ବିଲରେ ସଢୁଛି ଚାଷୀର ସ୍ୱପ୍ନ । ମାଲକାନଗିରିରେ ଏକର ଏକର ଜମିରେ ସଢୁଛି ପୋଟଳ, କାମାକ୍ଷାନଗରରେ ନଷ୍ଟ ହୋଇଗଲା ବହୁ ପରିମାଣର ପରିବା । କେମିତି ଚଳିବେ ଚିନ୍ତାରେ ଚାଷୀ…
କନକ ବ୍ୟୁରୋ: କରୋନା କଟକଣା ଚାଷୀଙ୍କ ପାଇଁ ଆଣିଛି କଷ୍ଟ । ଜମିରେ ଅମଳ ହେଉଛି ପନିପରିବା କିନ୍ତୁ କିଣିବାକୁ ଗରାଖ ନାହାନ୍ତି । ଫଳରେ ନଷ୍ଟ ହେଉଛି ଫସଲ । ଫୁଲ କୋବି, ଟମାଟୋ ପରେ ଏବେ ପୋଟଳର ଅଭାବୀ ବିକ୍ରୀ । ବିଲରେ ହିଁ ପଚି ସଢି ନଷ୍ଟ ହେଉଛି ଚାଷୀଙ୍କ ପୋଟଳ ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବୋଝ ଉପରେ ନଳିତା ବିଡ଼ା ଭଳି ଉଚିତ ମୂଲ୍ୟ ମିଳୁନାହିଁ କିମ୍ବା ପରିବା କିଣିବା ଲାଗି ବ୍ୟବସାୟୀ ମଧ୍ୟ ଆସୁନାହାନ୍ତି । କାଁ ଭାଁ କିଛି ବ୍ୟବସାୟୀ ଆସୁଛନ୍ତି । ତେବେ ଦର କିନ୍ତୁ ୧୦ରୁ ୧୨ ଟଙ୍କାରୁ ଅଧିକରେ ବିକ୍ରୀ ହୋଇପାରୁନାହ ିଁ । ଫଳରେ ରାସ୍ତାରେ ପାଚିଲା ପୋଟଳ ଫିଙ୍ଗି ପ୍ରତିବାଦ କରୁଛନ୍ତି ଚାଷୀ । ଏଭଳି ଦୃଶ୍ୟ ଦେଖିବାକୁ ମିଳିଛି ମାଲକାନଗିରି ଜିଲ୍ଲାର ତାର୍ଲାକଟା ଅଂଚଳରେ । ଏକର ଏକର ଜମିରେ ପୋଟଳ ଚାଷ ହୋଇଛି, କିନ୍ତୁ ସେ ସବୁ ଜମି ମୁଣ୍ଡରେ ହିଁ ନଷ୍ଟ ହେଉଛି । ଫଳରେ କରୋନା କଟକଣା ଆଣିଦେଇଛି ଦୁଃଖ ।
ସେପଟେ କାମାକ୍ଷା ନଗରରେ ବି ସମାନ ଅବସ୍ଥା । ଦିନରାତି ପରିଶ୍ରମ କରି ଭଲ ଦି ପଇସା ରୋଜଗାର କରିବା ଆଶା ରଖିଥିବା ଚାଷୀଙ୍କ ମୁଣ୍ଡରେ ପଡିଛି ଚଡକ । କରୋନା କଟକଣା ଯୋଗୁଁ ଅମଳ ପନିପରିବାକୁ ବିକ୍ରି କରି ପାରୁନାହାନ୍ତି କାମାକ୍ଷାନଗର ଅଂଚଳର ଚାଷୀ । ଫଳରେ ଜମିରେ ପଡି ରହି ନଷ୍ଟ ହେଉଛି ଭଳିକି ଭଳି ପରିବା । ଅନ୍ୟପଟେ ଧାର ଉଧାର କରି ଚାଷ କରିଥିବା ବେଳେ ଏବେ ମୂଳ ଆଦାୟ ହେବା ନେଇ ମଧ୍ୟ ଚିନ୍ତା ଘାରିଲାଣି । ଚାଷ ଓ ଚାଷୀଙ୍କ ସମସ୍ୟା ଏହି କରୋନା କଟକଣା ସମୟରେ ଅସହ୍ୟ ହୋଇ ପଡୁଛି ବୋଲି ଅଭିଯୋଗ କରୁଛନ୍ତି ଚାଷୀ ।