ଭାରତ ବନ୍ଦକୁ ନାହିଁ ସମର୍ଥନ । ହେଲେ କୃଷି କାନୁନର ସଂଶୋଧନ ଦାବି କଲା ଆରଏସ୍ଏସ୍ ସହିତ ଜଡିତ କିଷାନ ସଂଗଠନ ଭାରତୀୟ କିଷାନ ସଂଘ
କନକ ବ୍ୟୁରୋ : ରାଷ୍ଟ୍ରୀୟ ସ୍ୱଂୟ ସେବକ ସଂଘ ବା ଆରଏସଏସ ସହିତ ଜଡିତ କିଷାନ ସଂଗଠନ ଭାରତୀୟ କିଷାନ ସଂଘ କୃଷକ ମାନଙ୍କ ଦ୍ୱାରା ଡାକରା ଦିଆଯାଇଥିବା ଭାରତ ବନ୍ଦକୁ ସମର୍ଥନ ଜଣାଇନାହିଁ । ମାତ୍ର କେନ୍ଦ୍ର ସରକାର ଆଣିଥିବା କୃଷିବିଲ୍ ର କିଛି ସଂଶୋଧନ ଆବଶ୍ୟକ ରହିଛି ବୋଲି କହିଛନ୍ତି । ଆଜି ବିଭିନ୍ନ କୃଷକ ସଂଗଠନ ପକ୍ଷରୁ କେନ୍ଦ୍ରସରକାରଙ୍କ ନୂତନ କୃଷିବିଲ୍ ପ୍ରତ୍ୟାହାର ଦାବିରେ ଭାରତ ବନ୍ଦ ଡାକରା ଦିଆଯାଇଛି । ଏହାକୁ ନେଇ ଭାରତୀୟ କିଷାନ ସଂଘର ମହେଶ ଚୌଧୁରୀ କହିଛନ୍ତି କି ଆମ ସଂଗଠନ ଭାରତ ବନ୍ଦକୁ ସମର୍ଥନ କରୁନାହିଁ । ହେଲେ ସରକାର ଯେଉଁ ରୂପରେ ନୂତନ କୃଷି କାନୁନ ଲାଗୁ କରିବାକୁ ଯାଉଛନ୍ତି ତାକୁ ବି ଆମ ସଂଗଠନ ସମର୍ଥନ କରୁନାହିଁ । ଏହି କାନୁନରେ କିଛି ସଂଶୋଧନ ପାଇଁ ଆମ ସଂଗଠନ ଦାବି କରୂୁଛି । ଏନେଇ ସଂଗଠନ ପକ୍ଷରୁ ଅଗଷ୍ଟ ମାସରେ କେନ୍ଦ୍ର ସରକାରଙ୍କୁ ଚିଠି ଲେଖାଯାଇଥିଲା । ଯେଉଁଥରେ ସର୍ବନିମ୍ନ ସହାୟକ ମୂଲ୍ୟକୁ ଆଇନସିଦ୍ଧ କରିବାକୁ ଦାବି କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀ ଚୌଧୁରୀ କହିଛନ୍ତି କି ଏହି ଚିଠି ପାଇବା ପରେ ସରକାର ଏହି ଆଇନ ଉପରେ ସଂଶୋଧନ କରିବେ ବୋଲି ଆଶ୍ୱାସନା ଦେଇଛନ୍ତି । ହେଲେ ସରକାର ଏହି ଆଇନରେ ଆଣିଥିବା ପ୍ରାବଧାନ ଏକ ବଜାର ଏକ ଦେଶକୁ ତାଙ୍କ ସଂଗଠନ ସମ୍ପୁର୍ଣ୍ଣ ସମର୍ଥନ ଜଣାଉଛି । ଏହାଦ୍ୱାରା ତୃଣମୂଳ ସ୍ତରରେ କୃଷକ ମାନେ ଲାଭବାନ ହେବେ ବୋଲି ସେ କହିଛନ୍ତି । ଦିଲ୍ଲୀ ଓ ଅନ୍ୟାନ୍ୟ ରାଜ୍ୟ ମାନଙ୍କରେ କୃଷକ ମାନେ କରୁଥିବା ଆନ୍ଦୋଳନକୁ ଶେଷ କରିବାକୁ ସେ କୃଷକ ମାନଙ୍କୁ ଅନୁରୋଧ କରିଛନ୍ତି । ସେ କହିଛନ୍ତି କି ଏହି ଆନ୍ଦୋଳନରେ ସାମିଲ ହୋଇଥିବା ଲୋକ ଓ ଆନ୍ଦୋଳନ ସ୍ଥଳରେ ଚାଲିଥିବା ନାରା ଏବେ ଦେଶ ପାଇଁ ବିପଦ ସୃଷ୍ଟି କରିଛି ।
ଦିଲ୍ଲୀର ବିଭିନ୍ନ ସୀମାରେ କୃଷି କାନୁନ୍ ବିରୋଧରେ ଆନ୍ଦୋଳନ ଜାରି ରହିଛି । ଏହି ଆନ୍ଦୋଳନରେ ସାମିଲ ହୋଇଥିବା କୃଷକ ମାନଙ୍କ ମଧ୍ୟରେ ଅଧିକାଂଶ ପଞ୍ଜାବ, ହରିଆଣା ଓ ଉତ୍ତତରପ୍ରଦେଶର କୃଷକ ମାନେ ସାମିଲ ହୋଇଛନ୍ତି । ଏନେଇ କୃଷକ ନେତା ଓ ସରକାରଙ୍କ ମଧ୍ୟରେ ୫ ଥର ଆଲୋଚନା ହୋଇଥିଲେ ବି ଏନେଇ କିଛି ନିସ୍କର୍ଷ ବାହାରିପାରୁ ନାହିଁ ।