ଗାଡ଼ିର ପ୍ରଦୂଷଣ ପ୍ରମାଣପତ୍ରର ଦ୍ୱନ୍ଦ୍ୱ ବଢ଼ାଇଲା ଭିଡ଼ । ପରିବହନ ଅଧିକାରୀ କହିଲେ, ଆସନ୍ତା ୧ରୁ କେବଳ ଅନଲାଇନରେ ସଂଯୁକ୍ତ ଥିବା ପଲ୍ୟୁସନ ସାର୍ଟିଫିକେଟ ହିଁ ହେବ ବୈଧ
କନକ ବ୍ୟୁରୋ : ଅକ୍ଟୋବର ୧ରୁ ଅନଲାଇନ୍ ସଂଯୁକ୍ତ ପଲ୍ୟୁସନ ପ୍ରମାଣପତ୍ର ନେଇ ପରିବହନ ବିଭାଗର ଟ୍ୱିଟ୍ ପରେ ଲୋକଙ୍କ ମଧ୍ୟରେ ଦ୍ୱନ୍ଦ୍ୱ ସୃଷ୍ଟି ହୋଇଛି । ଅନଲାଇନ୍, ଅଫଲାଇନ୍ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଥିବା ବେଳେ ଆଜି ପଲ୍ୟୁସନ ସାର୍ଟିଫିକେଟ୍ ପାଇଁ ସାଂଘାତିକ ଭିଡ଼ ଦେଖିବାକୁ ମିଳିଛି । ଯେଉଁମାନେ ପୂର୍ବରୁ ପ୍ରମାଣପତ୍ର ସଂଗ୍ରହ କରିଥିଲେ, ସେମାନେ ମଧ୍ୟ ଧାଡ଼ି ଲଗାଇଛନ୍ତି ନୂଆ ପ୍ରମାଣପତ୍ର ପାଇଁ । ତେବେ ପରିବହନ ବିଭାଗ ସ୍ପଷ୍ଟ କରିଛି, ସେପ୍ଟେମ୍ବର ୩୦ ସୁଦ୍ଧା କରାଯାଇଥିବା ପଲ୍ୟୁସନ୍ ପ୍ରମାଣ ପତ୍ର ଗ୍ରହଣ କରାଯିବ । ଅକ୍ଟୋବର ପହିଲା ପରେ ଅନଲାଇନ ସଂଯୋଗ ପ୍ରମାଣପତ୍ର ବାଧ୍ୟତାମୂଳକ । ସେହିପରି ରାଜ୍ୟ ସରକାର ୩ ମାସ କୋହଳ କରିଥିବାରୁ ଡିସେମ୍ବର ୧ ତାରିଖରୁ କାଗଜପତ୍ର ଯାଞ୍ଚ କଡ଼ାକଡ଼ି କରାଯିବ ବୋଲି ସ୍ପଷ୍ଟ କରିଛି ପରିବହନ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ପରିବହନ କର୍ତ୍ତୃପକ୍ଷଙ୍କ ଟ୍ୱିଟ୍ ଏପରି ଦ୍ୱନ୍ଦ୍ୱ ତିଆରି କରିଥିଲା ଯେ ସକାଳୁ ସକାଳୁ ପ୍ରଦୂଷଣ ମୁକ୍ତ ପ୍ରମାଣ ପତ୍ର ପାଇବା ପାଇଁ ଆରଟିଓ କାର୍ଯ୍ୟାଳୟ ଓ ବିଭିନ୍ନ କେନ୍ଦ୍ରରେ ଦେଖିବାକୁ ମିଳିଥିଲା ଲମ୍ବା ଲାଇନ୍ । ଯେଉଁମାନେ ପୂର୍ବରୁ ପଲ୍ୟୁସନ୍ ସାର୍ଟିଫିକେଟ୍ କରିଥିଲେ, ସେମାନେ ମଧ୍ୟ ପୁଣି ଥରେ ଅନଲାଇନ୍ ସଂଯୁକ୍ତ ସାର୍ଟିଫିକେଟ୍ ପାଇଁ ଲାଇନ୍ ଲଗାଇଥିଲେ ।
ଅକ୍ଟୋବର ୧ତାରିଖରୁ ଅନଲାଇନ ପ୍ରମାଣପତ୍ର ବାଧ୍ୟତାମୂଳକ ହେବ । ତେବେ ଏ ନେଇ ସ୍ପଷ୍ଟୀକରଣ ରଖିଛନ୍ତି ରାଜ୍ୟ ପରିବହନ କର୍ତ୍ତୃପକ୍ଷ । ନଜର ପକାନ୍ତୁ ପରିବହନ ବିଭାଗର ସ୍ପଷ୍ଟୀକରଣ ଉପରେ :
– ଅକ୍ଟୋବର ୧ରୁ ଅନଲାଇନ୍ ପ୍ରଦୂଷଣ ପ୍ରମାଣପତ୍ର ବାଧ୍ୟତାମୂଳକ
– ବାହାନ ୱେବସାଇଟ୍ ସହ ସଂଯୋଗ ହେବ ପ୍ରମାଣପତ୍ର
– ଅନଲାଇନରେ ଯୋଡି ହୋଇନଥିବା କେନ୍ଦ୍ରର ପ୍ରମାଣପତ୍ର ଅବୈଧ
– ସେପ୍ଟେମ୍ବର ୩୦ ମଧ୍ୟରେ ହୋଇଥିବା ମାନୁଆଲ ପ୍ରମାଣପତ୍ରରେ ସମସ୍ୟା ନାହିଁ
– ଡିସେମ୍ବର ୧ ତାରିଖରୁ କାଗଜପତ୍ର ଯାଞ୍ଚ କଡ଼ାକଡ଼ି
ତେବେ କାଗଜପତ୍ର ଯାଂଚ ନେଇ ସରକାର ତିନି ମାସ କୋହଳ କରିଥିବା ବେଳେ ପଲ୍ୟୁସନ୍ ସାର୍ଟିଫିକେଟ୍ ଯାଂଚ ହେବ କି ନାହିଁ ନେଇ ଲୋକଙ୍କ ମଧ୍ୟରେ ଦ୍ୱନ୍ଦ୍ୱ ସୃଷ୍ଟି ହୋଇଥିଲା । ପରିବହନ ବିଭାଗ ସ୍ପଷ୍ଟ କରିଛନ୍ତି ଯେ ରାଜ୍ୟ ସରକାର ୩ ମାସ କୋହଳ କରିଥିବାରୁ ଡିସେମ୍ବର ୧ ତାରିଖରୁ କାଗଜପତ୍ର ଯାଂଚ କଡ଼ାକଡ଼ି କରାଯିବ । ସେପଟେ ଆରଟିଓ ଅଫିସରେ ଭିଡକୁ ଦୃଷ୍ଟିରେ ରଖି ବ୍ଲକ ସ୍ତରରେ ଡ୍ରାଇଭିଂ ଲାଇସେନ୍ସ ପାଇଁ କ୍ୟାମ୍ପ ଖୋଲିବାକୁ ରାଜ୍ୟ ସରକାର ନିଷ୍ପତି ନେଇଛନ୍ତି ।