୧୦ ଲକ୍ଷ ଟପିଲା ଓଡ଼ିଶାର କରୋନା ଟେଷ୍ଟ୍ । ପରୀକ୍ଷା ତୁଳନାରେ କମୁଛି ସଂକ୍ରମଣ ହାର, ସେପଟେ ଦେଶରେ ସୁସ୍ଥ ହେଲେ ୭୩ ପ୍ରତିଶତ ଆକ୍ରାନ୍ତ, ୧ଦଶମିକ ୯୪କୁ ଖସିଲା ମୃତ୍ୟୁ ହାର ।
କନକ ବ୍ୟୁରୋ: କରୋନାକୁ ନେଇ ଏକ ଭଲ ଖବର ହେଉଛି, ସଂକ୍ରମଣ ସଂଖ୍ୟା ବଢୁଥିଲେ ମଧ୍ୟ ସଂକ୍ରମଣ ହାର କିନ୍ତୁ କମୁଥିବା ଲକ୍ଷ୍ୟ କରାଯାଉଛି । ଆଜି ଓଡିଶା ୧୦ ଲକ୍ଷ କରୋନା ପରୀକ୍ଷାର ମାଇଲ ଖୁଂଟ ଅତିକ୍ରମ କରିଛି । ଏହି ମହାମାରୀର ମୁକାବିଲା ପାଇଁ ପରୀକ୍ଷା ହିଁ ସବୁଠାରୁ ବଡ ମାଧ୍ୟମ । ଗତ ୨୪ ଘଂଟାରେ ରାଜ୍ୟରେ ୫୦ ହଜାରରୁ ଅଧିକ ଟେଷ୍ଟ କରାଯାଇଥିବା ବେଳେ ୨୨ ଶହ ୩୯ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେମାନଙ୍କ ମଧ୍ୟରୁ ସଂଗରୋଧ କେନ୍ଦ୍ରରୁ ୧୪ ଶହ ୧୬ ଜଣ ଥିବା ବେଳେ ୮୨୩ ଜଣ ସ୍ଥାନୀୟ ଅଂଚଳରୁ ସଂକ୍ରମିତ ହୋଇଛନ୍ତି । ଖୋର୍ଦ୍ଧାରେ ଗୋଟିଏ ଦିନରେ ସର୍ବାଧିକ ୪୧୯ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଗଂଜାମରୁ ୨୪୬ ଆକ୍ରାନ୍ତ ଚିହ୍ନଟ ହୋଇଛନ୍ତି । ରାଜ୍ୟରେ ଏଯାଏ ୪୩ ହଜାର ୭୭୯ ଜଣ ସୁସ୍ଥ ହୋଇଥିବା ବେଳେ ୨୦ ହଜାର ୩୩୯ ସକ୍ରିୟ ସଂକ୍ରମିତ ରହିଛନ୍ତି ।
ସେପଟେ ଦେଶରେ ସୁସ୍ଥ ହୋଇ ଘରକୁ ଫେରିଛନ୍ତି ୭୩ ପ୍ରତିଶତ କରୋନା ଆକ୍ରାନ୍ତ । ଏହାସହ ମୃତ୍ୟୁହାର କମୁଛି । ସାରା ଦେଶରେ ମୃତ୍ୟୁହାର ୧ ଦଶମିକ ୯୪କୁ ଖସି ଆସିଥିବା ସାମ୍ବାଦିକ ସମ୍ମିଳନୀ କରି ସୂଚନା ଦେଇଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ । ଦିନକୁ ୫୫ ହଜାର ଆକ୍ରାନ୍ତ ସୁସ୍ଥ ହେଉଥିବା ସ୍ୱାସ୍ଥ୍ୟ ମନ୍ତ୍ରାଳୟ କହିଛି । ଗତ ୨୪ ଘଂଟାରେ ଦେଶରେ ଗୋଟିଏ ଦିନରେ ପ୍ରାୟ ୯ ଲକ୍ଷ କରୋନା ପରୀକ୍ଷା ହୋଇଛି । ଏବଂ ୫୫ ହଜାର ୭୯ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ।