରା ଆବାସ ଘର ଓ କିଛି ଟଙ୍କାର ପେନସନ୍, ଉଠିଲା ପ୍ରଶ୍ନ, ବାସ୍ତବ ଜୀବନରେ ପରିବର୍ତନ ଆଣେ କି ‘ପଦ୍ମଶ୍ରୀ’ ।
କନକ ବ୍ୟୁରୋ: ‘ପଦ୍ମଶ୍ରୀ’ ପୁରସ୍କାର ପାଇଥିବା ଓଡ଼ିଶାର ଅମୂଲ୍ୟ ପ୍ରତିଭାଙ୍କ ସଂପର୍କରେ ଏଭଳି ତମାମ୍ ଖବର ଆପଣଙ୍କ ନଜରକୁ ଆସିଥିବ । ସିଏ କୋଶଳୀ କବି ହଳଧର ନାଗ୍ ହୁଅନ୍ତୁ, ବା ଓଡ଼ିଶାର ମାଉଣ୍ଟେନ୍ ମ୍ୟାନ୍ ଦୈତାରୀ ନାଏକ । ଜିତେନ୍ଦ୍ରୀୟ ହରପାଲ କଥା କୁହନ୍ତୁ ବା କମଳା ପୂଜାରୀଙ୍କ କଥା । ପ୍ରତିଭା ପାଇଁ ପୁରସ୍କାର ସିନା ମିଳିଲା, ହେଲେ ପଦ୍ମ ପୁରସ୍କାର ଏମାନଙ୍କ ଜୀବନରେ କ’ଣ ପରିବର୍ତନ ଆଣିଛି ନିଜର ଦୁଖଃଦ ଭରା ଜୀବନ ଯାପନକୁ ବଖାଣିଛନ୍ତି ଏହି ୪ଜଣ ପଦ୍ମଶ୍ରୀ ବିଜେତା ।
Kanak News is now on WhatsApp
Join and get latest news updates delivered to you via WhatsApp
ପଦ୍ମଶ୍ରୀ ଦୈତାରୀ ନାଏକ, ମାଉଣ୍ଟେନ୍ ମ୍ୟାନ୍
‘ପଦ୍ମଶ୍ରୀ’ ପୁରସ୍କାର ପାଇ ରାଜ୍ୟ ପାଇଁ ଗୌରବ ଆଣିଥିବା ଦୈତାରୀ ନାୟକଙ୍କ ଘରକୁ ଦେଖନ୍ତୁ । ଛେଳି ଗୁହାଳରେ ଟଙ୍ଗା ହୋଇଛି ପଦ୍ମଶ୍ରୀ ପୁରସ୍କାର । ସରକାରଙ୍କ ପକ୍ଷରୁ ମିଳିଥିବା ଗୃହ, ଅଧାଗଢ଼ା ହୋଇ ରହିଥିବାରୁ ଚାଳଛପର ଘରେ ବିତୁଛି ପଦ୍ମଶ୍ରୀଙ୍କ ଜୀବନ । ଆଉ କାମ ମିଳୁନଥିବାରୁ ଦୈତାରୀ, ପତ୍ନୀଙ୍କ ସହ ମିଶି ବଜାରରେ ବିକୁଛନ୍ତି ଆମ୍ବସଢ଼ା ଓ ଖଲିପତ୍ର ।
ପଦ୍ମଶ୍ରୀ ହଳଧର ନାଗ୍, କୋଶଳୀ କବି
ପୁରସ୍କାର ଓ ମାନପତ୍ରରେ ଭର୍ତି ହୋଇ ରହିଛି ପଦ୍ମଶ୍ରୀ ହଳଧର ନାଗଙ୍କ ଏହି ଛୋଟିଆ ଘର । କିଏ ଆସିଲେ ଗର୍ବର ସହ ଦେଖାଉଛନ୍ତି ପଦ୍ମଶ୍ରୀ ଫଳକ । ହେଲେ ଚଳିବା ପାଇଁ ତାଙ୍କୁ ମଜୁରୀ କରିବାକୁ ପଡୁଛି । ଏମିତି କି ରଥଯାତ୍ରାରେ ସେ ଘୁଘୁନି ବିକ୍ରି କରୁଥିବାର ଚିତ୍ର ସାମ୍ନାକୁ ଆସିଛି ।
ପଦ୍ମଶ୍ରୀ କମଳା ପୂଜାରୀ, ଚାଷୀ
ବିଲୁପ୍ତ ପ୍ରାୟ ଦେଶୀ ବିହନ ଧାନକୁ ସଂଗ୍ରହ କରି ଚାଷ କରୁଥିବା କୋରାପୁଟର କମଳା ପୂଜାରୀଙ୍କ ଘର ଦେଖିଲେ ଯେ, କେହି କହିପାରିବ ପଦ୍ମଶ୍ରୀ ପୁରସ୍କାର ତାଙ୍କ ଜୀବନରେ ସେଭଳି କିଛି ପରିବର୍ତନ ଆଣିନାହିଁ । ପୁଅକୁ ପ୍ରଧାନମନ୍ତ୍ରୀ ଆବାସ ଏବଂ କମଳାଙ୍କୁ ୫ଶହ ଟଙ୍କାର ମାସିକ ଭତାକୁ ଛାଡି ଦେଲେ, କମଳାଙ୍କ ଜୀବନରେ କିଛି ବି ପରିବର୍ତନ ଆସିନି ।
ପଦ୍ମଶ୍ରୀ ଜିତେନ୍ଦ୍ରୀୟ ହରପାଲ, ଗାୟକ
କୁଡିଆ ଘରେ ରୁହନ୍ତି ପଦ୍ମଶ୍ରୀଙ୍କ ଜିତେନ୍ଦ୍ରୟ ହରପାଲଙ୍କ ପୁରା ପରିବାର । ଘରେ ଟାଙ୍ଗିବାକୁ ଜାଗା ନଥିବାରୁ ଆଜି ବି ଡବାରେ ପଶି ରହିଛି ପଦ୍ମଶ୍ରୀ ମାନପତ୍ର । ଆଉ ପରିଣତ ବୟସରେ ବି ସ୍ୱାଭିମାନର ସହ ବଂଚିବା ପାଇଁ ଲୋକଗୀତ ଗାଇ ଲୋକଙ୍କ ମନୋରଂଜନ କରୁଛନ୍ତି । ସେଥିରୁ ମିଳୁଥିବା ଅର୍ଥରେ ସ୍ତ୍ରୀ, ଦୁଇ ପୁଅ ଦୁଇ ବୋହୂ ନାତି ନାତୁଣିଙ୍କ ମୁହଁରେ ଆହାର ଦେଉଛନ୍ତି । ପଦ୍ମଶ୍ରୀ ଜିତେନ୍ଦ୍ରୀୟ ହରିପାଲଙ୍କ ବଡ ପୁଅ ଭଡାରେ ଅଟୋ ଚଳାନ୍ତି । ମଝିଆ ପୁଅ ୨୦୧୦ରେ ଏକ ଦୁର୍ଘଟଣାରେ ପ୍ରାଣ ହରାଇଥିବା ବେଳେ ସାନ ପୁଅ ୨୦୧୫ରେ ଏକ ଦୁର୍ଘଟଣାରେ ଗୋଟିଏ ଗୋଡ ହରାଇ ଭିନ୍ନକ୍ଷମ ।