୨ବର୍ଷ ହେଲା ଦେଶରେ ଛପା ଯାଉ ନାହିଁ ୨ହଜାର ଟଙ୍କିଆ ନୋଟ : ଲୋକସଭାରେ ପ୍ରଶ୍ନର ଉତ୍ତର ଦେଲେ ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର
୨୦୧୯ ଏପ୍ରିଲରେ ଶେଷ ଥର ପାଇଁ ଛପା ଯାଇଥିଲା ୨ହଜାର ଟଙ୍କିଆ ନୋଟ
କନକ ବ୍ୟୁରୋ : ୨ ବର୍ଷ ହେଲା ଦେଶରେ ୨ହଜାର ଟଙ୍କିଆ ନୋଟ୍ ଛପାଯାଇ ନାହିଁ । ୨୦୧୮ ମାର୍ଚ୍ଚ ୩୦ ସୁଦ୍ଧା ୩ ହଜାର ୩୬୨ ନିୟୁତ ୨ହଜାର ଟଙ୍କିଆ ନୋଟ ଉପଲବ୍ଧ ଥିଲା । ଦେଶରେ ପ୍ରଚଳିତ ମୋଟ ବ୍ୟାଙ୍କ ନୋଟ ମୂଲ୍ୟର ଏହା ୩୭ ଦଶମିକ ୨୬ ପ୍ରତିଶତ ହେବ । ୨୦୨୧ରେ ଏହି ନୋଟ୍ ସଂଖ୍ୟା ୮୬୩ ନିୟୁତ ଖଣ୍ଡ କମିଛି । ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର ସୋମବାର ଦିନ ଏହି ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଲୋକସଭାରେ ଅନୁରାଗ ଠାକୁର କହିଛନ୍ତି, ଏକ ନିର୍ଦ୍ଦିଷ୍ଟ ମୂଲ୍ୟର ନୋଟ୍ ଛପା ପ୍ରସଙ୍ଗରେ ଉଭୟ କେନ୍ଦ୍ର ସରକାର ଏବଂ ଭାରତୀୟ ରିଜର୍ଭ ବ୍ୟାଙ୍କ ମିଶି ନିଷ୍ପତ୍ତି ନେଇଥାନ୍ତି । ଲୋକଙ୍କ ଚାହିଦାକୁ ଦେଖି ବିଚାର କରାଯାଏ । ୨୦୧୯-୨୦ ଏବଂ ୨୦୨୦-୨୧ ଅବଧି ୨ହଜାର ଟଙ୍କିଆ ନୋଟ୍ ଛାପିବାର ଆବଶ୍ୟକତା ଦେଖାଦେଇ ନଥିଲା । ତେଣୁ ଏହା ଛପା ବନ୍ଦ ରହିଥିଲା ।
୨୦୧୬ ନଭେମ୍ବର ୮ରେ ନୋଟ୍ ବନ୍ଦୀ ପରେ ସରକାର ଆବଶ୍ୟକତା ପୂରଣ ପାଇଁ ୨ହଜାର ଟଙ୍କିଆ ନୋଟ ପ୍ରଚଳନ କରିଥିଲେ । ଯାହା ଦ୍ବାରା ମୁଦ୍ରାର ଚାହିଦା ପୂରଣ ହୋଇଥିଲା । କିନ୍ତୁ ଖୁଚୁରା କାରବାରେ ଏହା ଅନେକ ସମସ୍ୟା ସୃଷ୍ଟି କରିଥିଲା । ଫଳରେ ୨୦୧୯ ଏପ୍ରିଲ ପରଠାରୁ କୌଣସି ନୂଆ ୨ହଜାର ଟଙ୍କିଆ ନୋଟ୍ ଛପାଯାଇ ନାହିଁ ।