କୋଭିଡ ମୁକାବିଲା ପାଇଁ ୨୫ ରାଜ୍ୟକୁ କେନ୍ଦ୍ରର ଅନୁଦାନ । ଓଡ଼ିଶା ଭାଗରେ ୩୩୮ କୋଟି, ଜାଣନ୍ତୁ ଅନୁଦାନକୁ ନେଇ କେଉଁ ଦଳ ରଖିଲେ କଣ ମତ?
କନକ ବ୍ୟୁରୋ : କରୋନା ମୁକାବିଲା ପାଇଁ ଓଡ଼ିଶାକୁ ୩୩୩.୮ କୋଟିର ଅନୁଦାନ । ଗ୍ରାମାଞ୍ଚଳରେ ଖର୍ଚ୍ଚ ପାଇଁ ଅନୁଦାନ ମଞ୍ଜୁର କଲା କେନ୍ଦ୍ର ଅର୍ଥ ବିଭାଗ । ୨୫ଟି ରାଜ୍ୟ ପାଇଁ ମୋଟ ୮,୯୨୩.୮ କୋଟିର ଅନୁଦାନ ମଞ୍ଜୁର କରାଯାଇଛି । ଆନ୍ଧ୍ରକୁ ୩୮୭.୯ କୋଟି, ଆସାମକୁ ୨୩୭.୨ କୋଟି, ପଶ୍ଚିମବଙ୍ଗକୁ ୬୫୨.୨ କୋଟି, ବିହାରକୁ ୭୪୧.୮ କୋଟିର ଅନୁଦାନ ମିଳିଛି । ଉତ୍ତର ପ୍ରଦେଶକୁ ସର୍ବାଧିକ ୧୪୪୧.୬ କୋଟି ଓ ଛତିଶଗଡ଼କୁ ୨୧୫ କୋଟିର ଅନୁଦାନ ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ଅନୁଦାନ ଘୋଷଣା ପରେ ବିଜେଡି ସାଂସଦ ଅମର ପଟ୍ଟନାୟକ କହିଛନ୍ତି, କେନ୍ଦ୍ର ସରକାର ଯେଉଁ ୩୩୩ କୋଟି ଓଡ଼ିଶାକୁ ଦେଇଛନ୍ତି, ହିସାବ କଲେ ପ୍ରତି ଜିଲ୍ଲା ପାଇଁ ୧୦ କୋଟି ଭାଗ ପଡ଼ିବ । ପୂର୍ବରୁ ମୁଖ୍ୟମନ୍ତ୍ରୀ ରିଲିଫ ପାଣ୍ଠି ଓ ଅନ୍ୟ ମାଧ୍ୟମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏଭଳି ସହାୟତା ପ୍ରଦାନ କରି ସାରିଛନ୍ତି । ଗତ ବର୍ଷ ମହାମାରୀ ମୁକାବିଲା ପାଇଁ ପ୍ରତି ପଂଚୟତକୁ ୫ ଲକ୍ଷ ବି ଦେଇଥିଲେ । କେନ୍ଦ୍ର ଯେଉଁ ଅର୍ଥ ଦେଲା, ଆଉ ଆଗରୁ ଦେବାର ଥିଲା । ଦ୍ୱିତୀୟ ପର୍ଯ୍ୟାୟ ଟଙ୍କା ବି ଜଲଦି ଦିଅନ୍ତୁ । ଆଉ ମୁଖ୍ୟମନ୍ତ୍ରୀ ଯେଉଁ ଟୀକା ଉପରୁ ଜିଏସିଟି ଛାଡ଼ ପାଇଁ ନିବେଦନ କରିଛନ୍ତି, ତାହା କରନ୍ତୁ କେନ୍ଦ୍ର ସରକାର । ଏପରିକି ସମ୍ପୂର୍ଣ୍ଣ ଟୀକା ଖର୍ଚ୍ଚ କେନ୍ଦ୍ର ବହନ କରନ୍ତୁ । ଏପରି ହେଲେ, ବଳକା ଅର୍ଥ ସ୍ୱାସ୍ଥ୍ୟ ଭିତ୍ତିଭୂମି ବିକାଶରେ ଲାଗି ପାରିବ ।
ଅନ୍ୟପଟେ ବିଜେପି ନେତା ପୃଥ୍ୱୀରାଜ ହରିଚନ୍ଦନ କହିଛନ୍ତି, କରୋନା ସମୟରେ ଯେମିତି ଦେଶର ବିକାଶ ବାଧାପ୍ରାପ୍ତ ନ ହେଉ, ଗାଁରେ ବିକାଶ ନ ଅଟକୁ, ରାଜ୍ୟ ସରକାରଙ୍କ କରୋନା ବିରୋଧୀ ଲଢେଇରେ ସାଧନ ରଖିବାକୁ ଆଗୁଆ ଅର୍ଥ ଦେଇଛି କେନ୍ଦ୍ର ସରକାର । ପୂର୍ବରୁ ଏସଡିଆରଏଫକୁ ବି ଆଗୁଆ ଅର୍ଥ ଦେଇଥିଲେ କେନ୍ଦ୍ର ସରକାର । ସେଥିରୁ ୫୦ ପ୍ରତିଶତ କରୋନା ପାଇଁ ମୁକାବିଲା ପାଇଁ କହିଥିଲେ । ଖୁସିର କଥା ପନ୍ଦରତମ ଅର୍ଥ କମିଶନ ଅନୁଦାନ ଆଗୁଆ ଦେଇଛନ୍ତି । ୩୩୩ କୋଟି ଓଡ଼ିଶାରେ ଖର୍ଚ୍ଚ ହେଲେ, ବିକାଶ ହେବ । ସଂକ୍ରମଣ ପାଇଁ ବିକାଶ ଯେଉଁଠି ଅଟକିଛି, ଆର୍ଥିକ ସ୍ଥିତି ସୁଧୁରିବାକୁ ଏହା ବେଶ ସହାୟକ ହେବ । ତେଣୁ କେନ୍ଦ୍ର ସରକାରଙ୍କୁ ଆମେ ଧନ୍ୟବାଦ ଦେଉଛୁ ।
ସେହିଭଳି କଂଗ୍ରେସ ନେତା ସୁର ରାଉତରାୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଜଣାଇଛନ୍ତି। ଏତେ ଦିନ ପରେ ତାଙ୍କ ନିଦ ଭାଙ୍ଗିଛି । କୋଭିଡ଼ ରୋଗୀ ପିଛା ଦୁଇ ଲକ୍ଷ ଖର୍ଚ୍ଚ କରାଯିବ। ରାଜ୍ୟଗୁଡିକୁ ଆର୍ଥିକ ସାହାଯ୍ୟ ଦିଆଯିବ ବୋଲି କେନ୍ଦ୍ର ସରକାର ଯେଉଁ ଘୋଷଣା କରିଛନ୍ତି ତାହା ସ୍ୱାସ୍ଥ୍ୟ ସେବା କ୍ଷେତ୍ରରେ ବହୁତ ଉପଯୋଗୀ ହେବ ।