ପ୍ରଦୀପ ମାଝିଙ୍କୁ ନେଇ ଜାତୀୟ ଗଣମାଧ୍ୟମରେ ଚର୍ଚ୍ଚା । ହିଂସା ପାଇଁ ପେଟ୍ରୋଲ, ଡିଜେଲ ପ୍ରସ୍ତୁତ ରଖିବାକୁ କିଭଳି କର୍ମୀଙ୍କୁ କହୁଛନ୍ତି କଂଗ୍ରେସ ନେତା, ଖବର ପ୍ରକାଶ

କନକ ବ୍ୟୁରୋ: ପୂର୍ବତନ କଂଗ୍ରେସ ସାଂସଦ ପ୍ରଦୀପ ମାଝୀଙ୍କ ବୟାନକୁ ନେଇ ଜାତୀୟ ଗଣମାଧ୍ୟମରେ ଚର୍ଚ୍ଚା । କଂଗ୍ରେସ ନେତା ହିଂସା ପାଇଁ ଲୋକଙ୍କୁ ଉସୁକାଉଥିବା ଖବର ପ୍ରକାଶ କରିଛନ୍ତି ଜାତୀୟ ଗଣମାଧ୍ୟମ ଗୁଡିକ । ହିନ୍ଦି ଭାଷାଭାଷି ଅଂଚଳରେ ଲୋକପ୍ରିୟ ନ୍ୟୁଜ ଚ୍ୟାନେଲ ଆଜତକ ଏହି ଖବରକୁ ପ୍ରକାଶ କରି ଲେଖିଛି- କଂଗ୍ରେସ ନେତା କହିଲେ ପେଟ୍ରୋଲ, ଡିଜେଲ ପ୍ରସ୍ତୁତ ରଖ । ନିର୍ଦ୍ଦେଶ ମିଳିଲେ ସବୁକିଛି ଜାଳିଦେବ । ନାବାଳିକାଙ୍କୁ ଦୁଷ୍କର୍ମ ଓ ହତ୍ୟା ମାମଲାରେ ନବରଙ୍ଗପୁର ବନ୍ଦ ଡକରା ଦିଆଯାଇଥିଲା । ଆଉ ଏହି ସମୟରେ ପୂର୍ବତନ ସାଂସଦ ତଥା ବରିଷ୍ଠ କଂଗ୍ରେସ ନେତା ପ୍ରଦୀପ ମାଝୀ ହିଂସାକୁ ଉସୁକାଇଲା ଭଳି ବୟାନ ଦେଉଥିବାର ଚିତ୍ର କ୍ୟାମେରାରେ କଏଦ ହୋଇଥିବା ଲେଖିଛି ଆଜତକ୍ ।

ସେହିଭଳି ଇଂରାଜୀ ଖବରକାଗଜ ଫାଇନାନସିଆଲ ଏକ୍ସପ୍ରେସ ମଧ୍ୟ ସମାନ ଶିରୋନାମାରେ ଖବର ପ୍ରକାଶ କରିଛି । ଓଡିଶା କଂଗ୍ରେସ ନେତା କିଭଳି ହିଂସାକୁ ଉସୁକାଇବା ପାଇଁ ଫୋନରେ ପେଟ୍ରୋଲ ପ୍ରସ୍ତୁତ ରଖିବାକୁ କହୁଛନ୍ତି ତାହା ହିଁ ପ୍ରକାଶ କରିଛି ଫାଇନାନସିଆଲ ଏକ୍ସପ୍ରେସ । ଆଉଏକ ପ୍ରମୁଖ ଜାତୀୟ ଗଣମାଧ୍ୟମ ଜି-ନ୍ୟୁଜ ମଧ୍ୟ ପ୍ରଦୀପ ମାଝୀଙ୍କ ବିବାଦୀୟ ଭିଡିଓକୁ ସ୍ଥାନିତ କରିଛି । କଂଗ୍ରେସ ନେତାଙ୍କ ହିଂସା ସୃଷ୍ଟିକାରୀ ବୟାନ ଶୁଣିବା ପାଇଁ ଏହି ଗଣମାଧ୍ୟମ ଖବର ପ୍ରକାଶ କରିଛି । ପେଟ୍ରୋଲ, ଡିଜେଲ ପ୍ରସ୍ତୁତ ରଖିବା ସହ ନିର୍ଦ୍ଦେଶ ମିଳିବା ମାତ୍ରେ ସବୁକିଛି ଜାଳି ପୋଡି ଦେବାକୁ ବାୟନରେ କୁହାଯାଉଥିବା ଗଣମାଧ୍ୟମ ଲେଖିଛି ।

