ଓଡ଼ିଶା କରୁଛି କରୋନା ମୁକାବିଲା: କାହିଁକି ସୀମାକୁ ସିଲ୍ କରୁ ନାହାନ୍ତି ସରକାର? ଜଗିବାରେ କେଉଁଠି ରହିଛି ସମସ୍ୟା? ଲୋକଙ୍କ ମନର ଦ୍ୱନ୍ଦ୍ୱ ଦୂରକଲେ ବାଗଚୀ…
କନକ ବ୍ୟୁରୋ: ଯେତେବେଳେ ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ବଢୁଛି ଏବଂ ପରେ ସେହି ଆକ୍ରାନ୍ତଙ୍କ ଟ୍ରାଭେଲ ହିଷ୍ଟ୍ରିକୁ ନେଇ ସାଧାରଣ ଲୋଙ୍କ ମନରେ ବିଭିନ୍ନ ପ୍ରଶ୍ନ ଉଠୁଛି । ସେ ସୀମାପାର ହୋଇ କେମିତି ଆସୁଛନ୍ତି? ରାଜ୍ୟର ସୀମାକୁ ସିଲ୍ କାହିଁକି କରାଯାଉ ନାହିଁ ଏବଂ ପୋଲିସ କର୍ମୀ କ’ଣ କରୁଛନ୍ତି? ଏଭଳି ଅନେକ ପ୍ରଶ୍ନ ଲୋକମାନେ ପଚାରୁଛନ୍ତି । ସେହି ଦ୍ୱନ୍ଦକୁ ଦୂର କରିଛନ୍ତି ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ ।
Kanak News is now on WhatsApp
Join and get latest news updates delivered to you via WhatsApp
ସୁବ୍ରତ ବାଗଚୀଙ୍କ କହିବା ମୁତାବକ, ଓଡ଼ିଶା ସୀମାକୁ ସିଲ୍ କରିବା ବା ସେଠାରେ ପର୍ଯ୍ୟପ୍ତ ସୁରକ୍ଷାକର୍ମୀଙ୍କୁ ନିୟୋଜିତ କରିବା ସମ୍ଭବ ନୁହେଁ । କାରଣ ସୀମାକୁ ଲାଗି ରହିଥିବା ୪ଟି ରାଜ୍ୟ ଯଥା ପଶ୍ଚିମବଙ୍ଗ, ଝାଡ଼ଖଣ୍ଡ, ପଶ୍ଚିମବଙ୍ଗ, ଆନ୍ଧ୍ରପ୍ରଦେଶରୁ ଆମ ରାଜ୍ୟକୁ ମାଲବାହୀ ଗାଡ଼ି ଯୋଗେ ଖାଦ୍ୟ ସାମଗ୍ରୀ ଆସୁଛି । ଯାହା ଦ୍ୱାରା ଲକଡାଉନ୍ ସମୟରେ ରାଜ୍ୟ-ରାଜ୍ୟ ମାନଙ୍କ ମଧ୍ୟରେ ସମନ୍ୱୟତା ବଜାୟ ରହି ଖାଦ୍ୟ ସାମଗ୍ରୀ ନେବା ଆଣିବା କରାଯାଉଛି ।
କ’ଣ କହୁଛି ଓଡ଼ିଶା ସୀମା ରେଖାର ଅବସ୍ଥିତି
ପଶ୍ଚିମବଙ୍ଗ ସୀମାକୁ ଲାଗି ରହିଥିବା ଓଡ଼ିଶାର ନିକଟସ୍ଥ ଜିଲ୍ଲା ବାଲେଶ୍ୱର ଏବଂ ମୟୂରଭଞ୍ଜ ଏବଂ ଏହାର ଅବଧି ବା ପରିଧି ପାଖାପାଖି ୨୦୨ କିଲୋମିଟର । ସେହିଭଳି ଝାଡ଼ଖଣ୍ଡ ସୀମାକୁ ଲାଗି ରହିଥିବା ଜିଲ୍ଲା- ମୟୂରଭଞ୍ଜ, କେନ୍ଦୁଝର ଏବଂ ସୁନ୍ଦରଗଡ଼ । ଆଉ ଏହି ୩ଟି ଜିଲ୍ଲାର ପରିଧି ୫୯୧ କିଲୋମିଟର । ଅନ୍ୟପଟେ ଛତିଶଗଡ଼ ସୀମାକୁ ଲାଗି ରହିଛି ଓଡ଼ିଶାର ୮ଟି ଜିଲ୍ଲା । ସୁନ୍ଦରଗଡ଼, ଝାରସୁଗୁଡ଼ା, ବରଗଡ଼, ନୂଆପଡ଼ା, କଳାହାଣ୍ଡି, ନବରଙ୍ଗପୁର, କୋରାପୁଟ ଏବଂ ମାଲକାନଗିରି । ଏହାର ପରିଧି ୧ ହଜାର ୨୨୬ କିମି ରହିଛି ।
ସେହିଭଳି ଆନ୍ଧ୍ରପ୍ରଦେଶ ସୀମାକୁ ଲାଗି ରହିଥିବା ଓଡ଼ିଶାର ୫ଟି ଜିଲ୍ଲା ମଧ୍ୟରେ ଅଛି-କୋରାପୁଟ, ମାଲକାନଗିରି, ରାୟଗଡ଼ା, ଗଜପତି ଓ ଗଞ୍ଜାମ ୧ହଜାର ୨୪ କିଲୋମିଟର । ଏହାବାଦ ସମୂଦ୍ରତଟ କଥା ଯଦି ଦେଖିବା, ଜିଆଏସ୍ ତଥ୍ୟ ମ୍ୟାପିଂ ଅନୁଯାୟୀ ପ୍ରାୟ ୫୨୨ କିମି । ଏହି ସବୁ ସୀମାକୁ କୌଣସି ପୋଲିସ୍ ଆରକ୍ଷୀ ଏହାକୁ ଅଟକାଇ ପାରିବେ ନାହିଁ । କାରଣ ଏହି ସ୍ଥଳଭାଗ ସୀମା ଅଧିକାଂଶ ଜଙ୍ଗଲରେ ପରିପୂର୍ଣ୍ଣ । ତେଣୁ ଏହାକୁ ତନତନ କରି ଜଗିବା ସମ୍ଭବ ହେବ ନାହିଁ । ତେବେ ଏଭଳି ସ୍ଥିତିକୁ ବା ଆସୁଥିବା ଲୋକଙ୍କୁ ସଙ୍ଗରୋଧ କରିବାକୁ ପଞ୍ଚାୟତ ପ୍ରତିନିଧିମାନେ ହିଁ ଆମ ବଳ । ତେଣୁ ସେମାନଙ୍କୁ ସହଯୋଗ କରନ୍ତୁ ବୋଲି କହିଛନ୍ତି ସୁବ୍ରତ ବାଗଚୀ ।