୧୦ ଜଣଙ୍କ ମୃତ୍ୟୁ ପରେ ଚେତିଲା ଶକ୍ତି ବିଭାଗ । ଏଣିକି ରାସ୍ତା କାମ କରିବା ଆଗରୁ ଶକ୍ତି ବିଭାଗର ଅନୁମତି ନେବ ଗ୍ରାମ୍ୟ ଉନ୍ନୟନ ବିଭାଗ । ଓହଳି ଥିବା ୧୧ କେଭି ତାରକୁ ଉଚ୍ଚ କରାଯିବ, ବିଦ୍ୟୁତ ନିରାପତ୍ତା ପାଇଁ ଟ୍ରେନିଂ ଦିଆଯିବ…
କନକ ବ୍ୟୁରୋ: ଗଂଜାମ ମାନ୍ଦ୍ରାଜପୁର ବସ ଦୁର୍ଘଟଣାରେ କାର୍ଯ୍ୟନୁଷ୍ଠାନ ନେଲେ ସରକାର । କାର୍ଯ୍ୟରେ ଅବହେଳା ଅଭିଯୋଗରେ ୩ ଜଣ ଯନ୍ତ୍ରୀ ଓ ସାଉଥକୋର ଜଣେ ଏସଡିପିଓ ନିଲମ୍ବିତ ହୋଇଛନ୍ତି । ବ୍ରହ୍ମପୁର ଇଲେକ୍ଟ୍ରିକାଲ ଡିଭିଜନ ଜେଇ ଓ ସହକାରୀ ଯନ୍ତ୍ରୀ ନିଲମ୍ବିତ ହୋଇଛନ୍ତି । ସାଉଥକୋ ଜେଇ ଦେବାଶିଷ ନାୟକ, ଏସଡିଓ ବିଶ୍ୱରଂଜନ ମହାପାତ୍ର ବି ନିଲମ୍ବିତ ହୋଇଛନ୍ତି । ସେହିପରି ଗଂଜାମ ଗ୍ରାମ୍ୟ ଉନ୍ନୟନ ବିଭାଗର ଯନ୍ତ୍ରୀ ଓ ସହକାରୀ ଯନ୍ତ୍ରୀଙ୍କୁ ମଧ୍ୟ ନିଲମ୍ବିତ କରାଯାଇଥିବା ନେଇ ସୂଚନା ଦେଇଛନ୍ତି ଶକ୍ତି ମନ୍ତ୍ରୀ ଦିବ୍ୟଶଙ୍କର ମିଶ୍ର ।
Kanak News is now on WhatsApp
Join and get latest news updates delivered to you via WhatsApp
ତେବେ ସବୁଠାରୁ ବଡ କଥା ହେଉଛି ଦୁର୍ଘଟଣାରେ ୧୦ ଜଣଙ୍କ ଅକାଳରେ ଜୀବନ ଯିବା ପରେ ଚେତିଛନ୍ତି ସରକାର, ଚେତିଛି ଶକ୍ତି ବିଭାଗ । ଏଣିକି ରାସ୍ତା କାମ କଲା ବେଳେ ବିଦ୍ୟୁତ ବିଭାଗର ଅନୁମତି ନେବ ଗ୍ରାମ୍ୟ ଉନ୍ନୟନ ବିଭାଗ । ପିଡବ୍ଲୁଡି, ଏନଏଚ ଓ ଆରଡି ବିଭାଗ ଶକ୍ତି ବିଭାଗ ଠାରୁ ଅନୁମତି ପାଇବା ପରେ ରାସ୍ତା ନିର୍ମାଣ କରିପାରିବେ । ତାସହ ଯେଉଁଠି ଯେଉଁଠି ୧୧ କେଭି ତାର ଓହଳିଛି ସେସବୁକୁ ଉଚ୍ଚ କରାଯିବ । ଏହାଛଡା ବିପଦ ସଙ୍କୁଳ ଭାବେ ତାର ଓହଳିଥିବା ସ୍ଥାନ ଗୁଡିକର ଚିହ୍ନଟ କରାଯାଇ, ତାହାର ମ୍ୟାପିଂ ବି କରାଯିବ । ସେହିପରି ନିରାପତ୍ତା ପାଇଁ କର୍ମଶାଳା ସହ ଜନସଚେତନତା କାମ ହାତକୁ ନିଆଯିବ । ରାଜ୍ୟର ସମସ୍ତ ଲାଇନମ୍ୟାନ ମାନଙ୍କୁ ମଧ୍ୟ ତାଲିମ ଦିଆଯିବ ବୋଲି କହିଛନ୍ତି ଶକ୍ତି ମନ୍ତ୍ରୀ ଦିବ୍ୟ ଶଙ୍କର ମିଶ୍ର ।
ତେବେ ବ୍ରହ୍ମପୁର ବସ ଦୁର୍ଘଟଣା ନେଇ ଶକ୍ତି ବିଭାଗକୁ ରିପୋର୍ଟ ଦେଇଛି ସାଉଥକୋ । ତଦନ୍ତ ରିପୋର୍ଟ ଦାଖଲ ପରେ ଦୁର୍ଘଟଣା ପାଇଁ ଗ୍ରାମ୍ୟ ଉନ୍ନୟନ ବିଭାଗକୁ ଦାୟୀ କରିଛି ସାଉଥକୋ । ଦୁର୍ଘଟଣାର ସବୁ ଦୋଷ ଗ୍ରାମ୍ୟ ଉନ୍ନୟନ ବିଭାଗ ଉପରକୁ ଠେଲିଛି ସାଉଥକୋ । ଆଉ ଗ୍ରାମ୍ୟ ଉନ୍ନୟନ ବିଭାଗର ଭୁଲ ପାଇଁ ହିଁ ଏତେ ବଡ ଘଟଣା ଘଟିଥିବା ରିପୋର୍ଟରେ ଉଲ୍ଲେଖ କରି ଆରଡି ମୁଣ୍ଡରେ ସିଧାସଳଖ ଅଠା ବୋଳିଛି ସାଉଥକୋ ।
ତେବେ ୨୦୧୮ରେ ରାସ୍ତା କାମ ପାଇଁ ଗ୍ରାମ ଉନ୍ନୟନ ବିଭାଗ ୩ରୁ ୪ ଫୁଟ ଉଚ୍ଚ କରିଥିଲା । ଯାହା ଫଳରେ ଭୂମି ଠାରୁ ବିଦ୍ୟୁତ ତାରର ଦୂରତା କମିଯାଇଥିଲା । ଯେଉଁଥିପାଇଁ ବସ ବିଦ୍ୟୁତ ସଂଯୋଜରେ ଆସି ଏତେ ବଡ ଅଘଟଣ ହେଲା ବୋଲି ରିପୋର୍ଟରେ ଦର୍ଶାଇଛି ସାଉଥକୋ । ତେଣୁ ଆଗାମୀ ଦିନରେ ରାଜ୍ୟରେ ଏଭଳି ଦୁର୍ଘଟଣାର ପୁନରାବୃତି ଯେମିତି ନହୁଏ ସେନେଇ ରଣନୀତି ପ୍ରସ୍ତୁତ କରିଛନ୍ତି ଶକ୍ତି ମନ୍ତ୍ରୀ ।