କନକ ବ୍ୟୁରୋ: ମୁମ୍ବାଇ କ୍ରୁଜ୍ ଡ୍ରଗ୍ସ ମାମଲାରେ ହଟିଲେ ଏନସିବି ଅଧିକାରୀ ସମୀର ୱାଙ୍ଖଡେ । ଏଣିକି ଆରୟନ ଖାନ୍ କେସ୍ର ତଦନ୍ତ କରିବେ ଏନିସିବି ଅଧିକାରୀ ସଞ୍ଜୟ ସିଂହ । ଆରୟନ ଖାନ୍ ମାମଲା ସହ ଅନ୍ୟ ୬ଟି ଡ୍ରଗ୍ସ କେସ୍ର ଯାଂଚ ପାଇଁ ସଂଜୟ ସିଂହ ଦିଲ୍ଲୀରୁ ମୁମ୍ବାଇ ଆସିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆରୟନ ଖାନଙ୍କ ସମେତ ଅନ୍ୟ ୬ଟି ଡ୍ରଗ୍ସ ମାମଲାର ଯାଂଚ କରୁଥିବା ତଦନ୍ତ ଅଧିକରୀ ପଦରୁ ହଟିଲେ ଏନସିବି ଅଧିକାରୀ ସମୀର ୱାଙ୍ଖଡେ । ଏଣିକି ଏହି ସମସ୍ତ ମାମଲାର ଯାଂଚ କରିବେ ଏନସିବି ଏସଆଇଟି ମୁଖ୍ୟ ସଂଞ୍ଜୟ ସିଂହ । ଏନେଇ ଶୁକ୍ରବାର ଦିଲ୍ଲୀ ନାର୍କୋଟିକ୍ସ କଂଟ୍ରୋଲ ବ୍ୟୁରୋ ଘୋଷଣା କରିବା ପରେ ଶନିବାର ମୁମ୍ବାଇ ପହଁଚିଛନ୍ତି ସଂଞ୍ଜୟ ସିଂହ । ଯାହାକୁ ନେଇ ଖୁସି ଜାହିର କରିଛନ୍ତି ଏନସିପି ନେତା ନୱାବ ମଲ୍ଲିକ ।
ଆରୟନ ଖାନ ମାମଲାର ତଦନ୍ତ ଭାର ଏବେ ସଂଜୟ ସିଂହଙ୍କ ହାତକୁ ଯାଇଛି । ତେବେ କିଏ ଏହି ସଂଜୟ ସିଂହ । ଆଉ ତାଙ୍କୁ କାହିଁକି ଏହି ମାମଲାର ତଦନ୍ତ ଭାର ହସ୍ତାନ୍ତର କରାଗଲା ।
– ୧୯୯୬ ବ୍ୟାଚ ଓଡିଶା କ୍ୟାଡର ର ଆଇପିଏସ ଅଧିକାରୀ ସଂଜୟ ସିଂହ
– ଓଡ଼ିଶା ପୁଲିସରେ ଆଡିସନାଲ କମିଶନର ଦାୟିତ୍ୱ ପଦ ତୁଲାଇଥିଲେ
– ଓଡ଼ିଶା ପୁଲିସରେ ଆଇଜି ପଦ ମଧ୍ୟ ସମ୍ଭାଳିଛନ୍ତି ସଂଜୟ ସିଂହ
– ସିବିଆଇରେ ଦାୟିତ୍ୱ ତୁଲାଉଥିବାବେଳେ କମନ ୱେଲଥ ଗେମ ଘୋଟାଲାର ପର୍ଦ୍ଦଫାଶ କରିଥିଲେ
ଆଉ ଏବେ ସଂଜୟ ସିଂହଙ୍କ ନେତୃତ୍ୱରେ ମୁମ୍ବାଇ କ୍ରୁଜ୍ ଡ୍ରଗ୍ସ କାଣ୍ଡର ପର୍ଦ୍ଦାଫାଶ କରିବ ଏନସିବି । ସେପଟେ ସମୀର ୱାଙ୍ଖଡେ କହିଛନ୍ତି ତାଙ୍କୁ ଦାୟିତ୍ୱରୁ ହଠାଇ ଦିଆଯାଇ ନାହିଁ, ବରଂ ସେ ନିଜେ ଏ ମାମଲାରୁ ଓହରିବା ପାଇଁ ଆବେଦନ କରିଥିଲେ । ଅନ୍ୟପଟେ ମୁମ୍ବାଇ କ୍ରୁଜ ଡ୍ରଗ୍ସ ମାମଲାରେ ଆସିଛି ନୂଆ ମୋଡ । ଏନସିପି ବିରୋଧରେ ଠୋସ ପ୍ରମାଣ ଆଣି ସାମ୍ବାଦିକ ସମ୍ମିଳନୀ କରିଛନ୍ତି ବିଜେପି ନେତା ମୋହିତ କମ୍ବୋଜ । ପୂରା ମାମଲାର ମାଷ୍ଟର ମାଇଣ୍ଡ ଏନସିପି ନେତା ସୁନୀଲ ପାଟିଲ ବୋଲି କହିଛନ୍ତି ମୋହିତ ।
ଆରୟନ ଖାନଙ୍କୁ ଗିରଫ କରିବା ପରଠାରୁ ବିବାଦକୁ ଆସିଯାଇଥିଲେ ଏନସିବି ଅଧିକାରୀ ସମୀର ୱାଙ୍ଖଡେ । ଘଟଣାକୁ ନେଇ ତାଙ୍କ କର୍ମଜୀବନରୁ ଆରମ୍ଭ କରି ତାଙ୍କ ବ୍ୟକ୍ତିଗତ ଜୀବନ ମଧ୍ୟ ଚର୍ଚ୍ଚାକୁ ଆସିଲା । ଆରୟନ ଖାନଙ୍କୁ ଛାଡିବା ପାଇଁ ସମୀର ୱାଙ୍ଖଡେ ଲାଂଚ ମାଗିଥିବା ଅଭିଯୋଗ ହୋଇଥିଲା । ଆଉ ଏଥିପାଇଁ ତଦନ୍ତ ପରିସରଭୁକ୍ତ ହୋଇଛନ୍ତି ମୁମ୍ବାଇ ଏନସିବି ଜୋନାଲ ଡିରେକ୍ଟର ସମୀର ୱାଙ୍ଖଡେ । ଏବେ ଦେଖିବାକୁ ବାକି ରହିଲା, ଏହି ଘଟଣା ଆଗକୁ କେଉଁ ମୋଡ ନେଉଛି ।