ରାଜ୍ୟର ୧୫ ଜିଲ୍ଲାରେ ଆଜି ହେବନି ଟିକାକରଣ । ଲଗାତର ତିନି ଦିନ ଧରି ୫୦ ହଜାର ତଳେ ରହୁଛି ଟିକା ଦାନ, ଶୁକ୍ରବାର ଦିଆଗଲା ମାତ୍ର ୩୧ ହଜାର ଡୋଜ ଟିକା ।
କନକ ବ୍ୟୁରୋ : ଟିକା ଆସିଛି, ହେଲେ ବିଭିନ୍ନ ଜିଲ୍ଲାକୁ ପହଞ୍ଚି ପାରିନାହିଁ । ତେଣୁ ଆଜି ୧୫ଟି ଜିଲ୍ଲାରେ ଟିକାକରଣ ବନ୍ଦ ରହିବ, ୩୯୯ ଟିକା କେନ୍ଦ୍ରରେ କରାଯିବ ଟିକାକରଣ । ଯେଉଁଜିଲ୍ଲାରେ ଆଜି ଟିକାକରଣ ହେବ ନାହିଁ, ସେହି ଜିଲ୍ଲାଗୁଡିକ ହେଉଛି ବଲାଙ୍ଗିର, ବାଲେଶ୍ୱର, ବୌଦ୍ଧ, ଦେବଗଡ, ଗଂଜାମ, ଯାଜପୁର, କନ୍ଧମାଳ, କେନ୍ଦ୍ରାପଡା, କୋରାପୁଟ, ମାଲକାନଗିରି, ମୟୂରଭଂଜ, ନବରଙ୍ଗପୁର, ନୂଆପଡା, ରାୟଗଡା, ସୋନପୁର ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ବର୍ତମାନ କୋଭିସିଲଡ ଟିକା ୧୦ ଲକ୍ଷ ୫୫ ହଜାର ୮୦୦ ଡୋଜ ମହଜୁଦ ରହିଥିବା ବେଳେ କୋଭାକ୍ସିନ ୪ ଲକ୍ଷ ୧୮ ହଜାର ୪୨୦ ଡୋଜ ରହିଛି । ଗୋଟିଏ ପଟେ ରାଜ୍ୟରେ ଦୈନିକ ସଂକ୍ରମଣ ଦୁଇ ସପ୍ତାହ ଧରି ସ୍ଥିର ରହିଛି । ଅନ୍ୟପଟେ ଟିକାକରଣ ଦିନକୁ ଦିନ ଧିମେଇ ଯାଉଛି ।
ଶୁକ୍ରବାର ରାଜ୍ୟରେ ୧୭ଟି ଜିଲ୍ଲାରେ ଟିକାକରଣ ବନ୍ଦ ରହିଥିଲା । ୧୦୭ ଟିକାକେନ୍ଦ୍ରରେ ମାତ୍ର ୩୧ ହଜାର ୨୯୨ ଡୋଜ୍ ଟିକା ଦିଆଯାଇଛି । ଜୁନ ୨୧ରୁ ବଡ଼ ଟିକାକରଣ ଅଭିଯାନ ଆରମ୍ଭ ହେବା ପରେ ଏହା ରାଜ୍ୟର ସବୁଠୁ କମ୍ ଟିକାକରଣ । ଗୁରୁବାର ୩୫ହଜାର ୫୪୪ ଡୋଜ୍ ଟିକା ଦିଆଯାଇଥିଲା । ଏପଟେ ଶୁକ୍ରବାର ସନ୍ଧ୍ୟାରେ ରାଜ୍ୟରେ ପହଂଚିଛି ଆଉ ୯ ଲକ୍ଷ ୪୩ ହଜାର ୩୮ କୋଭିସିଲଡ ଟିକା । ହେଲେ ବିଭିନ୍ନ ଜିଲ୍ଲାକୁ ପଠାଯାଇ ପାରିନାହିଁ । ଫଳରେ ଆଜି ମଧ୍ୟ ରାଜ୍ୟରେ ଟିକାକରଣ ବାଧାପ୍ରାପ୍ତ ହେବ ।