୩ ନୂଆ କ୍ୟାବିନେଟ୍ ମନ୍ତ୍ରୀ ନେଲେ ଶପଥ । ଉତ୍ତର, ଦକ୍ଷିଣ, ପଶ୍ଚିମ ଓଡିଶା ନେତାଙ୍କୁ ମନ୍ତ୍ରିପଦ ଦେଇ ୨୦୨୪ ପାଇଁ ବଡ଼ ବାର୍ତ୍ତା ଦେଲେ କି ନବୀନ?
କନକ ବ୍ୟୁରୋ: ସବୁ କଳ୍ପନା ଜଳ୍ପନାର ଅନ୍ତ ଘଟାଇ ତିନି ନୂଆ ମନ୍ତ୍ରୀଙ୍କୁ ମନ୍ତ୍ରିମଣ୍ଡଳରେ ସ୍ଥାନ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭଞ୍ଜନଗର ବିଧାୟକ ବିକ୍ରମ କେଶରୀ ଆରୁଖ, ବାଙ୍ଗିରିପୋଷି ବିଧାୟକ ସୁଦାମ ମାର୍ଣ୍ଡି ଓ ରାଉରକେଲା ବିଧାୟକ ସାରଦା ପ୍ରସାଦ ନାୟକ ନୂଆ ମନ୍ତ୍ରୀ ଭାବେ ଶପଥ ନେଇଛନ୍ତି । ଆଉ ଶପଥ ଗ୍ରହଣ ପରେ ତିନି ଜଣଙ୍କୁ ବିଭାଗ ବି ବଣ୍ଟନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ବିକ୍ରମ ଆରୁଖ, ସୁଦାମ ମାର୍ଣ୍ଡି,ସାରଦା ନାୟକଙ୍କୁ ମନ୍ତ୍ରିମଣ୍ଡଳରେ ସାମିଲ କରି ନବୀନ ପୁଣି ଥରେ ମାଷ୍ଟରଷ୍ଟ୍ରୋକ୍ ଖେଳିଛନ୍ତିି । ନବୀନ ଉତ୍ତର ଓଡିଶା, ପଶ୍ଚିମ ଓଡିଶା ଓ ଦକ୍ଷିଣ ଓଡିଶାକୁ ଫୋକସ କରି ଏହି ୩ ଜଣ ମନ୍ତ୍ରୀଙ୍କୁ ବାଛିଛନ୍ତି ।
- ବିକ୍ରମ ଆରୁଖଙ୍କୁ ମିଳିଲା ଅର୍ଥମନ୍ତ୍ରୀ ପଦ
- ସୁଦାମ ମାର୍ଣ୍ଡିଙ୍କୁ ସ୍କୁଲ ଓ ଗଣଶିକ୍ଷା ବିଭାଗ
- ଶ୍ରମ ମନ୍ତ୍ରୀ ହେଲେ ଶାରଦା ନାୟକ
ବିକ୍ରମ ଆରୁଖ
ଗଞ୍ଜାମ ଜିଲ୍ଲା ତଥା ଦକ୍ଷିଣ ଓଡିଶାର ଜଣେ ଟାଣୁଆ ଓ ବରିଷ୍ଠ ନେତା । ମନ୍ତ୍ରୀ ଶ୍ରୀକାନ୍ତ ସାହୁ ଇସ୍ତଫା ଦେବା ପରେ, ବିକ୍ରମଙ୍କ ଉପରେ ଭରସା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତାଙ୍କୁ ଅର୍ଥ ବିଭାଗ ଭଳି ଗୁରୁତ୍ୱପୂର୍ଣର୍ ବିଭାଗର ଦାୟିତ୍ୱ ଦେଇଛନ୍ତି । ଚର୍ଚ୍ଚା ହେଉଛି ପୂର୍ବତନ ମନ୍ତ୍ରୀ ସୂର୍ଯ୍ୟପାତ୍ର ଅସୁସ୍ଥ ହେବା, ଉଷା ଦେବୀ ସଂଗଠନରୁ ଦୂରେଇ ରହିବା, ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଦଳ ବିରୋଧରେ ଓହ୍ଲାଇବା, ଗଞ୍ଜାମ ଜିଲ୍ଲାରେ ବିଜେଡି ସଂଗଠନ ଦୁର୍ବଳ କରିଛି । ଆଉ ଏତିକିବେଳେ ବିକ୍ରମ ଆରୁଖଙ୍କୁ ନବୀନ ମନ୍ତ୍ରିମଣ୍ଡଳରେ ସାମିଲ କରି, ଗଞ୍ଜାମର ଭୋଟରଙ୍କୁ ସ୍ୱତନ୍ତ୍ର ବାର୍ତା ଦେବାକୁ ଉଦ୍ୟମ କରିଛନ୍ତିି ନବୀନ । ତେବେ ମନ୍ତ୍ରୀ ହେବା ପରେ ବିକ୍ରମ କହିଛନ୍ତିି, ନବୀନ ତାଙ୍କୁ ଯାହା ଦାୟିତ୍ୱ ଦେବେ ସେ ତୁଲାଇବେ ।
ସୁଦାମ ମାର୍ଣ୍ଡି
ସ୍କୁଲ ଓ ଗଣ ଶିକ୍ଷାମନ୍ତ୍ରୀ ଦାୟିିତ୍ୱ ଦେଇଛନ୍ତିି ନବୀନ । କୁହାଯାଉଛି, ମୟୂରଭଞ୍ଜ ଜିଲ୍ଲାର ବିଧାୟକ ଥିବା ସୁଦାମଙ୍କୁ ୧୧ମାସ ପରେ ପୁଣି ଥରେ ମନ୍ତ୍ରୀ କରିବା ପଛରେ ଉଦେଶ୍ୟ ହେଉଛି, ଆଦିବାସୀ ଭୋଟ୍ । ଯେହେତୁ ମୟୂରଭଞ୍ଜର ଝିଅ ରାଷ୍ଟ୍ରପତି ହୋଇଛନ୍ତି, ମୟୂରଭଞ୍ଜର ସାଂସଦ କେନ୍ଦ୍ରରେ ମନ୍ତ୍ରୀ ଅଛନ୍ତି, ସେଥିପାଇଁ ନବୀନ ସୁଦାମଙ୍କୁ ମନ୍ତ୍ରିମଣ୍ଡଳରେ ସାମିଲ କରି ସରକାର ଓ ସଂଗଠନକୁ ମଜଭୁତ କରିବାକୁ ଉଦ୍ୟମ କରିଛନ୍ତି ।
ସାରଦା ପ୍ରସାଦ ନାୟକ
ଝାରସୁଗୁଡା ଉପନିର୍ବାଚନ ପରେ ତାଙ୍କୁ ପୁରସ୍କୃତ କରାଯାଇଥିବା କଥା କୁହାଯାଉଛି । କିନ୍ତୁ ସାରଦାଙ୍କୁ ମନ୍ତ୍ରିମଣ୍ଡଳରେ ସାମିଲ କରିବା ପଛରେ ରାଜନୈତିକ କାରଣ ଥିବା ଆଲୋଚନା ହେଉଛି । ୨୦୧୯ ନିର୍ବାଚନରେ ବିପର୍ଯ୍ୟୟର ସାମନା କରିଥିଲା ବିଜେଡି । ସଂସଦୀୟ କ୍ଷେତ୍ର ହାତରୁ ଯିବା ସହିତ ୫ଟି ବିଧାନସଭା କ୍ଷେତ୍ର ଯାଇଥିଲା । ତେଣୁ ସାରଦାଙ୍କୁ ମନ୍ତ୍ରୀ କରି ପଶ୍ଚିମ ଓଡିଶାର ସଂଗଠନକୁ ସଜାଡିବା ଲକ୍ଷ୍ୟରେ ରହିଛି ଦଳ ।
ମନ୍ତ୍ରିମଣ୍ଡଳରୁ ଗୋଟିଏ ବାର୍ତ୍ତା ସ୍ପଷ୍ଟ ଯେ, ମନ୍ତ୍ରିମଣ୍ଡଳ ଅଦଳବଦଳ ଛୋଟ ହେଲେ ବି ଏହା ପଛରେ ରହିଛି ଆଗାମୀ ନିର୍ବାଚନ ପାଇଁ ନବୀନଙ୍କ ସ୍ୱତନ୍ତ୍ର ରଣନୀତି ।