ଉଚ୍ଛେଦ ପରେ ଏବେ ସୌନ୍ଦର୍ଯ୍ୟକରଣ ପାଇଁ ବ୍ୟସ୍ତ ପ୍ରଶାସନ ! ଏବେ ଭଙ୍ଗା ହେବ ନାହିଁ ଆଉ ମଠ !

କନକ ବ୍ୟୁରୋ :  ଶ୍ରୀମନ୍ଦିର ଚତୁଃପାର୍ଶ୍ବରୁ ୭୫ ମିଟର ଉଚ୍ଛେଦ କ୍ରମରେ ଲଙ୍ଗୁଳି ମଠ, ଏମାର ମଠ ଓ ବଡ଼ଆଖଡ଼ା ମଠ ଭଙ୍ଗାଯିବା ପରେ ଏବେ ଜିଲ୍ଲା ପ୍ରଶାସନ ସୌନ୍ଦର୍ଯ୍ୟକରଣକୁ ଗୁରୁତ୍ବ ଦେଇଛି। ମଠ କୋଠାର ଭଗ୍ନାବଶେଷକୁ ଅନ୍ୟତ୍ର ସ୍ଥାନାନ୍ତର ପରେ ବର୍ତ୍ତମାନ ଟାଇଲ୍ ବିଛାଠାରୁ ଆରମ୍ଭ କରି ଆଲୋକୀକରଣକୁ ଗୁରୁତ୍ବ ଦେଇଛି। ଏହି ଦୃଷ୍ଟିରୁ କିଛି ଦିନ ପାଇଁ ପ୍ରଶାସନ ଉଚ୍ଛେଦ କାର୍ଯ୍ୟକୁ ସ୍ଥଗିତ ରଖିଥିବା ଜଣାପଡ଼ିଛି। ଆଇନଗତ ଦିଗ ବି ଏଥିରେ କିଛିଟା ପ୍ରତିବନ୍ଧକ ସୃଷ୍ଟି କରିଛି। ଅନ୍ୟପଟେ ସୌନ୍ଦର୍ଯ୍ୟକରଣ କାମ ଶେଷ ପରେ ପ୍ରଶାସନ ମଙ୍ଗୁ ମଠ ଓ ସାନଛତା ମଠକୁ ଭାଙ୍ଗିବାକୁ ସ୍ଥିର କରିଛି। ଏଥି ପାଇଁ ମଙ୍ଗୁ ମଠ ଓ ସାନଛତା ମଠ କୋଠାରେ ଥିବା ଦୋକାନୀମାନେ ନିଜ ନିଜ ଆସବାବପତ୍ର ଖାଲି କରିବା ଆରମ୍ଭ କରିଛନ୍ତି।

ବିଭିନ୍ନ ପ୍ରଜାତିର ଗଛ ଲଗାଇ ଶ୍ରୀମନ୍ଦିର ଚାରିପାର୍ଶ୍ବରେ ସବୁଜ ବଳୟ ଫେରାଇ ଆଣିବାକୁ ଉଦ୍ୟମ ହୋଇଛି। ଏମାର ମଠର ଉଚ୍ଛେଦ ସ୍ଥଳରେ ଆଲୋକ ସଂଯୋଗ କରାଯାଇଛି। ଯାହାଦ୍ବାରା ରାତିରେ ଶ୍ରୀମନ୍ଦିର ବେଢ଼ାରେ ଭିଡ଼ ଜମାଉଥିବା ଭକ୍ତମାନେ ବଡ଼ଦାଣ୍ଡରେ ବସି ଶ୍ରୀମନ୍ଦିର ଦର୍ଶନ କରୁଛନ୍ତି। ଏବେ ପ୍ରଶାସନ ବଡ଼ଆଖଡ଼ା ମଠର ଉଚ୍ଛେଦସ୍ଥଳକୁ ଫୋକସ୍ କରିଛି। ଏଠାରେ ଥିବା ଭଗ୍ନାବଶେଷଗୁଡ଼ିକୁ ଖାଲି କରିବା ପରେ ଟାଇଲ୍ ବିଛାଇବାକୁ ଯୋଜନା କରିଛି।