ମଦରୁ ମିଳୁଛି କେତେ ? ୧୦ ବର୍ଷରେ ରାଜ୍ୟ ସରକାର ମଦରୁ କେତେ ରୋଜଗାର କରିଛନ୍ତି, ହିସାବ ଦେଲେ ମନ୍ତ୍ରୀ
ବିଗତ ୧୦ ବର୍ଷରେ ରାଜ୍ୟ ସରକାର ୪ ଗୁଣା ବର୍ଦ୍ଧିତ ରାଜସ୍ୱ ପାଇଛନ୍ତି । ଆଗକୁ ମଧ୍ୟ ପାଇବେ । ତେବେ ମଦରୁ ଭଲ ରାଜସ୍ୱ ମିଳୁଥିବାରୁ ଖାସ ସେଇଥିପାଇଁ ମଦ ଦୋକାନୀଙ୍କୁ ରାଜ୍ୟ ସରକାର ପ୍ରୋତ୍ସାହନ ଦେଉଥିବା ଚର୍ଚ୍ଚା ହେଉଛି ।
କନକ ବ୍ୟୁରୋ: ବିଧାନସଭାରେ ଥମୁନି ମଦ ଝଡ । ଯେବେ ଠାରୁ ସରକାର ମଦ ଦୋକାନୀଙ୍କୁ ପ୍ରୋତ୍ସାହନର ପ୍ରସ୍ତାବ ଦେଇଛନ୍ତି ସେବେ ଠାରୁ ଗୃହରେ ମଦ ଝଡ ଥମିବାର ନାଁ ନେଉନି । ମଦ ପ୍ରୋତ୍ସାହନ ପରେ ପରେ ସରକାରଙ୍କୁ ସାଙ୍ଘାତିକ ଭାବେ ଘାଇଲା କରିଚାଲିଛନ୍ତି ବିରୋଧୀ । ଗୃହରେ ଅବକାରୀ ମନ୍ତ୍ରୀଙ୍କୁ ଘେରିଛନ୍ତି ବିରୋଧୀ ସଦସ୍ୟ । ରାଜସ୍ୱ ବୃଦ୍ଧି ପାଇଁ ରାଜ୍ୟ ସରକାର ଲୋକଙ୍କ ଉପରେ ପଡୁଥିବା କୁପ୍ରଭାବକୁ ଅଣଦେଖା କରୁଥିବା ବିରୋଧୀ ସିଧାସଳଖ ଅଭିଯୋଗ କରିଥିବା ବେଳେ ଆଜି ମନ୍ତ୍ରୀ ଦେଇଛନ୍ତି ରିପୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ତେବେ ରାଜ୍ୟ ସରକାର ମଦରୁ କେତେ ଟଙ୍କା ପାଉଛନ୍ତି, କେତେ ଟଙ୍କା ରୋଜଗାର କରୁଛନ୍ତି ଆଉ ସରକାରଙ୍କୁ କେତେ ରାଜସ୍ୱ ମିଳୁଛି ବୋଲି ଆଜି ବିଧାନସଭାରେ ପ୍ରଶ୍ନ କରିଥିଲେ ବିଜେପି ବିଧାୟକ ମୋହନ ମାଝୀ । ବିଧାୟକଙ୍କ ପ୍ରଶ୍ନରେ ଉତ୍ତର ରଖିଛନ୍ତି ଅବକାରୀ ମନ୍ତ୍ରୀ ନିରଞ୍ଜନ ପୂଜାରୀ ।
ତେବେ ୨୦୦୯ରୁ ୨୦୧୯ ମଧ୍ୟରେ ରାଜ୍ୟ ସରକାର କେତେ ରାଜସ୍ୱ ପାଇଛନ୍ତି ତାର ହିସାବ ବିଧାୟକ ମାଗିଥିବା ବେଳେ ମନ୍ତ୍ରୀ ଦେଇଛନ୍ତି ସାଙ୍ଘାତିକ ତଥ୍ୟ । ୨୦୦୯ରୁ ୨୦୧୦ ମଧ୍ୟରେ ରାଜ୍ୟ ସରକାର ମଦ ଦୋକାନୀଙ୍କ ଠାରୁ ଯେଉଁ ରାଜସ୍ୱ ପାଇଛନ୍ତି ତାହା ୨୦୧୯ ବେଳକୁ ୪ ଗୁଣା ବୃଦ୍ଧି ପାଇଛି । ଅର୍ଥାତ ମଦ ବାବଦକୁ ସରକାର ମୋଟା ଅଙ୍କରେ ରାଜସ୍ୱ ପାଇଁ ମାଲେମାଲ ହୋଇଛନ୍ତି ।
