ବଢ଼ିଚାଲିଛି ଓଡ଼ିଶାର ଋଣଭାର : ବେତନ, ଭତ୍ତା, ପେନସନରେ ଖର୍ଚ୍ଚ ହୋଇଯାଉଛି ରାଜ୍ୟ ସରକାର ଆଦାୟ କରୁଥିବା ଟଙ୍କା
କନକ ବ୍ୟୁରୋ : ଓଡ଼ିଶା ସରକାର ଟିକସ ଓ ଅଣ-ଟିକସ ବାବଦରେ ଯେତେ ଅର୍ଥ ସଂଗ୍ରହ କରୁଛନ୍ତି ତାହାର ଅଧିକାଂଶ ଭାଗ କର୍ମଚାରୀଙ୍କ ବେତନ, ଭତ୍ତା, ପେନସନ୍ ଓ ଦପ୍ତର ପରିଚାଳନାରେ ଖର୍ଚ୍ଚ ହୋଇଯାଉଛି। ବିଧାୟକ ଦିଲ୍ଲୀପ ରାୟଙ୍କ ଏକ ପ୍ରଶ୍ନର ଉତ୍ତରରେ ଅର୍ଥମନ୍ତ୍ରୀ ଶଶିଭୂଷଣ ବେହେରା ଦେଇଥିବା ତଥ୍ୟରୁ ଏହା ଜଣାପଡ଼ିଛି। ୨୦୧୭-୧୮ ବର୍ଷରେ ବେତନ ଓ ଭତ୍ତା ବାବଦକୁ ୧୮,୩୩୫ କୋଟି ୫୮ ଲକ୍ଷ ଟଙ୍କା ଖର୍ଚ୍ଚ ହୋଇଥିବା ବେଳେ ପେନସନ୍ ବାବଦରେ ୮,୬୯୨ କୋଟି ୮୬ ଲକ୍ଷ ଟଙ୍କା ଓ ଦପ୍ତର ପରିଚାଳନା ପାଇଁ ୪୫୪ କୋଟି ୨୩ ଲକ୍ଷ ଟଙ୍କା ଖର୍ଚ୍ଚ ହୋଇଛି।
Kanak News is now on WhatsApp
Join and get latest news updates delivered to you via WhatsApp
ଚଳିତ ଆର୍ଥକ ବର୍ଷରେ ବେତନ ଓ ଭତ୍ତା ବାବଦକୁ ୨୭,୨୪୦ କୋଟି ୨୭ ଲକ୍ଷ ଓ ପେନସନ୍ ବାବଦରେ ୧୧,୯୧୨ କୋଟି ଟଙ୍କା ଖର୍ଚ୍ଚ ହେବାକୁ ଥିବା ବେଳେ ଦପ୍ତର ପରିଚାଳନା ପାଇଁ ୪୯୨ କୋଟି ୭୫ ଲକ୍ଷ ଟଙ୍କା ଖର୍ଚ୍ଚର ଆକଳନ କରାଯାଇଛି। ଚଳିତ ଆର୍ଥକ ବର୍ଷରେ ରାଜ୍ୟ ସରକାର ଟିକସ ବାବଦକୁ ୨୮,୫୫୦ କୋଟି ଓ ଅଣଟିକସ ବାବଦକୁ ୧୦,୩୦୦ କୋଟି ଟଙ୍କା ସଂଗ୍ରହ କରିବା ପାଇଁ ଲକ୍ଷ୍ୟ ଧାର୍ଯ୍ୟ କରିଥିବା ବେଳେ ଚଳିତ ଆର୍ଥକ ବର୍ଷର ଜୁଲାଇ ଶେଷ ସୁଦ୍ଧା ଟିକସ ବାବଦକୁ ୯,୪୪୮ କୋଟି ୪୯ ଲକ୍ଷ ଟଙ୍କା ଓ ଅଣଟିକସ ବାବଦକୁ ୩୬୦୦ କୋଟି ୧୮ ଲକ୍ଷ ଟଙ୍କା ଆଦାୟ ହୋଇଥିବା ସରକାର