ସିନେମା ହଲରେ ଆମ ‘ଛପାକ୍’: ଫିଲ୍ମ ଦେଖିଲେ, ନିଜ କାହାଣୀ ମନେ ପକାଇଲେ ଓଡିଶାର ଏସିଡ୍ ପୀଡିତା
କନକ ବ୍ୟୁରୋ: ‘ଛପାକ’ ଦେଖିଲେ ଓଡିଶାର ‘ଛପାକ’ । ଏସିଡ୍ ପୀଡ଼ିତାଙ୍କ ସଂଘର୍ଷ କାହାଣୀକୁ ନେଇ ନିର୍ମାଣ ହୋଇଥିବା ଛପାକ୍ ଫିଲ୍ମୁ ନେଇ ଏବେ ଦେଶବ୍ୟାପୀ ଚର୍ଚ୍ଚା । ଆଉ ଏହାରି ଭିତରେ ପୀଡିତାଟିଏ କେମିତି ସାରା ଜୀବନ ସଂଘର୍ଷ କରି ବଞ୍ଚେ ? ଆଉ ତା ସେ ସଂଘର୍ଷରେ କିଏ ସାଜେ ସାଥୀ ? ଏସିଡି ପୀଡିତାଙ୍କ ଜୀବନର ନିଚ୍ଛକ ସତକୁ ନେଇ ନିର୍ମାଣ ହୋଇଥିବା ଛପାକ ସିନେମାକୁ ଦେଖିବାକୁ କଟକ ହଲକୁ ଆସିଥିଲେ ଓଡ଼ିଶାର ଦୁଇ ଜଣ ଏସିଡ୍ ପୀଡ଼ିତା ।
Kanak News is now on WhatsApp
Join and get latest news updates delivered to you via WhatsApp
ଜୀବନ ସହ ସାମଞ୍ଜସ୍ୟ ରଖୁଥିବା ଘଟଣାକୁ ନେଇ ଯେତେବେଳେ ଫିଲ୍ମ ପ୍ରସ୍ତୁତ ହୁଏ, ସ୍ୱାଭାବିକ ଭାବରେ ସେଭଳି ଏକ ସିନେମା ଦେଖିବାକୁ ଆଗ୍ରହ ଆସିଥାଏ । ଦୀପିକା ପାଦୁକୋନଙ୍କ ଅଭିନୀତ ଫିଲ୍ମ ‘ଛପାକ’, ଯାହା ଏସିଡ୍ ପୀଡ଼ିତାଙ୍କ ଜୀବନ ସଂଘର୍ଷକୁ ନେଇ ତିଆରି ହୋଇଛି, ସେହି ଫିଲ୍ମ ଦେଖିବାକୁ କଟକର ସଙ୍ଗମ ସିନେମା ହଲରେ ପହଂଚିଥିଲେ ଓଡ଼ିଶାର ଛପାକ୍ ।
ମାତ୍ର ୧୬ ବର୍ଷ ବୟସରେ ଏସିଡ୍ ଆକ୍ରମଣର ଶିକାର ହୋଇଥିବା ଜଗତସିଂପୁରର ପ୍ରମୋଦିନୀ ରାଉଳ, ତାଙ୍କ ଭାବୀ ସ୍ୱାମୀଙ୍କୁ ସାଥିରେ ନେଇ ଛପାକ୍ ଫିଲ୍ମ ଦେଖିବାକୁ ଆସିଥିଲେ । ଯେଉଁଠି ସେ, କହିଛନ୍ତି- ସମାଜରେ ଭଲ ପୁଅର ଅଭାବ ନାହିଁ । ଯେଉଁମାନେ ଚେହେରା ନୁହେଁ ମନକୁ ଦେଖନ୍ତି ।
ପ୍ରମୋଦନୀ ଏବଂ ସରୋଜଙ୍କ ଭଳି ଛପାକ୍ ଫିଲ୍ମ ଦେଖିବାକୁ ଆସିଥିଲେ ଯାଜପୁରର ସୁଚିସ୍ମୀତା ରାଉତ । ଯିଏ ପାରିବାରିକ କଳହରୁ ପ୍ରତିଶୋଧର ଶିକାର ପାଲଟି ଯାଇଥିଲେ । ସୁଚିସ୍ମୀତାଙ୍କ ଦେହରେ ତରଳ ନିଆଁ ଢାଳିଦେଇଥିଲା ଗାଁର ଜଣେ ସଂପର୍କୀୟ ଦାଦା । ତେବେ ସୁଚିସ୍ମୀତାଙ୍କ ହାତ ଧରିଛନ୍ତି ଦୟାନିଧି ବାରିକ ।
ଯେଉଁଠି ଭଲ ପାଇବା ଥାଏ, ସେଠି ଗୌଣ ହୋଇଯାଏ ଚେହେରା, ନ୍ୟୁନ ହୋଇଯାଏ ସୌନ୍ଦର୍ଯ୍ୟ । ସେଠି କେବଳ ଦେଖାଯାଏ ସ୍ନେହ ଓ ଭଲପାଇବା । ଦେଖାଯାଏ କେବଳ ମନ ଓ ଭଲ ମଣିଷ । ପ୍ରମୋଦିନୀ ଓ ସୁଚିସ୍ମୀତା ତାଙ୍କ ଜୀବନ ସାଥୀଙ୍କ ସଂସ୍ପର୍ଶରେ ଆସିବା ପରେ ସେହି ଗୁଣଟି ହିଁ ଦେଖିପାରିଛନ୍ତି ।