୨୦୦୯ରୁ ୨୦୧୦ ମଧ୍ୟରେ ରାଜ୍ୟ ସରକାର ମଦରୁ ୮୪୮.୯୬ କୋଟି ଟଙ୍କା ଆୟ କରିଥିଲେ । ବର୍ଷ ଗଡିବା ସଙ୍ଗେ ସଙ୍ଗେ ଆୟ ମଧ୍ୟ ବର୍ଷକୁ ବର୍ଷ ବୃଦ୍ଧି ପାଇବାରେ ଲାଗିଛି । ସେହିପରି ୨୦୧୦-୧୧ ମଧ୍ୟରେ ୧୦୯୪.୩୮, ୨୦୧୧-୧୨ ମଧ୍ୟରେ ୧୩୭୯.୯୧, ୨୦୧୨-୧୩ ମଧ୍ୟରେ ୧୪୯୯.୯୦ କୋଟି, ୨୦୧୩-୧୪ ମଧ୍ୟରେ ୧୭୮୦.୨୮ କୋଟି, ୨୦୧୪-୧୫ ମଧ୍ୟରେ ୨୦୩୮.୭୯ କୋଟି ଟଙ୍କା ଆୟ ହୋଇଥିବା ବେଳେ କ୍ରମାଗତ ଆୟର ପରିମାଣ ବୃଦ୍ଧି ପାଇ ୨୦୧୮-୨୦୧୯ ବେଳକୁ ୩୯୨୫. ୪୧ କୋଟି ଟଙ୍କାରେ ପହଞ୍ଚିଛି । ଯାହାକି ୧୦ ବର୍ଷରେ ୪ ଗୁଣା ବୃଦ୍ଧି ପାଇଛି ।
ବିଗତ ୧୦ ବର୍ଷରେ ରାଜ୍ୟ ସରକାର ୪ ଗୁଣା ବର୍ଦ୍ଧିତ ରାଜସ୍ୱ ପାଇଛନ୍ତି । ଆଗକୁ ମଧ୍ୟ ପାଇବେ । ତେବେ ମଦରୁ ଭଲ ରାଜସ୍ୱ ମିଳୁଥିବାରୁ ଖାସ ସେଇଥିପାଇଁ ମଦ ଦୋକାନୀଙ୍କୁ ରାଜ୍ୟ ସରକାର ପ୍ରୋତ୍ସାହନ ଦେଉଥିବା ଚର୍ଚ୍ଚା ହେଉଛି । ତେବେ ମଦ ଦୋକାନୀଙ୍କୁ ପୁରସ୍କାର କଥା ବିଧାନସଭାରେ ଉଠିବା ପରେ ସରକାରଙ୍କୁ ଘାଟାରେ ପକାଇ ଆସିଛନ୍ତି ବିରୋଧୀ ।
ଆଉ ଗୃହର ଏହି ତମାମ୍ ଆଲୋଚନା ଭିତରେ ମନ୍ତ୍ରୀ ସ୍ପଷ୍ଟ କରିଥିଲେ ଯେ, ମଦ ଦୋକାନୀଙ୍କୁ ପ୍ରୋତ୍ସାହନ କରିବାର ନିଷ୍ପତ୍ତି ଗୃହ କମିଟିର । ଯେଉଁଥିରେ ସବୁ ଦଳ ବିଧାୟକ ରହିଛନ୍ତିି । ତେବେ ରାଜ୍ୟ ସରକାର ମଦ ବିରୋଧରେ ବିଭିନ୍ନ ମାଧ୍ୟମରେ ଲୋକଙ୍କୁ ସଚେତନ କରୁଥିବାର ସଫେଇ ଦେଇଛନ୍ତି ମନ୍ତ୍ରୀ ନିରଞ୍ଜନ ପୂଜାରୀ । ଯାହାକୁ ଆଦୌ ଗ୍ରହଣ କରି ପାରିନାହାନ୍ତି କିଛି ବିରୋଧୀ ବିଧାୟକ ।