ସୂଚାଇଛନ୍ତି। ୨୦୧୦-୧୧ରୁ ୨୦୧୫-୧୬ ପର୍ଯ୍ୟନ୍ତ ୬ ବର୍ଷରେ ରାଜ୍ୟ ସରକାର ବେତନ, ଭତ୍ତା, ପେନସନ୍ ଓ ଦପ୍ତର ପରିଚାଳନା ଲାଗି ୧,୧୩,୭୮୯ କୋଟି ୭୧ ଲକ୍ଷ ଟଙ୍କା ବ୍ୟୟ କରିଥିବା ବେଳେ ଏହି ବର୍ଷ ଗୁଡ଼ିକରେ ୧,୪୩,୩୭୮ କୋଟି ୫୪ ଲକ୍ଷ ଟଙ୍କା ନିଜସ୍ୱ ଟିକସ ଓ ଅଣଟିକସ ବାବଦରେ ଆଦାୟ କରିଥିଲେ।
ଦିଲ୍ଲୀପ ରାୟଙ୍କ ଅନ୍ୟ ଏକ ପ୍ରଶ୍ନର ଉତ୍ତରରେ ଅର୍ଥ ମନ୍ତ୍ରୀ କହିଛନ୍ତି ଯେ ଋଣଭାର ଗତ ଜୁଲାଇ ମାସ ଶେଷ ସୁଦ୍ଧା ୭୬ ହଜାର ୪୨୮ କୋଟି ୪୧ ଲକ୍ଷ ଟଙ୍କାରେ ପହଞ୍ଚିଛି। ଗତ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟ ସରକାରଙ୍କର ମୁଣ୍ଡପିଛା ହାରାହାରି ଋଣ ପରିମାଣ ପ୍ରାୟ ୧୬,୪୫୧ ଟଙ୍କା ଥିଲା। ୨୦୦୮-୦୯ ବର୍ଷ ଶେଷ ସୁଦ୍ଧା ରାଜ୍ୟ ସରକାରଙ୍କ ଋଣଭାର ୩୬ ହଜାର ୪୩୦ କୋଟି ୫୪ ଲକ୍ଷ ଟଙ୍କା ଥିବା ବେଳେ ୨୦୧୦-୧୧ରେ ଏହା ୩୯ ହଜାର ୧୩୬ କୋଟି ୯୧ ଲକ୍ଷ ଓ ୨୦୧୭-୧୮ ବର୍ଷ ଶେଷ ସୁଦ୍ଧା ୭୩ ହଜାର ୮୬୪ କୋଟି ୬୬ ଲକ୍ଷ ଟଙ୍କାରେ ପହଞ୍ଚିଥିଲା।
ରାଜ୍ୟ ସରକାର ଯେତେ ପରିମାଣର ଋଣ କରୁଛନ୍ତି ତାହା ତୁଳନାରେ ପରିଶୋଧ ଢେର୍ କମ୍ ରହୁଛି। ରାଜ୍ୟ ସରକାରଙ୍କ ପକ୍ଷରୁ ଯୁକ୍ତି ହେଉଛି ଯେ ଏଫଆରବିଏମ୍ ଆଇନରେ ଋଣ ପାଇଁ ଯେଉଁ ସୀମା ଧାର୍ଯ୍ୟ କରାଯାଇଛି ଏଯାବତ୍ ଋଣର ପରିମାଣ ତାହା ଭିତରେ ରହିଛି। ଏବେ ଠାରୁ ଋଣଭାର ପ୍ରତି ସରକାର ସତର୍କ ନରହିଲେ ଚଳିତ ଆର୍ଥକ ବର୍ଷ ଶେଷ ରାଜ୍ୟର ଋଣ ବୋଝ ପ୍ରାୟ ୯୨ ହଜାର କୋଟି ଟଙ୍କାରେ ପହଞ୍ଚିବ ଏବଂ ଆସନ୍ତା ବର୍ଷକୁ ତାହା ଲକ୍ଷେ କୋଟି ଟଙ୍କାକୁ ଟପିଯିବ ବୋଲି ଶ୍ରୀ ରାୟ ଆଶଙ୍କା ବ୍ୟକ୍ତ କରିଛନ୍ତି।