ଆଜି ବମ୍ବେ ଷ୍ଟକ୍ ଏକ୍ସଚେଞ୍ଜ ଓପନିଂ ବେଲ୍ ବଜାଇବେ ମୁଖ୍ୟମନ୍ତ୍ରୀ : ବାଜିବାର ୧୫ ମିନିଟ୍ ପରେ ଆରମ୍ଭ ହେବ ବିଡିଂ
କନକ ବ୍ୟୁରୋ : ମୁମ୍ବାଇ ଗସ୍ତରେ ଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ବମ୍ବେ ଷ୍ଟକ ଏକ୍ସଚେଞ୍ଜର ଓପନିଂ ବେଲ୍ ବଜାଇବେ । ସକାଳ ୯ଟା ବେଳେ ନବୀନ ବେଲ୍ ବଜାଇବେ । ବିଏସଇର ଓପନିଂ ବେଲ ବଜାଇ ଷ୍ଟକ ଏକ୍ସଚେଞ୍ଜର କାରବାର ଆରମ୍ଭ କରିବାକୁ ସଂକେତ ଦେବେ ନବୀନ । ଯାହାର ୧୫ ମିନିଟ ପରେ ଟ୍ରେଡିଂ ଆରମ୍ଭ ହେବ । ଟ୍ରେଡିଂ ଆରମ୍ଭ ହେବା ପୂର୍ବରୁ ବେଲ୍ ବଜାଇବାର ପରମ୍ପରା ରହିଛି । ଜାତୀୟ ସ୍ତରରେ ଏବେ ନବୀନଙ୍କ ପତିଆରା ବଢ଼ିବାରେ ଲାଗିଛି । ଏଥିପାଇଁ ନିକଟରେ ତାଙ୍କୁ ଜୀବନବ୍ୟାପି ସାଧନା ପାଇଁ ସମ୍ବର୍ଦ୍ଧିତ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହି କ୍ରମରେ ମୁଖ୍ୟମନ୍ତ୍ରୀ ପ୍ରଥମଥର ବମ୍ବେ ଷ୍ଟକ ଏକ୍ସଚେଞ୍ଜର ଓପନିଂ ବେଲ୍ ବଜାଇବେ । ତାଙ୍କ ପୂର୍ବରୁ ବହୁ ବିଶିଷ୍ଟ ବ୍ୟକ୍ତି ବମ୍ବେ ଷ୍ଟକ ଏକ୍ସଚେଞ୍ଜର ଓପନିଂ ବେଲ୍ ବଜାଇ ସାରିଛନ୍ତି । ବଲିଉଡର ବିଗ୍ ବି’ କୁହାଯାଉଥିବା ଅମିତାଭ ବଚ୍ଚନ, ଉତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଏହି ବେଲ୍ ବଜାଇଛନ୍ତି । ମୁମ୍ବାଇ ଗସ୍ତରେ ଥିବା ନବୀନ ପ୍ରଥମ ଦିନରେ ଅର୍ଥାତ୍ ବୁଧବାର ବିଶିଷ୍ଟ ଶିଳ୍ପପତି ଓ ବ୍ୟାଙ୍କର୍ସଙ୍କୁ ଭେଟିଥିଲେ । ଆସନ୍ତା ନଭେମ୍ବରରେ ହେବାକୁଥିବା ମେକ ଇନ୍ ଓଡ଼ିଶା ସମ୍ମିଳନୀ ପାଇଁ ମୁଖ୍ୟମନ୍ତ୍ରୀ ସମସ୍ତ ଶିଳ୍ପପତିଙ୍କୁ ଆମନ୍ତ୍ରଣ କରିଛନ୍ତି ।
ଏହି ଅବସରରେ ମୁଖ୍ୟମନ୍ତ୍ରୀ ‘ମେକ୍ ଇନ୍ ଓଡ଼ିଣା’ ସମ୍ମିଳନୀ ସମ୍ପର୍କରେ ଆଲୋଚନା କରିବା ସହ ଓଡ଼ିଶାରେ ବ୍ୟବସାୟ କରିବାର ସୁନ୍ଦର ସମ୍ଭାବନା, ଅନୁକୂଳ ବାତାବରଣ ଥିବା ନେଇ ଶିଳ୍ପପତି ଓ ବ୍ୟାଙ୍କ ମୁଖ୍ୟମାନଙ୍କୁ ଅବଗତ କରାଇଥିଲେ । ମୁଖ୍ୟମନ୍ତ୍ରୀ ଭେଟିଥିବା ଶିଳ୍ପପତିମାନଙ୍କ ଭିତରେ ବେଦାନ୍ତ ଗ୍ରୁପର ଅଧ୍ୟକ୍ଷ ଅନୀଲ ଅଗ୍ରୱାଲ, ଆଦିତ୍ୟ ବିର୍ଲା ଗ୍ରୁପର ଅଧ୍ୟକ୍ଷ କୁମାର ମଙ୍ଗଳମ ବିର୍ଲା, ମହିନ୍ଦ୍ରା ଗ୍ରୁପର ମୁଖ୍ୟ ଆନନ୍ଦ ମହିନ୍ଦ୍ରା, ଏସବିଆଇ ଅଧ୍ୟକ୍ଷ ଦିନେଶ କୁମାର ଖରା ଆଦି ରହିଛନ୍ତି ।