ମନ୍ତ୍ରୀଙ୍କ ଓଡ଼ିଆ ପ୍ରେମ ! ଓଡ଼ିଆ ଭାଷାରେ ଫାଇଲ ନ ଆସିଲେ ଫାଇଲ ଫେରାଇଦେବି, ସରକାରୀ ସ୍ତରରେ ଓଡ଼ିଆ ଭାଷାକୁ ଗୁରୁତ୍ୱ ଦେବାକୁ ମନ୍ତ୍ରୀଙ୍କ ଆହ୍ୱାନ
କନକ ବ୍ୟୁରୋ : ସରକାରୀ କାର୍ଯ୍ୟ ହେବ ଓଡ଼ିଆ ଭାଷାରେ । ବ୍ୟବସାୟିକ ପ୍ରତିଷ୍ଠାନରେ ଓଡ଼ିଆରେ ଲେଖାହେବ ନାମଫଳକ । ଏହି ନିୟମକୁ କଡ଼ାକଡ଼ି କରିବାକୁ ଗତକାଲି ବିଧାନସଭାରେ ପାରିତ ହୋଇଛି ବିଲ୍ । ତେବେ ଗତ ମାର୍ଚ୍ଚ ମାସରେ ଏହି ବିଲକୁ ମଂଜୁରି ଦେଇଥିଲା କ୍ୟାବିନେଟ୍ । ଏହା ପରଠାରୁ ଉଭୟ ସରକାରୀ ଓ ବେସରକାରୀ କ୍ଷେତ୍ରରେ ଏ ନେଇ ପ୍ରକାଶ ପାଇଥିଲା ତତ୍ପରତା । ତେବେ ଓଡ଼ିଆ ଭାଷା ଆଇନକୁ ଲାଗୁ କରିବା ପାଇଁ ଆମେ କେତେ ପ୍ରସ୍ତୁତ?
Kanak News is now on WhatsApp
Join and get latest news updates delivered to you via WhatsApp
କାର୍ଯ୍ୟକାରୀ ହେବ ଓଡ଼ିଆ ଭାଷା ଆଇନ । କିନ୍ତୁ ରାଜଧାନୀ ଭୁବନେଶ୍ୱରରେ ବଡ଼ ବଡ଼ ପ୍ରତିଷ୍ଠାନ ଠାରୁ ଛୋଟ ଛୋଟ ଦୋକାନ ପର୍ଯ୍ୟନ୍ତ ଅଧିକାଂଶ ସ୍ଥାନରେ ଇଂରାଜୀରେ ନାମଫଳକ । ଏପରିକି ସରକାରୀ କାର୍ଯ୍ୟାଳୟରେ ଇଂରାଜୀରେ ଲେଖା ହୋଇଛି ନାମଫଳକ । କାଁ ଭାଁ ସ୍ଥାନରେ ଲେଖାହୋଇଛି ଓଡ଼ିଆରେ । ଯାହା ଓଡ଼ିଶା ଲୋକଙ୍କ ଓଡ଼ିଆ ପ୍ରୀତିକୁ ଦର୍ଶାଉଥିଲା । ତେବେ ସଚିବାଳୟ କର୍ମଚାରୀ ସଂଘ ଅନୁଯାୟୀ ସଚିବାଳୟରେ ଏବେ ମାତ୍ର ୧୫ରୁ ୨୦ ପ୍ରତିଶତ କାର୍ଯ୍ୟ ଓଡ଼ିଆ ଭାଷାରେ ହୋଇପାରୁଛି । ଶତପ୍ରତିଶତ ଓଡ଼ିଆ ଭାଷାରେ କାର୍ଯ୍ୟ କରିବା ପାଇଁ ରହିଛି ଅନେକ ଆହ୍ୱାନ ।
ନୂଆ ଭାଷା ଆଇନରେ ରହିଛି ଦଣ୍ଡ ବିଧାନ ବ୍ୟବସ୍ଥା । ରାଜ୍ୟପାଳଙ୍କ ସ୍ୱୀକୃତି ପାଇବା ପରେ କଡ଼ାକଡ଼ି ଭାବେ ଲାଗୁହେବ ଆଇନ । ସରକାରୀ ସ୍ତରରେ ବହୁଳ ଭାବେ ଓଡ଼ିଆ ଭାଷା ବ୍ୟବହାର କରୁଥିବା ଅଧିକାରୀଙ୍କୁ ପ୍ରୋତ୍ସାହନ ଦିଆଯିବ, ବ୍ୟତିକ୍ରମ ହେଲେ ଦିଆଯିବ ଦଣ୍ଡ । ସେପଟେ ଶ୍ରମ ମନ୍ତ୍ରୀ ସୁଶାନ୍ତ ସିଂହଙ୍କ କହିବା କଥା ୫୦ ହଜାର ବ୍ୟବସାୟିକ ପ୍ରତଷ୍ଠାନ ଓଡ଼ିଆରେ ନାମଫଳକ ଲେଖିସାରିଛନ୍ତି ।ଜିଲ୍ଲାପାଳମାନେ ଜିଲ୍ଲାର ବ୍ୟବସାୟୀମାନଙ୍କୁ ସଚେତନ କରିଛନ୍ତି । ବିଜ୍ଞପ୍ତି ପ୍ରକାଶ ପାଇବାର ଗୋଟିଏ ମାସ ପରେ କଡ଼ାକଡ଼ି କାର୍ଯ୍ୟକାରୀ ହେବ ନିୟମ । ଏଥିରେ ଖିଲାପ ହେଲେ ୨ ହଜାରରୁ ୨୫ ହଜାର ଟଙ୍କା ଯାଏଁ ଜରିମାନା ଆଦାୟ ହେବ ବୋଲି କହିଛନ୍ତି ଶ୍ରମ ମନ୍ତ୍ରୀ ।
ନୂଆ ଆଇନ ସ୍ୱାଗତ କରିବା ସହ କଠୋର ଆଭିମୁଖ୍ୟ ରଖିଛନ୍ତି ମନ୍ତ୍ରୀ ପ୍ରଫୁଲ୍ଲ ସାମଲ । ଯଦି କୌଣସି ଫାଇଲ ଓଡ଼ିଆରେ ଲେଖା ହୋଇନଥିବ, ତାକୁ ଫେରାଇ ଦେବେ ବୋଲି କହିଛନ୍ତି ମନ୍ତ୍ରୀ । ବିଧାନସଭାରେ ଓଡ଼ିଆ ଭାଷା ଅଧିନିୟମ ପାରିତ ହୋଇଯାଇଛି । ଏବେ ଅପେକ୍ଷା କେବେ ବାହାରିବ ବିଜ୍ଞପ୍ତି, ଆଉ କେବେ ଏହା ନେବ ବାସ୍ତବ ରୂପ ।