ଓଡ଼ିଶା ଭବନରେ ରିଲିଫ୍ ରଖିବା ପାଇଁ ମିଳିଲାନି ଅନୁମତି । କେରଳ ଭବନରେ ରହିଲା ବାତ୍ୟା ବିପନ୍ନଙ୍କ ରିଲିଫ୍ ସାମଗ୍ରୀ

ରିଲିଫ ଆସିଥିଲା ଓଡିଶାର ବାତ୍ୟା ବିପନ୍ନଙ୍କ ପାଇଁ କିନ୍ତୁ ଅଟଳିଗଲା ଅଧାରାସ୍ତାରେ

283
କନକ ବ୍ୟୁରୋ : ରିଲିଫ ଆସିଥିଲା ଓଡିଶାର ବାତ୍ୟା ବିପନ୍ନଙ୍କ ପାଇଁ କିନ୍ତୁ ଅଟଳିଗଲା ଅଧାରାସ୍ତାରେ ।  କାହିଁକି ନା ରିଲିଫ ସାମଗ୍ରୀକୁ ଗ୍ରହଣ କରିବା ପାଇଁ ରାଜ୍ୟ ସରକାରଙ୍କ ଅନୁମତି ନଥିଲା । ଏପରି ଘଟଣା ଘଟିଛି ମୁମ୍ବାଇ ଓଡିଶା ଭବନରେ । ଓଡିଆ କମ୍ୟୁନିଟିର କିଛି ଲୋକ ରିଲିଫ ସାମଗ୍ରୀ ଆଣି ଓଡିଶା ଭବନ ଆସିଥିଲେ ମଧ୍ୟ ସେଠାରେ ଏହାକୁ ରଖିବା ପାଇଁ ଅନୁମତି ମିଳିନଥିଲା । ବାଧ୍ୟ ହୋଇ ଓଡିଆ କମ୍ୟୁନିଟି ପକ୍ଷରୁ ଏହି ସାମଗ୍ରୀକୁ କେରଳ ଭବନରେ ରଖାଯାଇଛି ।
ଜାତୀୟ ଗଣମାଧ୍ୟମ ଦି ହିନ୍ଦୁର ଏହି ରିପୋର୍ଟ ଏବେ ଚର୍ଚ୍ଚାର ବିଷୟ ପାଲଟିଛି । ଏହି ଘଟଣା ଘଟିଛି ମୁମ୍ବାଇରେ । ନଭି ମୁମ୍ବାଇ, ମୁମ୍ବାଇ ଓ ଥାନେରେ ରହୁଥିବା ୬୧ ଜଣ ଓଡିଆ ଏକତ୍ର ହୋଇ ଗଠନ କରିଛନ୍ତି ଓଡିଶା ସାଇକ୍ଲୋନ ରିଲିଫ କମିଟି-୨୦୧୯ । ବାତ୍ୟା ଫୋନି କ୍ଷତିଗ୍ରସ୍ତଙ୍କ ପାଇଁ ଏମାନେ ସଂଗ୍ରହ କରିଥିଲେ ରିଲିଫ ସାମଗ୍ରୀ । ଆଉ ଏହି ରିଲିଫ ସାମଗ୍ରୀକୁ ଆଣିଥିଲେ ମୁମ୍ବାଇରେ ଥିବା ଓଡିଶା ଭବନକୁ । ହେଲେ ଓଡିଶା ଭବନ ଅଧିକାରୀ ଏହାକୁ ଗ୍ରହଣ କରିନଥିଲେ । ରାଜ୍ୟ ସରକାରଙ୍କ ଅନୁମତି ନଥିବାରୁ ଏହାକୁ ରଖାଯାଇପାରିବ ନାହିଁ ବୋଲି କହିଥିଲେ । ଏପରିକି ଓଡିଶା ସାଇକ୍ଲୋନ ରିଲିଫ କମିଟି-୨୦୧୯ ଏକ ପଞ୍ଜିକୃତ ଏନଜିଓ ହୋଇନଥିବାରୁ ରିଲିଫକୁ ଗ୍ରହଣ କରାଯାଇପାରିବନି ବୋଲି ରୋକଠୋକ କହିଦେଇଥିଲେ ।
ପରେ ଓଡିଆ କମ୍ୟୁନିଟିର ଏହି ସଦସ୍ୟମାନେ କେରଳ ଭବନରେ ଏହି ରିଲିଫ ସାମଗ୍ରୀ ରଖିବାପାଇଁ ନିବେଦନ କରିଥିଲେ । କେରଳ ଭବନର ଅଧିକାରୀମାନେ ତୁରନ୍ତ ରିଲିଫ ରଖିବାର କାରଣ ଜାଣିବା ପରେ ରଖିବା ପାଇଁ ଆଗ୍ରହର ସହ ରାଜି ହୋଇଥିଲେ । ଆଉ ଶେଷରେ ସେଠାରେ ରହିଥିଲା ରିଲିଫ । ବିଡମ୍ବନାର ବିଷୟ ହେଲା, ଓଡିଶାରେ ଲକ୍ଷାଧିକ ବାତ୍ୟା ବିପନ୍ନଙ୍କ ପାଇଁ ରିଲିଫ ଜରୁରୀ ହୋଇପଡିଥିବା ବେଳେ ଓଡିଶା ଭବନ ଏଥିପାଇଁ ମନାକରିଥିଲା ଓ କେରଳ ଭବନ ରାଜି ହୋଇଥିଲା ।

Comments are closed.