କନକ ବ୍ୟୁରୋ : କଳାହାଣ୍ଡି ଜିଲ୍ଲା ଜୁନାଗଡ ବ୍ଲକର ଜୀବନରେଖା ଭତ୍ରା ଡ୍ୟାମ ଏବେ ପୋତିହେବାକୁ ଲାଗିଲାଣି । ହେଲେ ଏଥିପ୍ରତି ପ୍ରଶାସନର ନିଘା ନାହିଁ । ଦିନେ ଡ୍ୟାମରୁ ଜୁନାଗଡ ବ୍ଲକର ୧୮ଶହ ହେକ୍ଟର ଚାଷ ଜମି ପାଣି ଯୋଗାଯାଉଥିଲା । କିନ୍ତୁ ଏବେ ଭତ୍ରା ଡ୍ୟାମରେ ପ୍ରାୟ ୧୫ ଫୁଟ ମାଟି ପୋତି ହେବାରୁ ଜଳ ଯୋଗାଣରେ ବିଭ୍ରାଟ ସୃଷ୍ଟି ହୋଇଛି । ପ୍ରାୟ ୫୦ ବର୍ଷ ହେଲା ଡ୍ୟାମର ପୁନରୁଦ୍ଧାର କରାଯାଇ ନାହିଁ କି ପାରପାଶ୍ୱର୍ିକ ବିକାଶ ବି ହୋଇନି । ଯାହାକୁ ନେଇ ଚାଷୀ ଓ ପର୍ଯ୍ୟଟକ ଅସନ୍ତୋଷ ପ୍ରକାଶ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦିନେ କଳାହାଣ୍ଡି ଜିଲ୍ଲା ଜୁନାଗଡ ବ୍ଲକର ଜୀବନ ରେଖା ପାଲଟିଥିଲା ଭତ୍ରା ଡ୍ୟାମ ଏବେ ନିଜ ପରିଚୟ ଖୋଜୁଛି । ଡ୍ୟାମ ନିର୍ମାଣର ୫୦ ବର୍ଷରୁ ଅଧିକ ସମୟ ବିତି ଗଲାଣି । ହେଲେ ଥରୁଟିଏ ବି ଡ୍ୟାମର ପୁନରୁଦ୍ଧାର କାମ ହୋଇପାରି ନାହିଁ । ଫଳରେ ଡ୍ୟାମରେ ୧୫ ଫୁଟରୁ ଅଧିକ ଅଂଚଳ ମାଟି ପୋତି ହୋଇଯାଇଥିବାରୁ ଜଳ ଯୋଗାଣ ବାଧା ପ୍ରାପ୍ତ ହେଉଛି । ୩ଟି ପଂଚାୟତର ପ୍ରାୟ ୫ଶହ ଏକର ଜମିରେ ନିର୍ମିତ ଏହି ଭତ୍ରା ଡ୍ୟାମ । ଏକଦା ୧୨୦୦ରୁ ୧୮୦୦ ହେକ୍ଟର ଚାଷ ଜମିକୁ ପାଣି ଯୋଗାଇ ଦେଉଥିଲା । କିନ୍ତୁ ଏବେ ଡ୍ୟାମ ପୋତି ହେଉଥିବାରୁ ସବୁ ଅଂଚଳକୁ ଜଳସେଚନ ହୋଇ ପାରୁ ନାହିଁ ।
ଗୋଟିଏ ବିଭାଗରୁ ଆଉ ବିଭାଗକୁ ପରିଚାଳନା ପାଇଁ ହସ୍ତାନ୍ତର ହେଉଛି ହେଲେ ଭତ୍ରା ଡ୍ୟାମର ଭାଗ୍ୟ ବଦଳି ପାରୁନାହିଁ । ବିଗତ ଦିନରେ ଭତ୍ରା ଡ୍ୟାମର ପ୍ରାକୃତିକ ସୌନ୍ଦର୍ଯ୍ୟ ଦୂର ଦୂରାନ୍ତର ପର୍ଯ୍ୟଟକଙ୍କୁ ଟାଣି ଆଣୁଥିଲା । ପାରପାଶ୍ୱର୍ିକ ବିକାଶ କରାଯାଉନଥିବାରୁ ଡ୍ୟାମ ସୌନ୍ଦର୍ଯ୍ୟ ହରାଇଛି । ୧୯୫୨ ମସିହାରେ ଭତ୍ରା ଡ୍ୟାମ ମଧ୍ୟମ ଜଳସେଚନ ବିଭାଗରୁ କ୍ଷୁଦ୍ର ଜଳସେଚନ ବିଭାଗକୁ ହସ୍ତାନନ୍ତର ହୋଇଥିଲା ।
୨୦୦୧ ମେ ୧୨ ତାରିଖରେ କ୍ଷୁଦ୍ର ଜଳ ସେଚନ ବିଭାଗରୁ ଇନ୍ଦ୍ରାବତୀକୁ ହସ୍ତାନ୍ତର ହୋଇଥିଲା । ହେଲେ ଏବେ ଡ୍ୟାମରେ ୧୦ରୁ ୧୫ ଫୁଟ ମାଟି ପୋତି ହୋଇଗଲାଣି । ୨୦୦୧ ମସିହାରୁ ଏହି ଡ୍ୟାମ ଭୁବନେଶ୍ୱର ସେଫ୍ଟି ଡ୍ୟାମ ଅଧିନରେ ରହିଛି । ପ୍ରତିବର୍ଷ ରାଜ୍ୟ ସରକାରଙ୍କୁ ଭତ୍ରା ଡ୍ୟାମର ପୁନରୁଦ୍ଧାର ପାଇଁ ରିପୋର୍ଟ ଦିଆଯାଉଛି, ହେଲେ ଫଳ କିଛି ମିଳୁ ନାହିଁ ।