କନକ ବ୍ୟୁରୋ : ଗୋଟିଏ ପଟେ ସୁପର ପାୱାର ଆମେରିକାର କଡ଼ା ଚେତାବନୀ, ଅନ୍ୟପଟେ ପରମାଣୁ ବୋମା ପରୀକ୍ଷଣ କରି ଉତ୍ତର କୋରିଆର ରଣହୁଙ୍କାର । ସ୍ଥିତି ଏପରି ହୋଇଥିଲା ଯେ କୌଣସି ମୁହୂର୍ତ୍ତରେ ଏକ ବଡ଼ ଯୁଦ୍ଧ ଆଡକୁ ମୁହାଁଉଥିଲେ ଦୁଇ ଦେଶ । ତେବେ ବନ୍ଦ ପଡିଥିବା ଡିପ୍ଲୋମାସିକୁ ପୁଣି ଥରେ ଆରମ୍ଭ କରିବାକୁ ଇସାରା ଦେଇଛି ଆମେରିକା । ଉତ୍ତର କୋରିଆ ଆଲୋଚନା ପାଇଁ ରାଜି ହେଲେ କୁଟନୈତିକ ସ୍ତରରେ କଥାବାର୍ତା ହୋଇପାରିବ କହିଛି ଆମେରିକା ।
Kanak News is now on WhatsApp
Join and get latest news updates delivered to you via WhatsApp
ବେଜିଂ ଗସ୍ତରେ ଥିବା ଆମେରିକା ବିଦେଶ ମନ୍ତ୍ରୀ ରେକ୍ସ ଟିଲରସନ୍ କହିଛନ୍ତି, କୋରିଆ ଉପତ୍ୟକାରେ ଶାନ୍ତି ପାଇଁ ନର୍ଥ କୋରିଆର ମିଜାଇଲ ପରୀକ୍ଷଣ ବନ୍ଦ କରିବା ପ୍ରସଙ୍ଗରେ ଆମେରିକା ଆଲୋଚନା କରିବା ପାଇଁ ପ୍ରସ୍ତୁତ ଅଛି । ସେ କହିଛନ୍ତି, ପ୍ୟାଓଙ୍ଗୟାଙ୍ଗଙ୍କ ସହ କଥାବାର୍ତା ପାଇଁ ଚୀନର ସହାୟତା ଆବଶ୍ୟକ ନାହିଁ । ଉତ୍ତର କୋରିଆ ସହ କଥା ହେବା ପାଇଁ ଆମେରିକା ନିକଟରେ ନିଜସ୍ୱ ମାଧ୍ୟମ ରହିଛି ।
ସେପଟେ ନର୍ଥ କୋରିଆକୁ ପରମାଣୁ ଶକ୍ତି ରାଷ୍ଟ୍ର ଭାବେ ସ୍ୱୀକାର କରାଯିବନାହିଁ ବୋଲି ସ୍ପଷ୍ଟ କରିଛନ୍ତି ଆମେରିକାର ବିଦେଶ ମନ୍ତ୍ରୀ । ତେବେ ଏକଛତ୍ରବାଦୀ ଶାସକ କିମ୍ ଜଙ୍ଗ୍ ଉନଙ୍କୁ ଶାସନ ଗାଦିରୁ ହଟାଇବା ଉଦ୍ଦେଶ୍ୟ ଆମେରିକାର ନାହିଁ ବୋଲି ଟିଲରସନ୍ ସ୍ପଷ୍ଟ କରିଛନ୍ତି । ଚୀନ ରାଷ୍ଟ୍ରପତି ସି. ଜିନପିଙ୍ଗ୍ ଏବଂ ଅନ୍ୟ ପଦାଧିକାରୀଙ୍କ ସହ ଆଲୋଚନା କରିଛନ୍ତି ଆମେରିକାର ବିଦେଶ ମନ୍ତ୍ରୀ ।
କିଛି ଦିନ ହେଲା ଡୋନାଲ୍ଡ ଟ୍ରମ୍ପ, ଜଙ୍ଗ ଉନଙ୍କ ମଧ୍ୟରେ ଆରୋପ ପ୍ରତ୍ୟାରୋପ ଚରମସୀମାରେ ପହଁଚିଥିଲା । ଜଙ୍ଗ ଉନଙ୍କୁ ରକେଟ ମ୍ୟାନ କହି ଆକ୍ଷେପ କରିବା ସହ ଉତ୍ତର କୋରିଆକୁ ସମୂଳେ ଧ୍ୱଂସ କରିଦେବାକୁ ଧମକ ଦେଇଥିଲେ ଆମେରିକା ରାଷ୍ଟ୍ରପତି । ସେହିପରି ଟ୍ରମ୍ପଙ୍କ ଧମକକୁ ବୃଦ୍ଧ ମଣିଷର ବିଳାପ କହି ଗୋଟିଏ ପରେ ଗୋଟିଏ ଶକ୍ତିଶାଳୀ ବୋମା ଓ ମିଜାଇଲ ପରୀକ୍ଷଣ କରିଚାଲିଥିଲେ ଜଙ୍ଗ୍ ଉନ୍ । ତେବେ ଡିପ୍ଲୋମାସି ପାଇଁ ଆମେରିକା ଇସାରା ଦେବା ପରେ ଜଙ୍ଗ୍ ଉନ୍ କି ପଦକ୍ଷେପ ନେଉଛନ୍ତି, ତାହା ଉପରେ ନିର୍ଭର କରୁଛି କୋରିଆ ଉପତ୍ୟକାର ପରିସ୍ଥିତି ।