ଟିକାକରଣରେ ଟାର୍ଗେଟ୍ ଠାରୁ ପଛରେ ଓଡିଶା : ୨୧ ତାରିଖରୁ ଦୈନିକ ୩ ଲକ୍ଷ ଟିକାକରଣ ପାଇଁ ଲକ୍ଷ୍ୟ ରଖିଥିଲେ ରାଜ୍ୟ ସରକାର, ହେଲେ ପହଁଚି ପାରୁନି ଟାର୍ଗେଟ୍
ସେପଟେ ନିଆଳିରୁ ଆସିଲା ଅଭାବନୀୟ ଦୃଶ୍ୟ ; ୨୦୦ ଟିକା ପାଇଁ ୨ ହଜାର ଲୋକଙ୍କ ଭିଡ
କନକ ବ୍ୟୁରୋ : ଜୁନ ୨୧ ତାରିଖରୁ ରାଜ୍ୟରେ ଆରମ୍ଭ ହୋଇଥିଲା କରୋନା ଟିକାକରଣର ବଡ଼ ଅଭିଯାନ । ଦୈନିକ ୩ ଲକ୍ଷ ଟିକା ଦେବାକୁ ଲକ୍ଷ୍ୟ ଧାର୍ଯ୍ୟ କରିଥିଲେ ରାଜ୍ୟ ସରକାର । ହେଲେ ୬ ଦିନ ଭିତରେ ମାତ୍ର ଦୁଇ ଥର ଏହି ଟାର୍ଗେଟ ହାସଲ କରା ଯାଇପାରିଛି । ଗୋଟିଏ ପଟେ ଟିକାକରଣ କେନ୍ଦ୍ରରେ ପ୍ରବଳ ଭିଡ଼ ଦେଖିବାକୁ ମିଳୁଛି, ଅନ୍ୟପଟେ ଟାର୍ଗେଟରୁ ପଛରେ ପଡ଼ିଯାଉଛି ଓଡ଼ିଶା ।
Kanak News is now on WhatsApp
Join and get latest news updates delivered to you via WhatsApp
କଟକ ଜିଲ୍ଲା ନିଆଳି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିନରେ ଥିବା କୃଷ୍ଣପ୍ରସାଦ ପ୍ରାଇମେରୀ ସ୍ୱାସ୍ଥ୍ୟ କେନ୍ଦ୍ରରେ ଯେଉଁ ଦୃଶ୍ୟ ଦେଖିବାକୁ ମିଳିଛି, ତାହା ବୟାନ କରୁଛି ଯେ ଟିକା ନେବା ପାଇଁ କିପରି ଲୋକ ଅପେକ୍ଷା କରି ରହିଛନ୍ତି । କେନ୍ଦ୍ରରେ ମାତ୍ର ୨୩୦ ଟିକା ପହଁଚିଥିବା ବେଳେ ପ୍ରାୟ ୨ ହଜାର ଲୋକ ଟିକା ନେବା ପାଇଁ ଭିଡ଼ ଜମାଇଥିଲେ । ଏପରି କି ମେଡିକାଲ ଗେଟ ତାଡି ଭିତରକୁ ପସିଯାଇଥିଲେ ଉତ୍ୟକ୍ତ ଲୋକ । ଲୋକଙ୍କ ଗହଳି ଦେଖି ଟିକା ଦେବା ବନ୍ଦ କରି ଦେଇଥିଲେ ମେଡିକାଲ କର୍ମଚାରୀ । କରୋନା ବିରୋଧୀ ଲଢ଼େଇରେ ସବୁଠୁ ଶକ୍ତିଶାଳୀ ଅସ୍ତ୍ର ହେଉଛି ଟିକା । ରାଜ୍ୟରେ କରୋନା ସଂକ୍ରମଣ ଯେପରି ହ୍ରାସ ପାଇବା କଥା ପାଉନାହିଁ ।
ସେପଟେ ତୃତୀୟ ଲହରକୁ ନେଇ ଆଶଙ୍କା ବଢ଼ିବାରେ ଲାଗିଛି । ଏହାକୁ ଦୃଷ୍ଟିରେ ରଖି ଟିକାକରଣକୁ ବ୍ୟାପକ କରିବା ପାଇଁ ସରକାର ଦୈନିକ ୩ ଲକ୍ଷ ଟିକା ଦେବା ପାଇଁ ଟାର୍ଗେଟ ରଖିଛନ୍ତି । ଜୁନ ୨୧ ତାରିଖ ଦିନ ରାଜ୍ୟରେ ୩ ଲକ୍ଷ ୩୨ ହଜାରରୁ ଅଧିକ ଟିକା ଦିଆଯାଇଥିଲା । ୨୩ ତାରିଖରେ ୩ ଲକ୍ଷ ୨୫ ହଜାର ପାଖାପାଖି ଟିକା ଦିଆଯାଇଥିଲା । ବାକି ୪ ଦିନ ଏହି ଟାର୍ଗେଟ ଛୁଇଁପାରିନି ଓଡ଼ିଶା । ଟିକାକେନ୍ଦ୍ରରେ ଲୋକଙ୍କ ଭିଡ଼ ବଢୁଥିବା ବେଳେ ଦିନକୁ ଦିନ ଟିକାକେନ୍ଦ୍ର ସଂଖ୍ୟା ମଧ୍ୟ କମିବାରେ ଲାଗିଛି । ଶୁକ୍ରବାର ଦିନ ୨ ଲକ୍ଷ ୪୫ ହଜାର ୩୦୬ ଓ ଶନିବାର ଦିନ ୨ ଲକ୍ଷ ୪୪ ହଜାର ୨୫୦ ଟିକା ଦିଆଯାଇଛି ।