ସରକାର ! ଆମକୁ କାମ ଦିଅ… ମହାମାରୀର ମାୟାଜାଲରୁ ସିନା ଜୀବନ ଫେରିଲା, ହେଲେ ଜୀବିକା ଚାଲିଗଲା । କାମଧନ୍ଦା ମିଳୁନଥିବାରୁ ଘରେ ହାତବାନ୍ଧି ବସିଛନ୍ତି ବିଦେଶ ଫେରନ୍ତା ପ୍ରବାସୀ । କେମିତି ପୋଷିବେ ପରିବାର, ମୁଣ୍ଡରେ ପଡିଛି ଚଡକ…
କନକ ବ୍ୟୁରୋ: ବାହାର ରାଜ୍ୟକୁ ଯାଇ ଟଙ୍କା ରୋଜଗାର କରି ପରିବାର ପୋଶୁଥିଲେ ଲକ୍ଷ ଲକ୍ଷ ଓଡିଆ ଶ୍ରମିକ । ହେଲେ କରୋନା ଭୂତାଣୁ ଭିଡ ଭିତରୁ ସିନା ଜୀବନ ବଂଚାଇ ଗାଁକୁ ଫେରି ଆସିଛନ୍ତି, ହେଲେ ଜୀବିକା ଉଜୁଡି ଯାଇଛି । କଳ-କାରଖାନାରେ କାମ କରୁଥିବା ଶ୍ରମିକ ଏବେ ଗାଁରେ ମୂଲ ଲାଗି ପେଟ ପୋଷିବାକୁ ଇଚ୍ଛା ରଖିଛନ୍ତି । କିନ୍ତୁ କାମ ମିଳୁନଥିବାରୁ ଗାଁ ମାଟିରେ ହାତ ବାନ୍ଧି ବସିଛି ପ୍ରବାସୀ ।
Kanak News is now on WhatsApp
Join and get latest news updates delivered to you via WhatsApp
ମହାମାରୀ କରୋନା ଯୋଗୁଁ ଦେଶରେ ଲକଡାଉନ୍ ଜାରି ହେବା ପରେ ରାଜ୍ୟ ବାହାରେ ଥିବା ପ୍ରବାସୀଙ୍କୁ ଭିଟାମାଟିକୁ ଫେରାଇ ଆଣିଲେ ସରକାର । ସରକାରଙ୍କ ସହାୟତାରେ ପ୍ରବାସୀ ଜୀବନ ବଂଚାଇ ନିଜ ନିଜ ଅଂଚଳକୁ ଫେରି ଆସିଲେ । ଫଳରେ କରୋନା କବଳରୁ ସିନା ଜୀବନ ବଂଚିଗଲା ହେଲେ ଜୀବିକା ଉଜୁଡିଗଲା । କେନ୍ଦ୍ରାପଡାର ପ୍ରବାସୀମାନେ ଗାଁକୁ ଫେରିବାର ୪ମାସ ପରେ ସେମାନଙ୍କ ପାଖରେ କାମ ନାହିଁ । ତେଣୁ ଘର ଚଳିବା କଷ୍ଟକର ହୋଇପଡିଛି । ଏଭଳି ସ୍ଥିତିରେ ଭୂତାଣୁ ସଂକ୍ରମଣ ଭୟ ଠାରୁ ଭୋକର ଭୟ ରାଜ୍ୟ ବାହାରୁ ଫେରିଥିବା ଶ୍ରମିକଙ୍କ ବ୍ୟତିବ୍ୟସ୍ତ କରିଛି ।
ପଂଚାୟତରେ କାମ ମିଳୁନି, କେମିତି ପୋଷିବୁ ପେଟ ? ଦିନକୁ ଦିନ କରୋନାର କାୟା ବିସ୍ତାର କରୁଥିବାରୁ ରାଜ୍ୟ ବାହାରକୁ ଯିବାକୁ ପାଇଁ ଚାହୁଁନାହାନ୍ତି ଶ୍ରମିକ । ସରକାରୀ ରିପୋର୍ଟ ଅନୁସାରେ କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକକୁ ୬ ହଜାର ପ୍ରବାସୀ ଓଡିଆ ଫେରିଛନ୍ତି । ରାଜ୍ୟ ସରକାରଙ୍କ ମନରେଗା ଯୋଜନାରେ ଜବକାର୍ଡ ମାଧ୍ୟମରେ ଅଳ୍ପ କିଛି ପ୍ରବାସୀଙ୍କୁ କାମ ଯୋଗାଇ ଦିଆଯାଇଛି । ପଂଚାୟତ ସ୍ତରରେ କାମ ଥିଲେ ବି ପ୍ରବାସୀଙ୍କ ପାଖରେ ଜବକାର୍ଡ ନଥିବାରୁ କାମ ମିଳୁନଥିବା ଅଭିଯୋଗ ହୋଇଛି । ସେପଟେ ଜିଲ୍ଲାପାଳ କହିଛନ୍ତି ଖୁବଶୀଘ୍ର ପଂଚାୟତ ସ୍ତରରେ କାମ ଯୋଗାଇ ଦିଆଯିବ ।
ଦେଶରେ କର୍ମ ସଂସ୍ଥାନ ସୃଷ୍ଟି କରିବା ପାଇଁ କେନ୍ଦ୍ର ସରକାରଙ୍କ ଆତ୍ମ ନିର୍ଭରଶୀଳ ଭାରତ, ସଶକ୍ତ ଭାରତ ମିଶନ ସାଙ୍ଗକୁ ରାଜ୍ୟ ସରକାରଙ୍କ ମାଳମାଳ ଯୋଜନା । ହେଲେ ବାସ୍ତବ ଚିତ୍ର କିନ୍ତୁ ସଂପୂର୍ଣ୍ଣ ଭିନ୍ନ । ରାଜ୍ୟ ବାହାରୁ ଫେରୁଥିବା ଶ୍ରମିକଙ୍କ ହାତକୁ କାମ ମିଳୁନଥିବାରୁ ଏବେ ଭୂତାଣୁର ଭୟ ଅପେକ୍ଷା ଭୋକର ଭୟ ବେଶି ଘାରିଛି ।