ଶଳା ଏବଂ ସ୍ତ୍ରୀଙ୍କ ଜରିଆରେ ଦୁର୍ନୀତିର ଜାଲ ବୁଣୁଥିଲେ କି ବିରଞ୍ଚି ସାହୁ । ମାମଲା ରୁଜୁ କରି ତଦନ୍ତ କରୁଛି ଭିଜିଲାନ୍ସ, ନିଯୁକ୍ତିରେ ଜାଲିଆତି ନେଇ ଲମ୍ବୁଛି ଅଭିଯୋଗର ଫର୍ଦ୍ଦ ।
କନକ ବ୍ୟୁରୋ : ଓଏସଏସସି ସଦସ୍ୟଙ୍କ ପିଏସ ବିରଞ୍ଚି ସାହୁଙ୍କ ଦୁର୍ନୀତିର ଖୋଳତାଡ ଭିଜିଲାନ୍ସ ଯେତେ କରୁଛି, ସେତେ ନୂଆ ନୂଆ ତଥ୍ୟ ସାମ୍ନାକୁ ଆସିଛି । ଏବେ ବିରଞ୍ଚିଙ୍କ ପତ୍ନୀ ଓ ଶଳା ନାଁରେ ମାମଲା ରୁଜୁ କରି ତଦନ୍ତ କରୁଛି ଭିଜିଲାନ୍ସ । ଏପରିକି ଆବଶ୍ୟକ ହେଲେ ବିରଂଚିଙ୍କୁ ରିମାଣ୍ଡରେ ଆଣି ପଚରା ଉଚରା କରାଯିବ ବୋଲି କହିଛନ୍ତି ଭିଜିଲାନ୍ସ ଏସପି । ସେପଟେ ୨୦୧୬ରେ ଆସିଷ୍ଟାଣ୍ଡ କମରସିଆଲ ଟ୍ୟାକ୍ସେସ ଅଫିସର ପରୀକ୍ଷାରେ ଅନିୟମିତତା ଅଭିଯୋଗ ଆଣି ସମସ୍ତଙ୍କ ଖାତା ସାର୍ବଜନୀନ କରିବାକୁ ଦାବି କରିଛନ୍ତି ପରୀକ୍ଷାର୍ଥୀ ।
Kanak News is now on WhatsApp
Join and get latest news updates delivered to you via WhatsApp
ଘରେ ଯେତେବେଳେ ଆୟବର୍ହିଭୂତ ସଂପତି ଠୁଳ ହୁଏ ଏବଂ ପୁଳାପୁଳା ଟଙ୍କା ଭିଜିଲାନ୍ସ ଜବତ କରେ, ସେତେବେଳେ ଜେଲର ଅନ୍ଧାର କୋଠରୀରେ ରାତି ବିତାଇବାକୁ ପଡ଼େ । ଆୟବର୍ହିଭୂତ ମାମଲାରେ ଗିରଫ ହୋଇଥିବା ଓଏସଏସସି ସଦସ୍ୟଙ୍କ ପିଏସ ବିଂରଚି ସାହୁଙ୍କୁ ଭୁବନେଶ୍ୱର ଝାରପଡ଼ା ଜେଲରେ ରାତି ବିତାଇବାକୁ ପଡ଼ିଛି ।
ଦୁର୍ନୀତିର ଚେର ଖୋଜୁଛି ଭିଜିଲାନ୍ସ । ନଜରରେ ବିରଂଚିଙ୍କ ପରିବାର ସଦସ୍ୟ । ଟଙ୍କା ଓ ସଂପତି ଠୁଳ କରିବାରେ ବିରଂଚି ସାହୁଙ୍କ ପତ୍ନୀ ଓ ତାଙ୍କ ଶଳାଙ୍କ ସଂପୃକ୍ତି ଥିବା ସନ୍ଦେହ କରି ଏହି ଦୁଇ ଜଣଙ୍କ ନାଁରେ ମାମଲା ରୁଜୁ କରିଛି ଭିଜିଲାନ୍ସ । ଆବଶ୍ୟକ ପଡିଲେ ପଚରାଉଚରା ପାଇଁ ବିରଂଚି ସାହୁଙ୍କୁ ରିମାଣ୍ଡରେ ଅଣାଯିବ ବୋଲି ସୂଚନା ଦେଇଛନ୍ତି ଭିଜିଲାନ୍ସ ଏସପି ଆର ପ୍ରକାଶ ।
