ଓଡ଼ିଶାରେ ଚାଇନା ଟେକନୋଲୋଜି : କେନ୍ଦୁଝରରେ ଜ୍ୟାକରେ ଉଠିଲା ଘର; ବର୍ଷା ଦିନେ ପାଣିରେ ବୁଡ଼ି ଯାଉଥିଲା କଲୋନୀ
୧୧ ଶହ ବର୍ଗ ଫୁଟର ଘର ଉଠାଇବାକୁ ଲାଗିଲା ୧୮୦ଟି ଜ୍ୟାକ
କନକ ବ୍ୟୁରୋ : ୪ଫୁଟ ଉପରକୁୁ ଉଠିଲା ଘର । କଥାଟି ଅସମ୍ଭବ ମନେ ହେଉଥିଲେ ବି କେନ୍ଦୁଝରରେ ଏଭଳି ଏକ ଘଟଣା ଦେଖିବାକୁ ମିଳିଛି । ମାଟି ଦବି ତଳୁଆ ହୋଇପଡିଥିବା ଘରକୁ ଜ୍ୟାକ ସାହାର୍ଯ୍ୟରେ ଉପରକୁ ଉଠାଯାଇଛି । ସୂଚନା ମୂତାବକ, କେନ୍ଦୁଝର ସ୍ପଞ୍ଜ କଲୋନୀର ବାସିନ୍ଦା ମହେଶ୍ୱର ନାୟକଙ୍କ ଘର ତଳକୁ ତଳ ଦବି ଯାଉଥିଲା । ବିପର୍ଯ୍ୟସ୍ଥ ଡ୍ରେନେଜ ବ୍ୟବସ୍ଥା ଯୋଗୁଁ ବର୍ଷା ହେଲେ ପାଣିରେ ସମ୍ପୂର୍ଣ୍ଣ ଭାବେ କଲୋନୀଟି ବୁଡିଯାଏ ଆଉ ଘରେ ଘରେ ପାଣି ପଶିଯାଏ । ରାସ୍ତାର ଉଚ୍ଚତା ଅନୁସାରେ ଘରର ଉଚ୍ଚତା ବହୁ ତଳେ ରହିଥିବାରୁ ଏହି ଅସୁବିଧା ସୃଷ୍ଟି ହେଉଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ୟୁଟ୍ୟୁବରୁ ଘରକୁ ଉଚ୍ଚସ୍ଥାନକୁ ଉଠାଇହେଉଥିବାର ଏକ ଭିଡିଓ ଦେଖିବା ପରେ ସେହି ସଂସ୍ଥା ସହ ଯୋଗାଯୋଗ କରିଥିଲେ ମହେଶ୍ୱରଙ୍କ ପୁଅ ମନୋଜ । ବିଭିନ୍ନ ସ୍ଥାନରେ ଏହି ସଂସ୍ଥା କାମ କରୁଥିବା ଦେଖିବା ପରେ ମନୋଜ ଏହି ସଂସ୍ଥାକୁ ନିଜ ଘରର କାମ ପାଇଁ ଦାୟିତ୍ୱ ଦେଇଥିଲେ । ୧୨ଜଣ କୁଶଳୀ ଶ୍ରମିକଙ୍କୁ ନେଇ କାମ ଆରମ୍ଭ ହୋଇଛି । ୧୧ଶହ ବର୍ଗଫୁଟର ଘରକୁ ଉପରକୁ ଉଠାଇବାକୁ ଲାଗିଛି ୧୮୦ଟି ଜ୍ୟାକ । ୪ଫୁଟ ଉପରକୁ ଉଠିବାକୁ ୧ମାସ ସମୟ ଲାଗୁଥିବାବେଳେ ୧୫ଦିନରେ ଘରଟି ୨ଫୁଟ ଉପରକୁ ଉଠି ସାରିଲାଣି । ଆଉ ୨ ଫୁଟ ଉପରକୁ ଉଠାଇବା କାମ ଜାରି ରହିଛି । ଏଥିପାଇଁ ପାଖାପାଖି ୧୦ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହେବ ବୋଲି ଘର ମାଲିକ କହିଛନ୍ତି ।