ଟିକାକୁ ନେଇ କେନ୍ଦ୍ର-ରାଜ୍ୟ ମୁହାଁମୁହିଁ । ଭ୍ୟାକସିନ ଯୋଗାଣରେ ପାତର ଅନ୍ତର ଅଭିଯୋଗ ପରେ କେନ୍ଦ୍ରର ଜବାବ ।
ସ୍ୱାସ୍ଥ୍ୟମନ୍ତ୍ରୀଙ୍କ ସହ ଆଲୋଚନା କଲେ ଧର୍ମେନ୍ଦ୍ର ପ୍ରଧାନ
କନକ ବ୍ୟୁରୋ: ଟିକାଯୋଗାଣକୁ ନେଇ ମୁହାଁମୁହିଁ ହୋଇଛନ୍ତି କେନ୍ଦ୍ର ଓ ରାଜ୍ୟ ସରକାର । ଗତକାଲି କେନ୍ଦ୍ର ସ୍ୱାସ୍ଥ୍ୟ ସଚିବଙ୍କୁ ଚିଠି ଲେଖି ରାଜ୍ୟ ସ୍ୱାସ୍ଥ୍ୟ ସଚିବ କହିଥିଲେ, ଟିକା ଯୋଗାଣରେ ରାଜ୍ୟ ରାଜ୍ୟ ଭିତରେ ପାତର ଅନ୍ତର କରାନଯାଉ । ରାଜ୍ୟକୁ ଯଥେଷ୍ଟ ପରିମାଣରେ ଟିକା ଦିଆଯାଉ, ଫଳରେ ରାଜ୍ୟ ସରକାର ଆଗୁଆ ୧୫ ଦିନ ପାଇଁ ଯୋଜନା କରିବେ ।
Kanak News is now on WhatsApp
Join and get latest news updates delivered to you via WhatsApp
ଏହାର ଜବାବରେ କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଷ ଭୂଷଣ, ରାଜ୍ୟ ସ୍ୱାସ୍ଥ୍ୟ ସଚିବଙ୍କୁ ତଥ୍ୟ ସହ ଚିଠି ଲେଖି ଏହି ପାତର ଅନ୍ତର ଅଭିଯୋଗକୁ ଖଣ୍ଡନ କରିଛନ୍ତି । କେନ୍ଦ୍ର ସ୍ୱାସ୍ଥ୍ୟ ସଚିବ କହିଛନ୍ତି, ୨୭ ମାର୍ଚ୍ଚ ସୁଦ୍ଧା ରାଜ୍ୟକୁ ୩୪ ଲକ୍ଷ ୪୬ ହଜାର ୭୬୦ ଡୋଜ୍ ଟିକା ଦିଆଯାଇଛି । ଏହାମଧ୍ୟରୁ ୨୧ ଲକ୍ଷ ୬୭ ହଜାର ୯୫୬ ଯୋଗ୍ୟ ବ୍ୟକ୍ତିଙ୍କୁ ଟିକା ଦିଆସରିଛି । ଏହାର ଅର୍ଥ ରାଜ୍ୟ ସରକାର ୨୨ ଲକ୍ଷ ୯୭ ହଜାର ୪୩୧ ଡୋଜ୍ ଟିକା ବ୍ୟବହାର କରିଛନ୍ତି ଏବଂ ସ୍ୱାସ୍ଥ୍ୟ ବିଭାଗ ପାଖରେ ୧୧ ଲକ୍ଷ ୪୯ ହଜାର ୩୨୯ ଡୋଜ୍ ଟିକା ରହିବା କଥା ।
ପ୍ରତିଦିନ ସମସ୍ତ ରାଜ୍ୟରେ ଟିକାର ସ୍ଥିତି ନେଇ ସମୀକ୍ଷା କରାଯାଉଛି । ଗତ ୩ ଦିନରେ ଓଡିଶାରେ ୨ ଲକ୍ଷ ୭ ହଜାର ୨୨୯ ବ୍ୟକ୍ତିଙ୍କୁ ଟିକା ଦିଆଯାଇଛି । ଏହାର ଅର୍ଥ ଦୈନିକ ପ୍ରାୟ ୬୯ ହଜାର ୭୬ ଜଣଙ୍କୁ ଟିକା ଦିଆଯାଉଛି । ଟିକା ସ୍ଥିତିର ସମୀକ୍ଷା କରିବା ସହ ଓଡିଶାକୁ ଆଉ ୫ ଲକ୍ଷ ୪୮ ହଜାର ୨୫୦ ଡୋଜ୍ ପଠାଯାଉଛି, ଯାହା ୨୮ ମାର୍ଚ୍ଚ ସୁଦ୍ଧା ରାଜ୍ୟକୁ ଆସିଯିବ । ଚିଠିରେ କୁହାଯାଇଛି, ଯେଉଁ ଯୁକ୍ତିକୁ ଓଡିଶା ସରକାର ଦୃଷ୍ଟି ଆକର୍ଷଣ କରିବାକୁ ଚାହୁଁଛନ୍ତି ତାହା ଯୁକ୍ତିସଙ୍ଗତ ନୁହେଁ । ଟିକାବଂଟନରେ କୈାଣସି ଅନିୟମିତତା ଅବା ପାତରଅନ୍ତର ହେଉନାହିଁ ବୋଲି କେନ୍ଦ୍ର ସ୍ପଷ୍ଟ ଭାବେ ଦର୍ଶାଇଛି ।
