ସଂଘର୍ଷ ଭିତରେ ସ୍ୱପ୍ନ ଦେଖିବା ଛାଡିନଥିଲେ ଅଜିତେଶ । ଏବେ କର୍କଟ ରୋଗ ଉପରେ ଗବେଷଣା ପାଇଁ ଯିବେ ତାଇୱାନ।
କନକ ବ୍ୟୁରୋ: ଇଚ୍ଛା ଥିଲେ ଉପାୟ ଆପେ ଆପେ ଆସେ, ଆଉ ଦୃଢ ଆତ୍ମବଳ ଆଗରେ ହାର ମାନେ ସବୁ ପ୍ରତିବନ୍ଧକ । ଆଉ ଏହାକୁ ପ୍ରମାଣ କରି ଦେଖାଇଛନ୍ତି ଯାଜପୁର ବିଂଝାରପୁର ବ୍ଲକ ତାଉଁତରା ଗାଁର ଅଜିତେଶ ଧଳ । ପିଲାଟି ଦିନରୁ ଅଭାବ ଭିତରେ ଅଜିତେଶଙ୍କ ସମୟ ବିତିଛି ହେଲେ ଏଥିରେ ସେ କେବେ ବି ହାରି ନାହାଁନ୍ତି । କଠିନ ପରିଶ୍ରମ ଓ ଆତ୍ମବିଶ୍ୱାସ ବଳରେ ଗୌହାଟିର ଆଇଆଇଟିରେ ପାଠ ପଢ଼ୁଥିବା ଅଜିତେଶ ଏବେ ତାଇୱାନରେ ଗବେଷଣା କରିବା ପାଇଁ ମନୋନୀତ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସବୁ ପ୍ରତିବନ୍ଧକକୁ ହଟାଇ ନିଜ ଲକ୍ଷ୍ୟ ହାସଲ ପାଇଁ ପଣ କରିଛନ୍ତି ଯାଜପୁରର ସୁନା ପୁଅ ଅଜିତେଶ ଧଳ । ସେଥିପାଇଁ ତ ଯାଜପୁରରୁ ତାଇୱାନକୁ ଲମ୍ବିଯାଇଛି ଅଜିତେଶଙ୍କ ଶିକ୍ଷାଗତ ଜୀବନର ଲମ୍ବା ରାସ୍ତା । ତାଇୱାନ ତାଇପେଇର ନ୍ୟାସନାଲ ସିଂହୁଆ ବିଶ୍ୱବିଦ୍ୟାଳୟରେ ଗବେଶଣା କରିବା ପାଇଁ ସେ ମନୋନୀତ ହୋଇଛନ୍ତି ।
ତାଇୱାନରେ କର୍କଟ ରୋଗ ଏବଂ ଏଣ୍ଡୋମେଟ୍ରିଓସିସି୍ ଉପରେ ୩ ବର୍ଷ ଧରି ଗବେଷଣା କରିବେ ଅଜିତେସ । ଏସବୁ ରୋଗର ନିରାକରଣ ପାଇଁ ନୂତନ ଜ୍ଞାନକୌଶଳ ଏବଂ ଔଷଧ ଉଦ୍ଭାବନ କରିବାକୁ ସେ ଲକ୍ଷ୍ୟ ରଖିଛନ୍ତି । ଅଜିତେଶ ମ୍ୟାଟେରିଆଲ ସାଇନ୍ସ ବିଭାଗରେ ସାରା ବିଶ୍ୱରେ ଦ୍ୱିତୀୟ ରାଙ୍କ୍ ରଖିବା ପରେ ତାଙ୍କୁ ଏହି ସୁଯୋଗ ମିଳିଛି । ଗବେଷଣା ସମୟରେ ଅଜିତେଶଙ୍କ ସମସ୍ତ ଖର୍ଚ୍ଚ ତାଇୱାନ ସରକାର ବହନ କରିବେ । ଏଥିପାଇଁ ତାଇୱାନ ସରକାରଙ୍କ ପକ୍ଷରୁ ୩୨ ଲକ୍ଷ ଟଙ୍କା ଆଗୁଆ ଜମା କରାଯାଇଛି । ଅଜିତେଶ ଆଗାମୀ ୧୭ ତାରିଖ ଦିନ ତାଇୱାନ ଅଭିମୁଖେ ବାହାରିବେ ।
ଅଜିତେସଙ୍କ ଶିକ୍ଷା କ୍ୟାରିୟର ବେଶ ସଂଘର୍ଷମୟ । ବାପା ଏକ ଘରୋଇ କଂପାନିରେ କାର୍ଯ୍ୟ କରୁଥିବା ବେଳେ ହଠାତ୍ ରୋଗାକ୍ରାନ୍ତ ହୋଇ ଆଖି ବୁଝିଦେଇଥିଲେ । ମୁଣ୍ଡ ଉପରୁ ବାପାଙ୍କ ହାତ ହଟିଯିବା ପରେ ସଂପର୍କୀୟଙ୍କ ସହଯୋଗରେ ଗୌହାଟି ଆଇଆଇଟିରେ ପାଠ ପଢିଥିଲେ ଅଜିତେସ ।