କିନ୍ତୁ ପୁରା ପ୍ରକିୟାରେ ନିଯୁକ୍ତି ଦୁର୍ନୀତିର ସଂପୃକ୍ତି ଥିବା ସନ୍ଦେହ କରାଯାଉଛି । କାରଣ, ବିରଂଚିଙ୍କ ଘରୁ ପରୀକ୍ଷାର୍ଥୀଙ୍କ ଆଡମିଟ୍ କାର୍ଡ ମିଳିଛି । ତେବେ ଭିଜିଲାନ୍ସ ଏସପି କହିଛନ୍ତି, ନିଯୁକ୍ତି ପାଇଁ ଟଙ୍କା ନେଇଥିବା ଅଭିଯୋଗ ପ୍ରମାଣିତ ହୋଇନି । ଠକାମିର ଶିକାର ହୋଇଥିବା ଛାତ୍ରଛାତ୍ରୀ ଅଭିଯୋଗ କଲେ ତଦନ୍ତ କରାଯିବ ।
ଏପଟେ ଓଏସଏସସି ପରୀକ୍ଷାର ସ୍ୱଚ୍ଛତାକୁ ନେଇ ପ୍ରଶ୍ନ ଉଠାଇଛନ୍ତି ପରୀକ୍ଷାର୍ଥୀ । ଆସିଷ୍ଟାଣ୍ଡ କମରସିଆଲ ଟ୍ୟାକ୍ସେସ ଅଫିସର ପାଇଁ ଆବେଦନ କରିଥିବା ପରୀକ୍ଷାର୍ଥୀ, ସେମାନେ କେତେ ନମ୍ବର ରଖିଛନ୍ତି, ତାର ପେପର ଦେବାକୁ ଦାବି କରିଛନ୍ତି । ଅସାଧୁ ଉପାୟରେ ଚାକିରି କରିଥିବା ପିଲାଙ୍କ ଚାକିରୀ ବାତିଲ କରାଯିବା ସହ ଏହାର ତଦନ୍ତ ପାଇଁ ଦାବି କରିଛନ୍ତି ।
୨୦୧୬ରେ ଆସିଷ୍ଟାଣ୍ଡ କମରସିଆଲ ଟ୍ୟାକ୍ସେସ ଅଫିସର ପାଇଁ ୧୧୫ଟି ପୋଷ୍ଟ ବାହାରିଥିଲା । ୬୦ ହଜାରରୁ ଅଧିକ ପିଲା ଆବେଦନ କରିଥିବା ବେଳେ ୫୧୩ ଜଣ ମେନ୍ ପାଇଁ ଚୟନ ହୋଇଥିଲେ । ଏଥିିରେ ବିଶ୍ୱନାଥ ପଣ୍ଡା ନାମକ ଛାତ୍ର ସିଲେକ୍ଟ ହୋଇଥିଲେ । ହେଲେ ଟଙ୍କା ଦେଇନଥିବାରୁ ତାଙ୍କୁ ଚାକିରି ମିଳିନଥିବା ଅଭିଯୋଗ ହୋଇଛି । ଆଉ ଏସବୁ ଭିତରେ ବିରଂଚି ସାହୁଙ୍କ ୨ଟି ଆକାଉଂଟରୁ ଆହୁୁରି ୯ ଲକ୍ଷ ଟଙ୍କା ମିଳିଛି । ସୋମବାର ବ୍ୟାଙ୍କ ଖୋଲିବା ପରେ ବ୍ୟାଙ୍କରେ ଗଚ୍ଛିତ ଟଙ୍କାର ଛାନବିନ୍ କରିବ ଭିଜିଲାନ୍ସ ।