ହସ୍ପିଟାଲରେ ପଡ଼ିଥିବା ରୋଗୀଙ୍କୁ ବି ଛାଡ଼ିଲେନି ଠକ । ବ୍ଲାକ୍ ଫଙ୍ଗସ୍ ଚିକିତ୍ସା ପାଇଁ ଆବଶ୍ୟକ ଇଂଜେକ୍ସନ ଆଣିଦେବାକୁ କହି ଠକି ନେଲେ ୪୮ ହଜାର ଟଙ୍କା ।
କନକ ବ୍ୟୁରୋ: ଡାକ୍ତର ଖାନାରେ ଜୀବନ ମୃତ୍ୟୁ ସହ ସଂଘର୍ଷ କରୁଥିବା ରୋଗୀଙ୍କ ଠାରୁ ଠକେଇ । ମହାମାରୀରେ ମହାଠକେଇ । ଏଭଳି ଏକ ଖବର ଆସିଛି ଭୁବନେଶ୍ୱରର ଏମ୍ସ ହସ୍ପିଟାଲରୁ । ଜଗତସିଂହପୁରର ଜଣେ ବ୍ୟକ୍ତି ବ୍ଲାକ୍ ଫଙ୍ଗସରେ ପୀଡିତ ହୋଇ ହସ୍ପିଟାଲରେ ଚିକିତ୍ସାଧିନ ଅଛନ୍ତି । ତାଙ୍କୁ ଏକ ଇଂଜେକସନ ପାଇଁ କହିଥିଲା ହସ୍ପିଟାଲ । ଏହି ଇଂଜେକସନ ଅତ୍ୟନ୍ତ ଜରୁରୀ ଥିଲା । ଭୁବନେଶ୍ୱରରେ ନ ପାଇବା ଫଳରେ ବ୍ୟକ୍ତିଙ୍କ ପରିବାର ସଦସ୍ୟ ଗୁଗୁଲରେ ସର୍ଚ୍ଚ କରି ଇଂଜେକସନ ଖୋଜିଥିଲେ । କିନ୍ତୁ ଇଂଜେନକସନ ପାଇବେ କଣ, ଓଲଟା ଠକାମିରେ ପଡିଗଲେ । ଜଣେ ବ୍ୟକ୍ତି ଇଂଜେକସନ ଯୋଗାଇବା ନାଁରେ ୪୮ହଜାର ଟଙ୍କା ନେଇଗଲା ଆଉ ତାପରେ ମୋବାଇଲ ବନ୍ଦ କରି ଫେରାର ହୋଇଗଲା । କ’ଣ ଥିଲା ପୂରା ଘଟଣା ପଢ଼ନ୍ତୁ…
Kanak News is now on WhatsApp
Join and get latest news updates delivered to you via WhatsApp
ବ୍ଲାକ ଫଙ୍ଗସ ରୋଗରେ ପୀଡିତ ହୋଇ ଭୁବନେଶ୍ୱର ସ୍ଥିତ ଏମ୍ସ ହସ୍ପିଟାଲରେ ଚିକିତ୍ସିତ ହେଉଥିବା ଅଜୟ ଭୁୟାଁଙ୍କ ସହ ଯାହା ଘଟିଛି, ତାହା କାହା ସହିତ ନ ହେଉ । ଗୋଟିଏ ପଟେ ଏହି ବ୍ୟକ୍ତି ଜଣକ ବ୍ଲାକ ଫଙ୍ଗସ ଭଳି ଏକ ମାରାତ୍ମକ ରୋଗରୁ ଆରୋଗ୍ୟ ହେବା ପାଇଁ ସଂଘର୍ଷ କରୁଛନ୍ତି, ଆଉ ଅନ୍ୟପଟେ ଏମାନଙ୍କ ଉପରେ ଔଷଧ ନାଁରେ ଠକେଇ କରୁଥିବା ଦଲାଲଙ୍କ ନଜର ରହିଛି ।
ଏମ୍ସ ହସ୍ପିଟାଲରେ କହିଲେ, ଏହି ଲିପୋସମାଲ ଇଂଜେକ୍ସନ ବାହାରୁ ଆଣିବା ପାଇଁ, କାରଣ ତାହା ହସ୍ପିଟାଲରେ ମିଳୁ ନାହିଁ । ଏବଂ ଏଭଳି ଅବସ୍ଥାରେ ଏହି ଇଂଜେକ୍ସନ ନିହାତି ଦରକାର । ଆଉ କିଛି ବାଟ ନପାଇ ପରିବାର ଲୋକେ ଗୁଗୁଲରେ ସର୍ଚ କରି ଏହି ଇଂଜେକ୍ସନ କିଣିବା ପାଇଁ ଚେଷ୍ଟା କଲେ । ସେହି ଇଂଜେକସନ ଥିବା ଏକ ସାଇଟ ସହ ସଂପୃକ୍ତ ବ୍ୟକ୍ତିଙ୍କ ସହ କଥାବାର୍ତା ହେଲା । ବ୍ୟକ୍ତି ଜଣକ ୪୮ ହଜାର ଟଙ୍କା ଏହି ଆକାଉଂଟରେ ଜମା କରିବା ପାଇଁ କହିଲେ, ଓ ଏହା ପରେ ଇଂଜେକସନ ଆସିଯିବ ବୋଲି ପ୍ରତିଶ୍ରୁତି ଦେଲେ । କିନ୍ତୁ ଆଉ ଇଂଜେକସନ ଆସିଲା ନାହିଁ ଏବଂ ସେ ବ୍ୟକ୍ତିର ଫୋନ ବି ବନ୍ଦ ହୋଇଗଲା ।
ଠକର ଠିକଣା । ନାଁ ଅରୁଣ କୁମାର ଏବଂ ସେ ତାମିଲନାଡୁର ନେକ୍ସଜେନମେଡ ଫାର୍ମାସୀ ପ୍ରାଇଭେଟ ଲିମିଟେଡର ପ୍ରତିନିଧି କହି ଇଂଜେକ୍ସନ ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲା । ତେବେ ଜଣେ ବ୍ୟକ୍ତି ଯେତେବେଳେ ରୋଗରେ ପୀଡିତ ଥାଏ, ତା ପାଇଁ ଔଷଧ ଅମୃତ ଭଳି ମୂଲ୍ୟବାନ ହୋଇଯାଏ । କିନ୍ତୁ ଏମିତି ଲୋକ ବି ଥାନ୍ତି, ଯେଉଁମାନେ ଏହାକୁ ସୁଯୋଗ ବୋଲି ଭାବନ୍ତି ଏବଂ ଏମାନଙ୍କୁ ଠକିବା ପାଇଁ ପଛାନ୍ତି ନାହିଁ । ଆଉ ହସ୍ପିଟାଲରେ ଏଭଳି ଅତ୍ୟାବଶ୍ୟକ ଇଂଜେକସନ ଯଦି ମିଳେ ନାହିଁ, ତେବେ ଠକମାନଙ୍କୁ ଏକ ସୁଯୋଗ ମିଳିଯାଏ ।