କନକ ବ୍ୟୁରୋ : ୧୦ ଦଫା ଦାବି ନେଇ ରାସ୍ତାକୁ ଓହ୍ଲାଇଛି ଓଡ଼ିଶା ଡ୍ରାଇଭର ମହାସଂଘ । କୋଭିଡ ଯୋଦ୍ଧାର ମାନ୍ୟତା ଦେବା ସହ ଭତ୍ତା ପ୍ରଦାନ କରିବାକୁ ଦାବି କରିଛିି ସଂଘ । ଏହି ପଦଯାତ୍ରାରେ ରାଜ୍ୟର ୩୦ ଜିଲ୍ଲାର ଡ୍ରାଇଭର ସାମିଲ ହୋଇଛନ୍ତି । ଡ୍ରାଇଭରଙ୍କ ଲାଇସେନ୍ସ ୨୫ ବର୍ଷରେ ରଦ୍ଦ ହେବା ନିୟମକୁ ପରିବର୍ତନ କରିବାକୁ ଦାବି କରିଛି ମହାସଂଘ । ଏହା ସହ ଡ୍ରାଇଭରଙ୍କ ସୁରକ୍ଷା ପାଇଁ ସ୍ୱତନ୍ତ୍ର ବ୍ୟବସ୍ଥା ଦାବି କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଦୁର୍ଘଟଣା ମୃତ୍ୟୁବରଣ କରିଥିବା ଡ୍ରାଇଭରଙ୍କୁ ୨୦ ଲକ୍ଷ, ଆହତ ଡ୍ରାଇଭରଙ୍କୁ ୧୦ ଲକ୍ଷ ବୀମାରାଶି ଦାବିରେ ଏହି ପଦ ଯାତ୍ରା କରୁଛି ମହାସଂଘ । ଏପରିକି ୬୦ ବର୍ଷରେ ପେନସନ ଦେବାକୁ ଦାବି କରାଯାଇଛି । ପୂର୍ବରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କୁ ଦାବି ଜଣାଇଥିଲା ମହାସଂଘ । ଏପର୍ଯ୍ୟନ୍ତ କୌଣସି ବ୍ୟବସ୍ଥା ହୋଇନଥିବାରୁ ଭୁବନେଶ୍ୱରରେ ଶକ୍ତି ପ୍ରଦର୍ଶନ କରୁଛି ଓଡ଼ିଶା ଡ୍ରାଇଭର ମହାସଂଘ । ଦାବି ପୂରଣ ନହେଲେ ଆଗାମି ଦିନରେ ଆନ୍ଦୋଳନକୁ ଆହୁରି ଜୋରଦାର କରିବାକୁ ଚେତାବନୀ ଦେଇଛି ଡ୍ରାଇଭର ମହାସଂଘ ।
ଡ୍ରାଇଭର ମହାସଂଘର ଆନ୍ଦୋଳନ ଯୋଗୁଁ ରାଜଧାନୀର ରାସ୍ତା ଜାମ୍ । ବହୁ ସଂଖ୍ୟାରେ ଡ୍ରାଇଭର ପଦଯାତ୍ରା କରିବା ଯୋଗୁଁ ରାସ୍ତାଘାଟ ଜାମ ହୋଇଯାଇଥିଲା । ବିଶେଷକରି ଅଫିସ ଯିବାର ସମୟ ହୋଇଥିବାରୁ ଭିଡ ଅଧିକ ହୋଇଥିଲା । ଯେଉଁମାନେ ଘରୁ ବାହାରି ଆସିଥିଲେ, ସେମାନେ ବାଟରେ ଫସି ଯାଇଥିଲେ । ଯିଏ ଯେଉଁଠି ଥିଲେ ସେଇଠି ଅଟକି ଯାଇଥିଲେ । ରାସ୍ତାରେ ଅଟକି ରହିଥିଲା ହଜାର ହଜାର ଗାଡି । ଟ୍ରାଫିକ୍ ନିୟନ୍ତ୍ରଣ ପାଇଁ କମିଶନରେଟ୍ ପୋଲିସକୁ ନାକେ ଦମ ହେବାକୁ ପଡିଛି ।