ବିଜେପି ଆଇଟି ସେଲ ମୁଖ୍ୟ ଅମିତ ମାଲବ୍ୟ, ନବରଙ୍ଗପୁର ବନ୍ଦ ପାଳନ ବେଳେ ପ୍ରଦୀପ ମାଝୀଙ୍କ ଏହି ବିବାଦୀୟ ବୟାନର ଭିଡିଓକୁ ଟ୍ୱିଟ କରିବା ସହ କଂଗ୍ରେସ ନେତା କିଭଳି ହିଂସାକୁ ଉସୁକାଇବା ପାଇଁ ପ୍ରୟାସ କରୁଛନ୍ତି, ତାହା ଜଣାଇବାକୁ ଚାହିଁଛନ୍ତି । ଏହାକୁ ସିଏଏ ପ୍ରତିବାଦ ସହ ଯୋଡି କଂଗ୍ରେସର ଅନ୍ତରୀଣ ସଭାପତି ସୋନିଆ ଗାନ୍ଧୀଙ୍କୁ ମଧ୍ୟ ସେ ଟାର୍ଗେଟ କରିଛନ୍ତି । ନାଗରିକତା ସଂଶୋଧନ ଆଇନକୁ ନେଇ ହେଉଥିବା ହିଂସାତ୍ମକ ପ୍ରତିବାଦକୁ ସମ୍ବୋଧନ କଲାବେଳେ ସୋନିଆ କାହିଁକି ଶାନ୍ତି ପାଇଁ ଅପିଲ କଲେନାହିଁ ବୋଲି ପ୍ରଶ୍ନ କରିଛନ୍ତି । ଏହାଦ୍ୱାରା କ୍ୟାଡର ଦ୍ୱନ୍ଦ୍ୱରେ ପଡିଯିବେ ବୋଲି କହି ସୋନିଆ ଗାନ୍ଧୀଙ୍କୁ ଟାର୍ଗେଟ କରିଛନ୍ତି ବିଜେପି ଆଇଟି ସେଲ ମୁଖ୍ୟ ।

ସେପଟେ, ବଢିଲା କଂଗ୍ରେସ ନେତା ପ୍ରଦୀପ ମାଝିଙ୍କ ଅଡୁଆ । ନିଆଁ ପାଇଁ ସମର୍ଥକଙ୍କୁ ଆହ୍ୱାନ ଦେଇ ଚର୍ଚ୍ଚାରେ  ଥିବା ପ୍ରଦୀପ ମାଝିଙ୍କ ନାଁରେ ମାମଲା ରୁଜୁ ହୋଇଛି ।  ନବରଙ୍ଗପୁର ପୋଲିସ ନିଜଆଡୁ ମାମଲା ରୁଜୁ କରିଛି   । ଗତକାଲି ନବରଙ୍ଗପୁରରେ ବନ୍ଦ ପାଳନ ବେଳେ ସେ ନିଆଁ ଲଗାଇବାକୁ ସମର୍ଥକକୁ ଆହ୍ୱାନ ଦେଇଥିଲେ । ଫୋନ୍ ଯୋଗେ ନିଆଁ ଲଗାଇବା ପାଇଁ କହୁଥିବା ବେଳେ କ୍ୟାମେରାରେ ସେହି ଭିଡିଓ କଏଦ ହୋଇଥିଲା । ନିଜ ସୁରକ୍ଷା ଓ ହକ ପାଇଁ କଂଗ୍ରେସ ସୁବାସ ବୋଷଙ୍କ ନୀତି ଆପଣେଇବ ବୋଲି କହିଥିଲେ ନବରଙ୍ଗପୁରର ପୂର୍ବତନ ସାଂସଦ ।