ରାଜ୍ୟରେ ଟିକାକରଣକୁ ତ୍ୱରାନ୍ୱିତ କରିବା ପାଇଁ ଟିକା କେତେ ଉପଲବ୍ଧ ରହିଛି ତାହା କେବେ ମଧ୍ୟ ଏକ କାରଣ ନୁହେଁ । କେନ୍ଦ୍ର ସରକାର ଏହି ଚିଠି ଜରିଆରେ ଆଶ୍ୱାସନା ଦେଇଛନ୍ତି, ରାଜ୍ୟକୁ ଟିକା ଯୋଗାଣ କେବେ ମଧ୍ୟ ବ୍ୟାହତ ହେବନାହିଁ ଏବଂ ସ୍ଥିତିର ସମୀକ୍ଷା କରି ଟିକା ଯୋଗାଣ ପାଇଁ ସମସ୍ତ ପଦକ୍ଷେପ କେନ୍ଦ୍ର ନେବ ବୋଲି ଚିଠିରେ ସ୍ପଷ୍ଟ ଭାବେ କୁହାଯାଇଛି । ଏହି ପ୍ରସଙ୍ଗ ଉପରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟ୍ୱିଟ କରି କହିଛନ୍ତି, ଦେଶରେ କିମ୍ବା ଓଡିଶାରେ ଟିକାର କୈାଣସି ଅଭାବ ନାହିଁ । ଏନେଇ ସେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କ ସହ କଥା ହୋଇଥିବା ଟ୍ୱିଟରେ ଉଲ୍ଲେଖ କରିଛନ୍ତି । ଧର୍ମେନ୍ଦ୍ର କହିଛନ୍ତି, ଓଡିଶା ସରକାର ଟିକା ଉପଲବ୍ଧ ନଥିବା ନେଇ ଭୟ ସୃଷ୍ଟି କରିବା ବାବଦରେ ସେ ଆଲୋଚନା କରିଥିଲେ ।
ଗତକାଲି ସ୍ୱାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ କହିଥିଲେ, ପର୍ଯ୍ୟାପ୍ତ ଟିକା ମହଜୁଦ ରହୁନଥିବାରୁ ୧୫ ଦିନ ପାଇଁ ଟିକାକରଣ କରିବାକୁ ରାଜ୍ୟ ରଣନୀତି କରିପାରୁନାହିଁ । ଅନ୍ୟ ରାଜ୍ୟ ଗୁଡିକ ଦିନକୁ ୩ଲକ୍ଷ ଟିକାକରଣ କରୁଛନ୍ତି । ସେମାନଙ୍କ ପର୍ଯ୍ୟାପ୍ତ ଟିକା ମିଳୁଥିବାରୁ ଟିକାକରଣ ଲକ୍ଷ୍ୟ ହାସଲ କରିପାରୁଛନ୍ତି । ଓଡିଶା ଦିନକୁ ୨ଲକ୍ଷ ଲୋକଙ୍କୁ ଟିକା ଦେବାକୁ ଲକ୍ଷ୍ୟ ରଖିଥିବାରୁ ତୁରନ୍ତ ଟିକା ଯୋଗାଇବାକୁ ଚିଠିରେ ଅନୁରୋଧ କରିଥିଲେ । ଟିକାକୁ ନେଇ ଏହି ଚିଠି ରାଜନୀତି ଭିତରେ ବିଜେପି ମୁଖପାତ୍ର ଗୋଲକ ମହାପାତ୍ର, ରାଜ୍ୟ ସରକାରଙ୍କ ଉପରେ ପ୍ରଶ୍ନ ଚିହ୍ନ ସୃଷ୍ଟି କରିଛନ୍ତି ।