ବ୍ୟାଙ୍କରେ ରଖୁଥିବା ଟଙ୍କାର ସୁରକ୍ଷାକୁ ନେଇ ବଢିଲା ଚିନ୍ତା । ସଞ୍ଚୟ, ଜମା ରାଶିର ରସିଦ୍ ଧରି ବୁଲୁଛନ୍ତି ଲୋକେ, ହେଲେ ବ୍ୟାଙ୍କ ଆକାଉଣ୍ଟରେ ନାହିଁ ଟଙ୍କା । ପ୍ରଶ୍ନ କିଏ ନେଲା ଏହି ଟଙ୍କା?

କନକ ବ୍ୟୁରୋ : ବ୍ୟାଙ୍କରେ ରଖୁଥିବା ଟଙ୍କାର ସୁୂରକ୍ଷା ନେଇ ଚିନ୍ତା ବଢାଇଛି ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ । ଆକାଉଣ୍ଟଧାରୀ ସଞ୍ଚୟ ଏବଂ ଫିକ୍ସ ଡିପୋଜିଟ୍ କରିଥିବା ଟଙ୍କାକୁ ଲୁଟିନେଲେ ବ୍ୟାଙ୍କ୍ ଆକାଉଣ୍ଟାଟ । ଲୋକେ ଜମା ଟଙ୍କା ରସିଦ ଧରି ବୁଲୁଥବା ବେଳେ ଆକାଉଣ୍ଟରେ ନାହିଁ ଟଙ୍କା ।

ବ୍ୟାଙ୍କରେ ରଖୁଥିବା ଆପଣଙ୍କ ଟଙ୍କା କେତେ ସୁରକ୍ଷିତ? ଖୋର୍ଦ୍ଧା ଜିଲ୍ଲା ରାଉତପଡ଼ା କେନ୍ଦ୍ର ସମବାୟ ବ୍ୟାଙ୍କରେ ହୋଇଥିବା ଘୋଟାଲାକୁ ଦେଖିଲେ ବ୍ୟାଙ୍କ ଉପରୁ ଆପଣଙ୍କ ଭରସା ଉଠିଯିବ । ବର୍ଷ ବର୍ଷ ଧରି ନିଜ କଷ୍ଟ ଅର୍ଜିତ ଟଙ୍କାରୁ କିଛି କିଛି ସଞ୍ଚୟ କରୁଥିବା ଗରିବ ଲୋକଙ୍କ ଠାରୁ କୋଟିଏରୁ ଊଦ୍ଧ୍ୱର୍ ଟଙ୍କା ଠକେଇ ହୋଇଛି । ଖୋର୍ଦ୍ଧା ରାଉତପଡା ଅଞ୍ଚଳର ଶତାଧିକ ଲୋକ ଏଭଳି ଠକେଇର ଶିକାର ହୋଇଛନ୍ତି । ସଞ୍ଚୟ ଏବଂ ଫିକ୍ସ ଡିପୋଜିଟର ରସିଦ୍ ଲୋକଙ୍କ ପାଖରେ ଅଛି ହେଲେ ବ୍ୟାଙ୍କ ଆକାଉଣ୍ଟରେ ଟଙ୍କା ନାହିଁ । ଯାହାକୁ ନେଇ ଚିନ୍ତାରେ ପଡିଯାଇଛନ୍ତି ଆକାଉଣ୍ଟଧାରୀ ।

ରାଉତପଡ଼ା ସମବାୟ ବ୍ୟାଙ୍କ ଶାଖାର ତତକାଳୀନ ବ୍ୟାଙ୍କ ଆକାଉଣ୍ଟାଟ ବୁଦ୍ଧିରାମ ଦାସ ଏଭଳି ଠକେଇ କରିଥିବା ଅଭିଯୋଗ ହୋଇଛି । ଲୋକଙ୍କ ବିଶ୍ୱାସରେ ବିଷ ଦେଇ ସେମାନଙ୍କ ଟଙ୍କାକୁ ତାଙ୍କ ଆକଉଣ୍ଟରେ ଜମା ନ କରି ଚଳୁ କରି ଦେଇଛନ୍ତି । ବୁଦ୍ଧିରାମ ଦିର୍ଘ ୧୦ ବର୍ଷ ଧରି ଏଭଳି ଠକେଇ କରୁଥିଲେ ମଧ୍ୟ କିପରି ବ୍ୟାଙ୍କ ଅଧିକାରୀ ଜାଣିପାରିଲେ ନାହିଁ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଘଟଣା ସାମ୍ନାକୁ ଆସିବା ପରେ ବ୍ୟାଙ୍କ ପକ୍ଷରୁ ତଦନ୍ତ କରାଯାଇ ଠକେଇର ଶିକାର ହୋଇଥିବା ଲୋକଙ୍କୁ ଚିହ୍ନଟ କରିଛନ୍ତି । ଟଙ୍କା ଲୋକଙ୍କ ଆକାଉଣ୍ଟକୁ ଫେରିବା ବୋଲି ବ୍ୟାଙ୍କ ପକ୍ଷରୁ କୁହାଯାଇଥିଲେ ମଧ୍ୟ ଲୋକଙ୍କ ଭରସା ପାଉନି ।